ភ្នំពេញ ៖ សម្តេច នាយករដ្ឋមន្ត្រី ហ៊ុន សែន បានស្នើឱ្យក្រសួងអប់រំ យុវជន និងកីឡា ធ្វើការពិភាក្សា ក៏ដូចជាសហការក្នុងការផ្តល់វគ្គបណ្តុះបណ្តាលវិជ្ជាជីវៈចំណេះដឹង បែបប្រពៃណីដូនតា ដល់សិស្ស និស្សិតក្រីក្រ ចំនួនជាង ១លាន៥សែននាក់ ក្នុងគោលដៅសេដ្ឋកិច្ចជាតិពឹងផ្អែកចំណេះដឹង ដែលផ្តើមធ្វើក្នុងក្របខណ្ឌវិជ្ជាជីវៈឆ្នាំ២០២៤។

ថ្លែងក្នុង ពិធីប្រគល់សញ្ញាបត្រដល់និស្សិតនៃសាកលវិទ្យាល័យធនធានមនុស្ស នាថ្ងៃទី២០ ខែកុម្ភៈ សម្តេចនាយករដ្ឋមន្ត្រី ហ៊ុន សែន បានស្នើ ដោយត្រង់ទៅ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ឱ្យចាប់ផ្តើម ពិភាក្សាជាមួយនឹងក្រសួងសេដ្ឋកិច្ច និងហិរញ្ញវត្ថុ និងក្រសួងការងារ និងបណ្តុះបណ្តាលវិជ្ជាជីវៈ គោលដៅដើម្បីបណ្តុះបណ្តាលវិជ្ជាជីវៈដូនតានដល់ ដល់សិស្សក្រីក្រ ១ លាន ៥សែននាក់។

សម្តេច នាយករដ្ឋមន្ត្រីបានបន្តថា សិស្សក្រីក្រទាំងនេះឱ្យរៀន វិជ្ជាជីវៈដូនតា ក្នុងរង្វង់ ពី ២% ទៅ ៤% ដែលជំនាញទាំងនោះមានដូចជា ផ្នែក តម្បាញ ចម្លាក់ គំនូរ ស្មូមឆ្នាំង និង ជំនាញដូនតាផ្សេងៗទៀត បន្ថែមលើវិជ្ជាជីវៈ មួយ ចំនួនដែលត្រូវបានបណ្តុះបណ្តាលរួចហើយ។

សម្តេចនាយករដ្ឋមន្ត្រីថ្លែងថា ៖ «អីចឹងទេ អាចពង្រាយការបណ្តុះបណ្តាលនេះ មួយផ្នែក ឱ្យសាលាដែល គ្រប់គ្រង់ដោយវិជ្ជាជីវៈ ដែលគ្រប់គ្រងដោយក្រសួងការងារ និងបណ្តុះបណ្តាលវិជ្ជាជីវៈ និងមួយផ្នែកមរតក ដូនតា ដែ គ្រប់គ្រងដោយក្រសួងវប្បធម៌ និងវិចិត្រ សិល្បៈ»។
បើតាម សម្តេចនាយករដ្ឋមន្ត្រី ហ៊ុន សែន សិស្សក្រីក្រដែលទទួលបានការបណ្តុះបណ្តាលវិជ្ជាជីវៈនេះ នឹងមិនតម្រូវឱ្យបង់ថ្លៃសាលានោះទេ ប៉ុន្តែ ថែមទាំងទទួលបានការឧបត្ថម្ភពីរដ្ឋថែមទៀតផង។ ជាមួយគ្នានេះ សម្តេចនាយករដ្ឋមន្ត្រី ក៏បានស្នើឱ្យឯកឧត្តម ហង់ជួន ណារ៉ុងពិនិត្យមើលទៅ លើចំនួនសាលាដែលបានកំពុង បណ្តុះបណ្តាលវិជ្ជាជីវៈ ជូនដល់សិស្សនាពេលពេលបច្ចុប្បន្ន ដើម្បីលើកទឹកចិត្ត ឱ្យបន្តបណ្តុះបណ្តាល ថែមទៀត។

សម្តេចនាយករដ្ឋមន្ត្រីបញ្ជាក់ទៀតថា ការបណ្តុះបណ្តាលជំនាញវិជ្ជាជីវៈនេះ ដើម្បីឱ្យពលរដ្ឋជាសិស្ស ក្រីក្រ នៅក្នុងប្រទេសមានវិជ្ជាជីវៈត្រឹមត្រូវ ដើម្បីបំរើឱ្យការអភិវឌ្ឍន៍ ដែលកាន់តែលឿន ក្នុងគោលដៅសេដ្ឋជាតិពឹងផ្អែកចំណេះដឹង ដែលផ្តើមធ្វើក្នុងក្របខណ្ឌវិជ្ជាជីវៈឆ្នាំ២០២៤។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា មិនអាចស្នើសុំធ្វើអត្ថាធិប្បាយបន្ថែមទាក់ទងនឹង ចំណុចនេះ បានទេនៅថ្ងៃទី២០ ខែកុម្ភៈ ៕ ដោយ ៖ យុទ្ធ វីរៈ