ការ៉ាកាស៖ ទីភ្នាក់ងារសារព័ត៌មាន SHANA ដែលជាប់ទាក់ទងជាមួយក្រសួងប្រេងអ៊ីរ៉ង់ បានរាយការណ៍ ដោយដកស្រង់សម្តីរដ្ឋមន្ត្រីប្រេងអ៊ីរ៉ង់លោក Javad Owji ដែលបាននិយាយ កាលពីថ្ងៃអាទិត្យថា ប្រទេសអ៊ីរ៉ង់បានចាប់ផ្តើមចម្រាញ់ប្រេងឆៅរបស់ខ្លួន នៅក្នុងប្រទេសវេណេស៊ុយអេឡា។

លោក Owji ត្រូវបានដកស្រង់សម្តីថា ប្រទេសអ៊ីរ៉ង់បានចាប់ផ្តើមកែច្នៃប្រេងឆៅប្រហែល ១០០០០០ បារ៉ែលក្នុងមួយថ្ងៃនៅក្នុងរោងចក្រចម្រាញ់ប្រេង El Palito របស់ប្រទេស Venezuela ។

លោកបាននិយាយថា “នេះគឺជាសុបិនដ៏យូរអង្វែង អាយុកាល ៤៣ ឆ្នាំដែលត្រូវបានសម្រេច តាមរយៈការខិតខំប្រឹងប្រែងរបស់សហសេវិករបស់ខ្ញុំ នៅឯក្រុមហ៊ុនចម្រាញ់ និងចែកចាយប្រេងជាតិអ៊ីរ៉ង់ (NIORDC)” ។

លោក Jalil Salari ប្រធានក្រុមហ៊ុន NIORDC បាននិយាយ កាលពីថ្ងៃអាទិត្យថា កិច្ចខិតខំប្រឹងប្រែងកំពុងដំណើរការដើម្បីពង្រីកប្រតិបត្តិការរោងចក្រចម្រាញ់ប្រេងរបស់ប្រទេសអ៊ីរ៉ង់នៅក្នុងគម្រោងក្រៅប្រទេស។

យោងតាមសារព័ត៌មាន Press TV អ៊ីរ៉ង់បានចុះហត្ថលេខាលើកិច្ចព្រមព្រៀង ១១៦លានដុល្លារអាមេរិក ជាមួយក្រុមហ៊ុនប្រេងរដ្ឋ Venezuelan PDVSA ក្នុងខែឧសភា ដើម្បីជួសជុល និងពង្រីករោងចក្រចម្រាញ់៕ ប្រភពពី Xinhua, ដោយ៖ សារ៉ាត