ភ្នំពេញ៖ សិក្ខាកាមនគរបាលជាតិកម្ពុជា១៤នាក់ ដែលបានសិក្សាក្នុងវគ្គបណ្តុះបណ្តាលជំនាញ ស៊ើបការណ៍ និងប្រឆាំងបទល្មើសសេដ្ឋកិច្ច ទើបតែបញ្ចប់ចុះកម្មសិក្សាដកស្រង់បទពិសោធន៍ការងារនៅស្នងការដ្ឋាននគរបាលរាជធានីភ្នំពេញ កាលពីកន្លងទៅនេះ ។

សិក្ខាកាមបានបញ្ចប់ការសិក្សារយៈពេលបីឆ្នាំនៅសាលាមធ្យមសិក្សាជាន់ខ្ពស់តម្រួតប្រជាជន២នៃក្រសួងនគរបាលវៀតណាមនៃសាធារណរដ្ឋសង្គមនិយមវៀតណាម។ស្នងការដ្ឋាននគរបាលរាជធានីភ្នំពេញបានរៀបចំពិធីបូកសរុបលទ្ធផលកម្មសិក្សាបញ្ចប់វគ្គនិងប្រគល់សញ្ញាបត្រជូនមន្រ្តីនគរបាលជាតិកម្ពុជាទាំង ១៤នាក់ កាលពីព្រឹកថ្ងៃទី២៣ ខែសីហានៅស្នងការដ្ឋាននគរបាលរាជធានីភ្នំពេញ ។

ឯកឧត្តម ឧត្តមសេនីយ៍ឯក ស ថេត អគ្គស្នង ការរងនគរបាលជាតិ និងជាស្នងការនគរបាលរាជធានីភ្នំពេញ និង លោកវរសេនីយ៍ឯក បួយ ងីឡឹម នាយករងសាលាមធ្យមសិក្សាជាន់ខ្ពស់ តម្រួតប្រជាជន២ បានអញ្ជើញចូលរួមក្នុងពិធីនេះ។

លោកវរសេនីយ៍ឯក បួយ ងីឡឹម បានមានប្រសាសន៍ថាអនុវត្តទៅតាមផែនការកិច្ចសហប្រតិបត្តិការបណ្តុះ បណ្តាលរវាងក្រសួងនគរបាលវៀតណាម និងក្រសួងមហាផ្ទៃកម្ពុជាសិក្ខាកាមនគរបាលជាតិម្ពុជា ១៤នាក់ បានទៅទទួលការបណ្តុះបណ្តាលវគ្គជំនាញស៊ើបការណ៍និងប្រឆាំងបទល្មើសេដ្ឋកិច្ច ដោយបានបញ្ចប់ការសិក្សាទទួលបានលទ្ធផលជោគជ័យមួយរយភាគរយ បន្ទាប់ពីសិក្ខាកាមនគរបាលជាតិកម្ពុជា បានរៀនសូត្រនូវមុខវិជ្ជាសំខាន់ៗនៅសាលាមធ្យមសិក្សាជាន់ខ្ពស់តម្រួតប្រជាជន២ រយៈពេលបីឆ្នាំកន្លងមក។

លោកវរសេនីយ៍ឯកបានលើកឡើងទៀតថា នៅក្នុងអំឡុងការសិក្សានៅសាលារបស់សិក្ខាកាមនគរបាលជាតិកម្ពុជា គឺសាលាបានយកចិត្តទុកដាក់ជាទីបំផុត ដោយមានការរៀបចំការបង្រៀនដោយគ្រូមានបទពិសោធន៍ មុខវិជ្ជាជំនាញត្រឹមត្រូវតាមកម្មវិធីសិក្សានិងគួបផ្សំជាមួយនឹងការយកចិត្តទុកដាក់រៀនសូត្ររបស់សិក្ខាកាម ទើបធ្វើឱ្យការសិក្សារបស់សិក្ខាកាមនគរបាលជាតិកម្ពុជាទទួលបាននូវលទ្ធផលជោគជ័យនាពេលនេះ ។ក្នុង ចំណោមសិក្ខកាមទាំង១៤នាក់គឺជាប់ចំណាត់ថ្នាក់និទ្ទេសល្អប្រសើរបីនាក់, ល្អបង្គួរ១០នាក់និងនិទ្ទេសល្អចំនួនមួយនាក់ ។ជាងនេះទៀតគឺ
សិក្ខាកាមឆ្នើមបួននាក់ទទួលបានប័ណ្ណ សរសើរផងនោះទៀត។

