កៀវ៖ សមាជិកសភាជាន់ខ្ពស់មួយរូបបាននិយាយនៅថ្ងៃអាទិត្យសប្តាហ៍មុនថា រដ្ឋមន្ត្រីការពារជាតិអ៊ុយក្រែន លោក អូឡិចស៊ី រ៉េសនីកូវ នឹងត្រូវជំនួសដោយប្រធានចារកម្មយោធា មុនពេលការវាយលុកថ្មីរបស់រុស្ស៊ីដែលរំពឹងទុក និងបន្ទាប់ពីមានរឿងអាស្រូវពុករលួយ។

សមាជិកសភាជាន់ខ្ពស់ដែលស្និទ្ធនឹងលោក ហ្សេលេនស្គី បាននិយាយថា លោក រ៉េសនីកូវ មានអាយុ ៥៦ឆ្នាំ ដែលជាបុគ្គលមានមុខមាត់ដ៏ល្បីម្នាក់នៅក្នុងកិច្ចខិតខំប្រឹងប្រែងជួយសង្រ្គាមរបស់ប្រទេសអ៊ុយក្រែននឹងត្រូវជំនួស។ សមាជិកសភាអ៊ុយក្រែន លោក ដេវីដ អារ៉ាក់ខាមៀ បានបញ្ជាក់ថា លោក គីរីឡូ ប៊ូដាណូវ ដែលជាប្រធានចារកម្មយោធាមានវ័យ ៣៧ឆ្នាំ នឹងដឹកនាំក្រសួងការពារជាតិ ដែលនេះពិតជាសមហេតុផលក្នុងសម័យសង្រ្គាម។

ដោយកាន់ឋានន្តរស័ក្តិឧត្តមសេនីយ លោក ប៊ូដាណូវ បានដឹកនាំផ្នែកចារកម្មយោធាចាប់តាំងពីខែសីហា ឆ្នាំ២០២០។ ជាមួយគ្នានេះ លោក អារ៉ាក់ខាមៀ ក៏បានអះអាងដែរថា បន្ទាប់ពីដកតំណែង លោក រ៉េសនីកូវ នឹងត្រូវបានតែងតាំងជារដ្ឋមន្ត្រីឧស្សាហកម្មយុទ្ធសាស្ត្រ។

គួរបញ្ជាក់ថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបញ្ជាក់ថា ក្នុងសប្តាហ៍នេះ រូបលោកចង់ឱ្យកិច្ចពិភាក្សាស្តីពីសមាជិកភាពរបស់អ៊ុយក្រែននៅក្នុងសហភាពអឺរ៉ុបចាប់ផ្តើមនៅឆ្នាំ២០២៣នេះ ដោយបង្កើនការប្រយុទ្ធប្រឆាំងនឹងអំពើពុករលួយ៕ ប្រភព៖ AFP ប្រែសម្រួលដោយ៖ ទីណា