បាងកក៖ រាជរដ្ឋាភិបាលថៃបានអំពាវនាវដល់ទីភ្នាក់ងារអន្តរជាតិ និងប្រទេសនានាឱ្យបំពេញការសន្យារបស់ខ្លួនក្នុងការជួយប្រទេសថៃ ឱ្យសម្រេចបាននូវគោលបំណងរបស់ខ្លួនក្នុងការកាត់បន្ថយការបញ្ចេញឧស្ម័នផ្ទះកញ្ចក់។ អំឡុងពេលកិច្ចប្រជុំ រយៈពេលពីរថ្ងៃ នៃសន្និសីទសកម្មភាពអាកាសធាតុរបស់ប្រទេសថៃ (TCAC) លោក Varawut Silpa-archa ធនធានធម្មជាតិ និងបរិស្ថាននៃថៃ បានរំលឹកអ្នកចូលរួមឱ្យបំពេញការសន្យារបស់ពួកគេដើម្បីជួយថៃ កំណត់ការបំភាយផ្ទះកញ្ចក់។

លោកក៏បានសង្កត់ធ្ងន់ផងដែរ អំពីសារៈសំខាន់នៃការធ្វើសកម្មភាពយ៉ាងឆាប់រហ័សក្នុងការផ្តល់នូវកញ្ចប់ហិរញ្ញវត្ថុ ការផ្ទេរបច្ចេកវិទ្យា និងការកសាងសមត្ថភាព ដូចដែលបានសន្យាពីមុនដោយសហគមន៍អន្តរជាតិ ។

រដ្ឋមន្ត្រីក្រសួងធនធានធម្មជាតិរូបនេះបាននិយាយថា ប្រទេសថៃបានយល់ព្រមជាមួយសហគមន៍អន្តរជាតិដើម្បីកាត់បន្ថយការបំភាយឧស្ម័នពី ៣០% ទៅ ៤០% នៅឆ្នាំ២០៣០ ខណៈដែលទទួលបានការសន្យាដើម្បីគាំទ្រដល់គោលដៅរបស់ប្រទេសថៃ តាមរយៈក្របខ័ណ្ឌដែលគេស្គាល់ថា ជាសកម្មភាពកាត់បន្ថយសមស្របជាតិ។

លោកបានបន្ថែមថា រាជរដ្ឋាភិបាលថៃកំពុងធ្វើការដោះស្រាយផលប៉ះពាល់នៃការប្រែប្រួលអាកាសធាតុ ដោយកាត់បន្ថយការបំភាយឧស្ម័ននៅក្នុងវិស័យដឹកជញ្ជូន កសិកម្ម និងឧស្សាហកម្ម។ ទោះយ៉ាងណា លោកបញ្ជាក់ថា សកម្មភាពទាំងនេះនឹងមិនទទួលបានជោគជ័យទេ បើគ្មានការគាំទ្រពីអន្តរជាតិ។

យុទ្ធសាស្ត្រអភិវឌ្ឍន៍ការបំភាយឧស្ម័នផ្ទះកញ្ចក់រយៈពេលវែងរបស់ប្រទេសថៃនឹងត្រូវបានដាក់ជូនទៅអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុក្នុងអំឡុងពេលសន្និសីទលើកទី ២៧ នៃភាគីនានា ឬ Cop27 នៅខែវិច្ឆិកា។

រដ្ឋាភិបាលមានគោលបំណងសម្រេចបាននូវអព្យាក្រឹតភាពកាបូននៅឆ្នាំ ២០៥០ និងការបំភាយឧស្ម័នផ្ទះកញ្ចក់សូន្យត្រឹមឆ្នាំ២០៦៥ ៕ ប្រភពពី NNT, ដោយ៖ សារ៉ាត