ម៉ានីល៖ នាថ្ងៃទី២៦ កញ្ញានេះ អាជ្ញាធរហ្វីលីពីនបានប្រញាប់ប្រញាល់ ចែកចាយជំនួយដល់ជនភៀសខ្លួនរាប់ម៉ឺននាក់ បន្ទាប់ពីព្យុះទីហ្វុង Noru បានបោកបក់ក្នុងរដ្ឋធានី និងខេត្តភាគខាងជើង ដោយបានបណ្តាលឲ្យមនុស្សយ៉ាងតិច ប្រាំនាក់ស្លាប់ និងតំបន់ជាច្រើនត្រូវបានជន់លិច។

ខ្យល់បក់បោកក្នុងល្បឿន ១៨៥គីឡូម៉ែត្រក្នុងមួយម៉ោង បានវាយប្រហារលើកោះធំ Luzon កាលពីចុងសប្តាហ៍ ដោយជំរុញឱ្យអាជ្ញាធរបិទសាលារៀន ការិយាល័យរដ្ឋាភិបាល និងផ្សារហ៊ុន រហូតដល់ថ្ងៃចន្ទនេះ។

ប្រធានាធិបតី Ferdinand Marcos បានបញ្ជាឱ្យការផ្គត់ផ្គង់ត្រូវបានលើកតាមអាកាស ហើយឧបករណ៍សម្អាតត្រូវបានផ្តល់ជូនដល់សហគមន៍ដែលរងផលប៉ះពាល់ភាគច្រើន ។

លោក Marcos បាននិយាយនៅក្នុងសន្និសីទសារព័ត៌មានមួយជាមួយមន្ត្រីគ្រប់គ្រងគ្រោះមហន្តរាយ នាថ្ងៃចន្ទ ដោយលើកឡើងពីមនុស្ស ៧៤០០០នាក់ ដែលត្រូវបានបង្ខំឱ្យចូលទៅក្នុងមជ្ឈមណ្ឌលជម្លៀសដោយព្យុះថា “ចំណុចដែលយើងអាចក្រោកឈរបានគឺនៅពេលដែលជនភៀសខ្លួនភាគច្រើនបានត្រឡប់ទៅផ្ទះវិញហើយ” ។

ទីភ្នាក់ងារឧតុនិយមបានព្រមានថា ភ្លៀងធ្លាក់ខ្លាំងអាចបណ្តាលឱ្យមាន “ទឹកជំនន់ធ្ងន់ធ្ងរ” នៅក្នុងតំបន់ដែលងាយរងគ្រោះ បង្កឱ្យមានការបាក់ដី និងបំផ្លាញដំណាំ ។

ប្រទេសហ្វីលីពីន ដែលជាប្រជុំកោះជាង ៧៦០០ ឃើញព្យុះត្រូពិចជាមធ្យម ២០ដង ក្នុងមួយឆ្នាំ។ ក្នុងឆ្នាំ ២០១៣ ព្យុះទីហ្វុង Haiyan ដែលជាព្យុះស៊ីក្លូនត្រូពិចដ៏មានឥទ្ធិពលបំផុតមិនធ្លាប់មានដែលបានកត់ត្រាបានសម្លាប់មនុស្ស ៦៣០០នាក់៕ ប្រភពពី CNA, ដោយ៖ សារ៉ាត