លោកបណ្ឌិត មាស នី៖ ការជ្រើសរើសសិស្ស-និស្សិតឱ្យចូលបណ្ដុះបណ្ដាលនាយទាហាន គឺជាការបង្ហាញកំណែទម្រង់យោធាកម្ពុជា
ភ្នំពេញ៖ អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី បានលើកឡើងកាលពីថ្ងៃទី១៥ ខែវិច្ឆិកា ថា ការជ្រើសរើសសិស្ស-និស្សិតឲ្យចូលបណ្ដុះបណ្ដាលនាយទាហាននៅឆ្នាំ២០២៣ខាងមុខនេះ គឺជាការបង្ហាញកំណែទម្រង់យោធានៅកម្ពុជា បើទោះបីជាកម្ពុជាមិនមានសង្គ្រាមក៏ដោយ។
លោកបណ្ឌិតបានប្រាប់ថា ទោះបីប្រទេសកម្ពុជាមិនមានសង្គ្រាមក៏ដោយ ក៏វាជាតម្រូវការមួយដែលមានសារៈសំខាន់ផងដែរនៅក្នុងពិភពលោកបច្ចុប្បន្ននេះ ហើយការដែលប្រទេសកម្ពុជាជ្រើសរើសកងទ័ពចូលនេះ គឺមិនមែនសម្រាប់ធ្វើសង្គ្រាមឡើយ ប៉ុន្តែជាការបង្កើនសមត្ថភាពកងទ័ព សម្រាប់បម្រើវិស័យការពារជាតិ។
លោកមានប្រសាសន៍ថា ៖ «ខ្ញុំគិតថា ការរើសកងទ័ពឲ្យចូលបម្រើវិស័យការពារជាតិ គឺមានសារៈសំខាន់ សម្រាប់ពង្រឹងកម្លាំងមិនមែនដើម្បីប្រយុទ្ធជាមួយគេទេ ប៉ុន្តែសារៈសំខាន់ក្នុងការបង្កើននូវសមត្ថភាពកងទ័ពដើម្បីឲ្យយើងអាចឈានទៅប្រើបច្ចេកវិទ្យាជាន់ខ្ពស់ដទៃៗទៀតបាន»។
លោកបណ្ឌិត មាស នី បានបន្ថែមថា ៖ «វាក៏ជាផ្នែកមួយដែលមានសារៈសំខាន់ ក្នុងការកំណែទម្រង់យោធាឲ្យដើរទាន់សម័យដូចគេដែរ ប៉ុន្តែយើងការពារយ៉ាងណា កុំឲ្យបាត់បង់នូវគុណតម្លៃមួយនៃក្រសួងការពារជាតិ ដោយមិនមាននរណាម្នាក់យកទៅប្រើដើម្បីផលប្រយោជន៍របស់ខ្លួនឡើយ»។
លើសពីនេះទៀតអ្នកស្រាវជ្រាវពីការអភិវឌ្ឍសង្គមរូបនេះ ក៏បានលើកជាឧទាហរណ៍ផងដែរថា ដូចជានៅប្រទេសអ៊ុយក្រែន ឃើញថានៅពេលមានអាសន្នមក ទាហានរបស់ប្រទេសនេះ មានសមត្ថភាពក្នុងការទទួលយកនូវបច្ចេកវិទ្យាថ្មីៗ និងផ្នែកខាងអាវុធទំនើបៗជាដើម។
លោកបានបន្ថែមថា បើមើលមកប្រទេសកម្ពុជា កងទ័ពភាគច្រើន គឺជាកងទ័ពដែលបន្តការងារពីការតស៊ូកាលពីសម័យសង្គ្រាម ដែលវ៉ៃគ្នាឯង ដូច្នេះហើយកងទ័ពទាំងនោះ មិនមានភាពជឿនលឿនខាងបច្ចេកវិទ្យាឡើយ។ ក្រៅពីនេះទៀត ការរើសកងទ័ពថ្មីនេះ វាក៏អាចជារឿងមួយដែលពាក់ព័ន្ធនឹងការបោះឆ្នោតជាតិខាងមុខដែរ ពីព្រោះបើរាជរដ្ឋាភិបាលយកប្រើប្រាស់ក្នុងគោលបំណងផ្ទាល់ខ្លួន ដូចជាបង្ក្រាបក្នុងពេលបោះឆ្នោត លោកថា គឺវាមិនត្រឹមត្រូវទេ។
ប្រទេសកម្ពុជា ក៏មានច្បាប់រួចហើយអំពីតួនាទីរបស់កងទ័ព ដូច្នេះមានតែមើលលើការអនុវត្តដែលច្បាប់បានចែងថា កងទ័ពជាកងទ័ពរបស់ជាតិ មិនមែនកងទ័ពរបស់បក្សឡើយ ហើយបក្ស ក៏មិនអាចមានកងទ័ពដាក់នៅក្រោមការបញ្ជារបស់ខ្លួនបានដែរ។ នេះបើតាមការបញ្ជាក់ពីលោកបណ្ឌិត មាស នី។
តាមរយៈលិខិតចុះថ្ងៃទី ១៤ ខែវិច្ឆិកាសម្ដេចតេជោនាយករដ្ឋមន្រ្តី ហ៊ុន សែន បានសម្រេចអនុញ្ញាតឱ្យក្រសួងការពារជាតិ ជ្រើសរើសសិស្ស-និស្សិតចំនួន ៦២០ នាក់ ក្នុងមានការជ្រើសរើសចូលនាយទាហានសកម្មចំនួន២០០នាក់ នៅសាលានាយទាហានសកម្ម និងចូលបណ្ដុះបណ្ដាលនាយទាហានទ័ពជើងគោកចំនួន២៥០នាក់ ហើយនិងនាយទាហានបន្តវេនចំនួន១៧០នាក់ នៅវិទ្យាស្ថានទ័ពជើងគោក ចាប់ពីឆ្នាំ២០២៣ តទៅ។
នៅក្នុងសេចក្ដីសម្រេចដដែលនេះ ក៏បានបញ្ជាក់ដែរថា គ្រប់ស្ថាប័នដែលទទួលបន្ទុកទាំងអស់ មានក្រសួងការពារជាតិ ក្រសួងសេដ្ឋកិច្ច និងហរិញ្ញវត្ថុ និងអគ្គមេបញ្ជាការ នៃកងយោធពលខេមរភូមិន្ទ ត្រូវអនុវត្តតាមសេចក្ដីសម្រេចដែលបានចុះហត្ថលេខានេះ៕
