ភ្នំពេញ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងជាប្រធានមហាសន្និបាតលើកទី៤៣ នៃអន្តរសភាអាស៊ាន បានថ្លែងក្នុងពីធីបិទមហាសន្និបាតអាយប៉ា លើកទី៤៣ នៅរាជធានីភ្នំពេញ នាព្រឹកថ្ងៃទី២៤ ខែវិច្ឆិកា ឆ្នាំ២០២២ ថា អាយប៉ា នៅតែមានសារៈសំខាន់ ក្នុងការកសាងភាពជាដៃគូជាមួយ ភាគីខាងក្រៅ ដើម្បីទទួលបាននូវកម្លាំងចលករថ្មីបន្ថែមទៀត។

សម្ដេច ហេង សំរិន បានថ្លែងអំណរគុណប្រតិភូទាំងអស់ ដែលផ្ដល់កិច្ចសហការយ៉ាងល្អ និងបានរួមវិភាគទានដ៏មានតម្លៃ រួមចំណែកដល់ភាពជោគជ័យនៃមហាសន្និបាតលើកទី៤៣ សម្រេចបាននូវលទ្ធផលគួរជាទីមោទនៈ ដែលយើងទទួលបាននូវកិច្ចពិភាក្សាប្រកបដោយគុណភាព បានអនុម័តនូវសេចក្តីសម្រេចយ៉ាងច្រើន និងបានបង្កើននូវចំណងមិត្តភាពជាមួយគ្នាយ៉ាងជិតស្និទ្ធ។

សម្ដេចប្រធានមហាសន្និបាតលើកទី៤៣ នៃអន្តរសភាអាស៊ាន បានបង្ហាញនូវសមិទ្ធផលសំខាន់ៗ ៨ចំណុច ដែលមហាសន្និបាតលើកទី៤៣ សម្រេចបានរួមមាន៖

ទី១- អាយប៉ា នៅតែមានសារៈសំខាន់ និងសមស្របក្នុងការកសាងភាពជាដៃគូជាមួយ ភាគីខាងក្រៅ ដើម្បីទទួលបាននូវកម្លាំងចលករថ្មីបន្ថែមទៀត។

ទី២- ការជឿជាក់ និងការយោគយល់គ្នាទៅវិញទៅមក ទាំងក្នុង និងរវាងគ្រួសារអាយប៉ា ព្រមទាំងជាមួយសភាសង្កេតការណ៍ ត្រូវបានពង្រឹងគួរជាទីកត់សម្គាល់។

ទី៣- យើងបានអនុម័តនូវសេចក្តីសម្រេចសំខាន់ៗជាច្រើនក្នុងក្របខណ្ឌវ៉ាយប៉ា វាយ-ភី-អ កិច្ចការនយោបាយ សេដ្ឋកិច្ច សង្គមកិច្ច និងការរៀបចំជាដើម។

ទី៤- យើងទាំងអស់គ្នាបានបង្ហាញច្បាស់ ពីស្មារតីនៃសាមគ្គីភាព ឯកភាព និងមជ្ឈភាពអាស៊ាន ត្រូវបានពង្រឹងជាលំដាប់។

ទី៥- យើងបានបង្ហាញច្បាស់ថា គោលការណ៍នៃការប្រឹក្សាយោបល់ និងការធ្វើសេចក្តី សម្រេចចិត្តដោយផ្អែកលើមូលដ្ឋានកុងសង់ស៊ីស ចំពោះមជ្ឈភាព និងឯកភាពរបស់អាស៊ាន។

ទី៦- អាយប៉ា ជាស្ថាប័ននីតិប្បញ្ញត្តិ តំណាងឱ្យប្រជាពលរដ្ឋនៃតំបន់អាស៊ីអាគ្នេយ៍ តំណាងឱ្យឆន្ទៈ និងផលប្រយោជន៍នៃប្រជាពលរដ្ឋជាង ៦៥០លាននាក់ ក្នុងតំបន់អាស៊ីអាគ្នេយ៍បានដើរតួនាទីដ៏សំខាន់ ក្នុងការសម្រេចបាននូវសហគមន៍អាស៊ាន ដែលផ្តោតលើប្រជាពលរដ្ឋ និងយក ប្រជាពលរដ្ឋជាគោល។

ទី៧- លទ្ធផលដែលមហាសន្និបាតអាយប៉ាលើកទី៤៣ សម្រេចបាន នឹងត្រូវបានយកទៅអនុវត្តចេញជាសកម្មភាពជាក់ស្ដែង ហើយសង្ឃឹមថា យើងទាំងអស់ គ្នា នឹងខិតខំឱ្យអស់ពីសមត្ថភាពដើម្បីបម្រើផលប្រយោជន៍ប្រជាពលរដ្ឋរបស់យើង។

ទី៨- ដំណើរឆ្ពោះទៅមុខរបស់អាយប៉ា នឹងមិនអាចធ្វើបានដោយរលូន និងជោគជ័យបានឡើយ ប្រសិនបើគ្មានការតាំងចិត្តនិងការលះបង់ខ្ពស់របស់ថ្នាក់ដឹកនាំ និងយើងគ្រប់ៗគ្នា។ ក្នុងន័យនេះ សម្ដេច សូមប្រកាស និងអបអរសាទរដល់ឥស្សរជនឆ្នើមចំនួន៣រូប ដែលទទួលបានពានកិត្តិយសអាយប៉ា សម្រាប់ស្នាដៃឆ្នើមក្នុងការបម្រើការងារអាយប៉ានាពេល កន្លងមក ក្នុងនោះបុគ្គលឆ្នើម រួមមាន៖ លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២នៃរដ្ឋសភា និងជាប្រធានកិច្ចប្រជុំវ៉ាយប៉ា, លោកជំទាវ រ៉ូស ម៉ារៀ អារីណា អតីតអនុប្រធាសភាហ្វីលីពីន និងឯកឧត្តម ប៉េហីន ដាតូ អាប់ឌុលរ៉ាម៉ាន តាអ៊ីប ប្រធានសភាពនៃប្រទេសប្រុយណេដារ៉ូសាឡាម ៕ ដោយ ៖ វណ្ណលុក និង ពិសិដ្ឋ