អ៊ីរ៉ង់៖តុលាការប្រទេសអ៊ីរ៉ង់បាននិយាយនៅថ្ងៃចន្ទទី១៧ខែតុលានេះថា អ្នកទោសចំនួនប្រាំបីនាក់បានស្លាប់ដោយ​សារភ្លើងឆេះនៅពន្ធនាគារ Evin នៃទីក្រុង Tehran កាលពីចុងសប្តាហ៍។ ភ្លើងនេះបានបង្កើនសម្ពាធលើរដ្ឋាភិបាលដែលកំពុងតស៊ូដើម្បីទប់ស្កាត់ការតវ៉ាដ៏ធំទូទាំងប្រទេស។

បាតុកម្មនៅអ៊ឺរ៉ង់កក្រើកឡើងបន្ទាប់ពីការស្លាប់របស់ Mahsa Amini អាយុ២២ឆ្នាំ កាលពីថ្ងៃទី១៦ខែកញ្ញា នៅក្នុងមន្ទីរឃុំឃាំងរបស់ប៉ូលីស។ អាជ្ញាធរកំពុងទប់ទល់នឹងបាតុកម្មទ្រង់ ទ្រាយធំនេះ។

តុលាការរបស់ប្រទេសអ៊ីរ៉ង់បាននិយាយថា ជនរងគ្រោះទាំងអស់ដែលបានស្លាប់ដោយ​សារភ្លើងឆេះគុកនោះ  ត្រូវបានឃុំខ្លួននៅក្នុងផ្នែកមួយនៃពន្ធនាគារដែលកំណត់សម្រាប់អ្នកទោសឧក្រិដ្ឋកម្ម ដូចជាបទល្មើសប្លន់ជាដើម។ពន្ធនាគារ Evin ក៏ជាទីដែលដាក់ អ្នកទោសនយោបាយ និងអ្នកជាប់ឃុំជាច្រើននាក់ ផងដែរ។

អាជ្ញាធរបាននិយាយថា សិក្ខាសាលាពន្ធនាគារមួយត្រូវបានដុតបំផ្លាញ បន្ទាប់ពីការប្រយុទ្ធគ្នាក្នុងចំណោមអ្នកទោសមួយចំនួនដែលត្រូវបានកាត់ទោសពីបទឧក្រិដ្ឋកម្មហិរញ្ញវត្ថុ និងចោរកម្ម។ ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអាទិត្យថាអ្នកទោស៤នាក់ភ្លាមៗ ហើយមនុស្សជាង៦០ នាក់ផ្សេងទៀតបានរងរបួស បណ្តាលមកពីការស្រូបផ្សែង។ក្នុងចំណោមអ្នករបួសទាំងនោះ មានមនុស្សបួននាក់ទៀតរបួសធ្ងន់ ចុងក្រោយក៏ស្លាប់ធ្វើតុល្យការមនុស្សស្លាប់កើនឡើងដល់៨នាក់។

នៅក្នុងការអត្ថាធិប្បាយមួយ កាសែតរដ្ឋអ៊ីរ៉ង់បាននិយាយថា អ្នកធ្វើបាតុកម្មគឺមានជំនួយពីសេវាចារកម្មបរទេសបានរៀបចំផែនការដុតភ្លើងដើម្បីទាញចំណាប់អារម្មណ៍របស់អន្តរជាតិលើភាពចលាចល​នៃប្រទេសអ៊ឺរ៉ង់។

កាសែតនេះបាននិយាយថា “ការពិនិត្យឡើងវិញភាពប្រទាក់ក្រឡាគ្នានៃព្រឹត្តិការណ៍នេះបង្ហាញថា មានវត្តមានរបស់ ចារកម្មរបស់ប្រទេសលោកខាងលិច ដែលញុះញង់ក្រុមបាតុករ។

អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយថា ភ្លើងឆេះនៅ Evin អាចកើតឡើងនៅក្នុងប្រទេសណាមួយ។

ប្រធានាធិបតីអាមេរិក Joe Biden និងសហភាពអឺរ៉ុប ស្ថិតក្នុងចំណោមអ្នកដែលបានរិះគន់ការបង្រ្កាបរបស់ទីក្រុងTehran លើក្រុមបាតុករ ។  EU កំពុងពិចារណាដាក់ការបង្កកទ្រព្យសម្បត្តិ និងការហាមឃាត់ការធ្វើដំណើរលើមន្ត្រីអ៊ីរ៉ង់មួយចំនួនដែលពាក់ព័ន្ធ។

អ្នកនាំពាក្យតុលាការលោក Masoud Setayeshi បានព្រមានថា៖«ការផ្សព្វផ្សាយព័ត៌មានភូតកុហកដោយចេតនារំខានដល់មតិសាធារណៈគឺត្រូវផ្តន្ទាទោសតាមច្បាប់»។

គ្រួសារនៃអ្នកជាប់ឃុំ នយោបាយមួយចំនួន បានសរសេរលើបណ្ដាញផ្សព្វផ្សាយសង្គមដើម្បីអំពាវនាវឱ្យអាជ្ញាធរធានាសុវត្ថិភាពសាច់ញាតិរបស់ពួកគេនៅពន្ធនាគារ Evin ។ កាលពីឆ្នាំ 2018 ពន្ធនាគារនេះត្រូវបានរដ្ឋាភិបាលសហរដ្ឋអាមេរិកដាក់ក្នុងបញ្ជីខ្មៅសម្រាប់ “ការរំលោភសិទ្ធិមនុស្សធ្ងន់ធ្ងរ” ។

ការតវ៉ាដែលបង្កឡើងដោយការស្លាប់របស់ Amini កាលពីមួយខែមុន បានក្លាយទៅជាបញ្ហាប្រឈមដ៏ខ្លាំងក្លាបំផុតមួយចំពោះមេដឹកនាំរបស់ប្រទេសអ៊ីរ៉ង់ ចាប់តាំងពីបដិវត្តន៍ឆ្នាំ 1979 ដោយក្រុមអ្នកតវ៉ាបានអំពាវនាវឱ្យមានការផ្ដួលរលំរបបដឹកនាំសព្វថ្ងៃ។

ការ​តវ៉ា​បាន​ចាប់​ផ្តើម​ឡើង​វិញ​កាល​ពី​ព្រឹក​ថ្ងៃ​ចន្ទ​ក្នុង​ក្រុង Yazd និង​ទីក្រុង​មួយ​ចំនួន​ទៀត។ បាតុករបានថតវីដេអូបង្ហាញពីមនុស្សដុតភ្លើងនៅតាមដងផ្លូវ និងអំពាវនាវឱ្យមានការផ្ដួលរំលំរដ្ឋាភិបាលផង៕ ដោយ៖ វណ្ណ ស័ក្តិ