បាងកក៖ ប្រទេសថៃ និងវៀតណាមបានបើកទំព័រថ្មីក្នុងភាពជាដៃគូយុទ្ធសាស្ត្ររបស់ពួកគេ ខណៈដែលមេដឹកនាំរបស់ពួកគេបានជួបគ្នា នៅមុនកិច្ចប្រជុំកំពូល Apec នៅចុងសប្តាហ៍នេះ នៅទីក្រុងបាងកក។

យោងតាមក្រសួងការបរទេសថៃបានឱ្យដឹងថា នាយករដ្ឋមន្ត្រី Prayut Chan-o-cha បានទទួលជួបលោកប្រធានាធិបតីវៀតណាម Nguyen Xuan Phuc នៅវិមានរដ្ឋាភិបាល ដើម្បីពិភាក្សាលើបញ្ហាជាច្រើនជុំវិញកិច្ចសហប្រតិបត្តិការសេដ្ឋកិច្ច នយោបាយ និងសន្តិសុខ។

សេចក្តីថ្លែងការណ៍របស់ក្រសួងបាននិយាយថា មេដឹកនាំទាំងពីរបានប្រគល់ភារកិច្ចឱ្យភ្នាក់ងារការពារជាតិ និងសន្តិសុខរបស់ពួកគេពង្រឹងកិច្ចសហប្រតិបត្តិការក្នុងក្របខ័ណ្ឌដែលមានស្រាប់ ដើម្បីរួមគ្នាដោះស្រាយបញ្ហាសន្តិសុខដែលកំពុងកើតមានលើដែនសមុទ្រ អ៊ីនធឺណិត និងឧក្រិដ្ឋកម្មឆ្លងដែន។

ស្តីពីកិច្ចសហប្រតិបត្តិការសេដ្ឋកិច្ច មេដឹកនាំទាំងពីរបានព្រមព្រៀងគ្នាពង្រឹងទំនាក់ទំនងលើគ្រប់វិស័យ សំដៅសម្រេចបាននូវគោលដៅពាណិជ្ជកម្មទ្វេភាគីចំនួន ២៥ ពាន់លានដុល្លារនៅឆ្នាំ ២០២៥។ ការងារនឹងត្រូវបានធ្វើឡើងដើម្បីសម្រួលនីតិវិធីនាំចូល-នាំចេញ កាត់បន្ថយរបាំងពាណិជ្ជកម្ម និងសម្រួលពាណិជ្ជកម្មឆ្លងដែន និងការដឹកជញ្ជូនទំនិញទៅកាន់ប្រទេសទីបី។

សេចក្តីថ្លែងការណ៍បានបន្ថែមថា ភាគីទាំងពីរក៏បានយល់ព្រមសហការលើវិស័យថ្មីនៃឱកាសសេដ្ឋកិច្ច ជាពិសេសសេដ្ឋកិច្ចឌីជីថល និងសេដ្ឋកិច្ចបៃតង ដែលពួកគេមានសក្តានុពលយ៉ាងសម្បើម។ មេដឹកនាំទាំងពីរបានសម្តែងការប្តេជ្ញាចិត្តរបស់ពួកគេក្នុងការពង្រឹងភាពជាដៃគូសេដ្ឋកិច្ចថៃ-វៀតណាម តាមរយៈយុទ្ធសាស្ត្រ “ការតភ្ជាប់បី” ដែលផ្តោតលើខ្សែសង្វាក់ផ្គត់ផ្គង់៕ ប្រភពពី The Nation, ដោយ៖ សារ៉ាត