ភ្នំពេញ៖អាជ្ញាធរមីន និងអង្គការជំនួយនៃប្រជាពលរដ្ឋន័រវេស (NPA) ចុះអនុស្សរណៈយោគយល់គ្នា លើគម្រោងអភិវឌ្ឍ សមត្ថភាព ក្នុងសកម្មភាពមីន ដែលមានថវិកាសរុប ១៧២.៧៩១ ដុល្លារអាមេរិក។ពិធីចុះហត្ថលេខាបាន ធ្វើឡើង កាលពីព្រឹកថ្ងៃទី១២ ខែមករា ឆ្នាំ២០២៣ នៅទីស្នាក់ការ អាជ្ញាធរមីន។

ហត្ថលេខីគឺឯកឧត្តម លី បញ្ញារិទ្ធិ៍ អគ្គលេខាធិការអាជ្ញាធរមីន និងលោក Rune Dale-Andresen នាយកអង្គការ NPA ប្រចាំកម្ពុជា ក្រោមអធិបតីភាពរបស់ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន។

តាមស្មារតីនៃអនុស្សរណៈគម្រោងអភិវឌ្ឍន៍សមត្ថភាពក្នុងសកម្មភាពមីនបានគ្របដណ្តប់លើការអនុវត្តសកម្មភាពធំៗចំនួនបី រួមមាន៖ សមត្ថភាពរបស់អង្គភាពទិន្នន័យ, សមត្ថភាពរបស់ ក្រុមត្រួតពិនិត្យគុណភាព និងសមត្ថភាពលើការរៀបចំផែនការ យុទ្ធសាស្រ្ត ។

ក្នុងឱកាសនេះឯកឧត្តម លី ធុជ បានកោតសរសើរយ៉ាងខ្លាំង ចំពោះការប្តេជ្ញាចិត្តរបស់អង្គការ NPA ក្នុងការបន្តខិតខំធ្វើឱ្យ ប្រទេសកម្ពុជាគ្មានមីននៅឆ្នាំ២០២៥ និងកាត់បន្ថយផល ប៉ះពាល់ នៃគ្រាប់បែកចង្កោម និងសំណល់ជាតិផ្ទុះផ្សេងទៀត នៃសង្គ្រាម។ ការប្តេជ្ញាចិត្តនេះ ស្របតាមកិច្ចខិតខំប្រឹងប្រែង របស់រាជរដ្ឋាភិបាលកម្ពុជា សម្រាប់ការកម្ចាត់មីនកម្ពុជា ឆ្នាំ២០២៥ ដូចដែលបានបញ្ជាក់ជាថ្មីដោយសម្ដេចតេជោ ហ៊ុន សែន នាយករដ្ឋមន្ត្រីរបស់កម្ពុជានាពេលថ្មីៗនេះ។

ឯកឧត្តម លី ធុជ បានថ្លែងថា ៖ «ថ្ងៃនេះ យើងបានចុះ ហត្ថលេខា លើអនុស្សរណៈ(MoU) រវាងអាជ្ញាធរមីន និងអង្គការ NPA ដើម្បីធ្វើជាសាក្សីពីការគាំទ្រផ្នែកហិរញ្ញវត្ថុ និងបច្ចេកទេសរបស់ NPA ដល់ អាជ្ញាធរមីន និងការប្តេជ្ញា ចិត្តរបស់អាជ្ញាធរមីន ក្នុងការប្រើប្រាស់ជំនួយហិរញ្ញវត្ថុ យ៉ាងត្រឹមត្រូវជាមួយនឹងការទទួលខុសត្រូវពេញលេញ»។ លោកជឿជាក់យ៉ាងមុតមាំថា យើងនឹងអាចប្រើប្រាស់មូលនិធិ នេះដើម្បីដោះស្រាយតម្រូវការបច្ចុប្បន្នរបស់យើងប្រកបដោយប្រសិទ្ធភាព ហើយជាពិសេសពង្រឹងសមត្ថភាពសំខាន់ របស់ យើងក្នុងការគ្រប់គ្រងគុណភាព និងការគ្រប់គ្រងព័ត៌មាន»។
អនុប្រធានទី១ អាជ្ញាធរមីន រូបនេះ បានបញ្ជាក់ដែរថា មូលនិធិនេះនឹងត្រូវបានប្រើប្រាស់ក្នុងការគាំទ្រការគ្រប់គ្រងចំណេះដឹងអាជ្ញាធរមីន ដើម្បីបង្កើនសមត្ថភាពរបស់អាជ្ញាធរមីន ក្នុងការគ្រប់គ្រងកិច្ចសហប្រតិបត្តិការខាងត្បូង-ខាងត្បូង និងសកម្មភាពផ្សេងទៀតដែលទាក់ទងនឹងការរៀន និងការ ចែករំលែកចំណេះដឹងអំពីសកម្មភាពមីន។

ឯកឧត្តម លី ធុជ ស្នើសុំឱ្យអង្គការ NPA ពិចារណាពីការប្តេជ្ញា ចិត្តរបស់ខ្លួនក្នុងការគាំទ្រសមត្ថភាពអាជ្ញាធរមីន រហូតដល់ឆ្នាំ ២០២៥ និងអាចលើសពីនេះផងដែរ។លោកបានបញ្ជាក់ថា ព្រឹត្តិការណ៍បន្ទាប់របស់អាជ្ញាធរមីន បន្ទាប់ពីកម្ពុជាគ្មានមីន នៅឆ្នាំ២០២៥ គឺការបន្តដោះស្រាយហានិភ័យដែល នៅសេស សល់នៃសំណល់ជាតិផ្ទុះនៃសង្គ្រាម (ERW) រួមទាំងការបំពុល សំណល់នៃគ្រាប់បែកចង្កោម ដែលកំពុងបន្តជះឥទ្ធិពល ដល់ ជីវិតរបស់ប្រជាជនកម្ពុជា និងរារាំងដល់ការអភិវឌ្ឍប្រទេស។

សូមបញ្ជាក់ថា អង្គការជំនួយនៃប្រជាពលរដ្ឋន័រវេស (NPA) គឺជាដៃគូយុទ្ធសាស្ត្រ និងយូរអង្វែងគាំទ្រដល់សមត្ថភាព ចាំបាច់របស់អាជ្ញាធរមីនកម្ពុជា ចាប់តាំងពីឆ្នាំ២០១៤។ ការគាំទ្រនេះអាចធ្វើទៅបានតាមរយៈការគាំទ្រផ្នែកហិរញ្ញវត្ថុដ៏សប្បុរសរបស់រដ្ឋាភិបាលចក្រភពអង់គ្លេស-បរទេស Commonwealth & Development ការិយាល័យ (FCDO) និងក្រសួងការបរទេសន័រវេស (NMFA) តាមរយៈអង្គការ NPA Cambodia ក្នុងគោលបំណងធានាថា អាជ្ញាធរមីន មានសមត្ថភាព និងរឹងមាំក្នុងការគ្រប់គ្រង និង សម្របសម្រួលសកម្មភាពមីននៅកម្ពុជាប្រកបដោយប្រសិទ្ធភាព៕
ដោយ៖ជា សុខនី