នៅក្នុងឱកាសនោះឯកឧត្តម ឧត្តមសេនីយ៍ឯក ស ថេត បានមានប្រសាសន៍ស្វាគមន៍ក្នុងនាមថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ ចំពោះប្រតិភូដឹកនាំដោយនាយករងសាលាមធ្យមសិក្សាជាន់ខ្ពស់តម្រួតប្រជាជន២ ក្រសួងនគរបាលវៀតណាម ដែលបានចំណាយពេលវេលាដ៏មានតម្លៃអញ្ជើញមកចូលរួមក្នុងពិធីបូកសរុបលទ្ធផលវគ្គកម្មសិក្សានិងប្រគល់សញ្ញាបត្រជូនសិក្ខាកាមនគរបាលជាតិកម្ពុជានៅពេលនេះ។លោកបានវាយតម្លៃខ្ពស់និងចូលរួមអបអរសាទរជាមួយសិក្ខាកាមនគរបាលជាតិកម្ពុជាទាំង១៤នាក់ដែលបានខិតខំប្រឹងប្រែងរៀនសូត្រទទួលបានចំណេះជំនាញពិតប្រាកពីសាលាមធ្យមសិក្សាជាន់ខ្ពស់តម្រួតប្រជាជន២ ដើម្បីយកជំនាញទាំងនេះមកបំរើការងារជូនអង្គភាពឱ្យទទួលបាននូវប្រសិទ្ធការងារ។

ឯកឧត្តម អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានលើកឡើងទៀតថាចំពោះសិក្ខាកាមមន្រ្តីនគរបាលដែលបានបញ្ចប់ការសិក្សានៅក្នុងឬក្រៅប្រទេស ដើម្បីជាការលើកទឹកចិត្ត អង្គភាពនឹងរៀបចំគោលការណ៍ស្នើសុំទៅថ្នាក់ដឹកនាំ អគ្គស្នងការដ្ឋាននគរបាលជាតិ និងក្រសួងមហាផ្ទៃ ដើម្បីដំឡើងឋានន្តរសក្តិនិងតែងតាំងមុខតំណែងជាការលើកទឹកចិត្តដល់សិក្ខាកាមដែលបានខិតខំសិក្សារៀនសូត្រទទួលបានលទ្ធផលល្អ។

ឯកឧត្តម ឧត្តមសេនីយ៍ឯក ស ថេត បានលើកឡើងទៀតថា ដោយមានកិច្ចសហប្រតិបត្តិការជាមួយប្រទេសក្នុងតំបន់និងនៅលើពិភពលោក កម្ពុជាមានការជួយបណ្តុះ បណ្តាលរយៈពេលវែង-ខ្លី ពីស្ថាប័នអនុវត្តច្បាប់បណ្តាប្រទេសនានា ប៉ុន្តែកម្ពុជានៅតែត្រូវការគាំទ្រជាចាំបាច់ពីក្រសួងនគរបាលវៀតណាម ឱ្យបន្តជួយលើការងារបណ្តុះបណ្តាលជាបន្តបន្ទាប់ទៀតលើជំនាញផ្សេងៗ ពីព្រោះថាការកសាងធនធានមនុស្សដែលមានសមត្ថភាពគ្រប់គ្រាន់ គឺជាការងារដ៏មានសារៈសំខាន់បំផុតនៅក្នុងតំណាក់កាលដែលប្រទេសជាតិកំពុងរីកចម្រើនគ្រប់វិស័យរាប់ទាំងផ្នែកបច្ចេកវិទ្យានិងព័ត៌មានវិទ្យាជាដើមនោះ៕ ដោយ៖ គ្រី សម្បត្តិ