ភ្នំពេញ៖ សហព័ន្ធកីឡាអេឡិចត្រូនិកកម្ពុជា (EFC) និងក្រុមហ៊ុនអភិវឌ្ឍកីឡាអេឡិចត្រូនិកអន្តរជាតិ MOONTON Games បានចុះហត្ថលេខាលើអនុស្សរណៈ នៃការយោគយល់គ្នា (MoU) ដើម្បីកិច្ចសហប្រតិបត្តិការអភិវឌ្ឍវិស័យកីឡា Esports នៅកម្ពុជា និងរៀបចំការព្រឹត្តិការណ៍ពានរង្វាន់អាស៊ីអាគ្នេយ៍ឆ្នាំ២០២៣។ ពិធីនេះធ្វើកាពីនាថ្ងៃទី១៤ ខែមីនា ឆ្នាំ២០២៣ នៅក្រសួងព័ត៌មាន។

ការចុះហត្ថលេខានេះ ក្នុងបំណងបង្កើតមូលដ្ឋានគ្រឹះ នៃភាពជាដៃគូរវាងសហព័ន្ធ និងក្រុមហ៊ុន MOONTON ហើយជាផ្នែកមួយ នៃការរួមគ្នាក្នុងការអភិវឌ្ឍឧស្សាហកម្មកីឡាអេឡិចត្រូនិកក្នុងស្រុក និងបង្កើតឲ្យមានព្រឹត្តិការណ៍ ថ្មីៗបន្ថែមទៀតសម្រាប់កីឡាករ កីឡាការិនីអាជីពកម្ពុជា។ លោក Ray Ng មានប្រសាសន៍ថា ៖«ជោគជ័យនៃការប្រកួត MPL Cambodia បានជួយពង្រឹងលើការអភិវឌ្ឍវិស័យ Esports នៅកម្ពុជា។ យើងខ្ញុំទន្ទឹងរង់ចាំនាំមកនូវព្រឹត្តិការណ៍ MSC 2023 ដើម្បីផ្តល់ឱកាសដ៏អស្ចារ្យបន្ថែមទៀតដល់អត្តពលិកកម្ពុជាដែលមានទេពកោលសល្យ។ យើងពិតជារីករាយក្នុងការបង្ហាញអត្តពលិកកម្ពុជាដ៏មានសក្តានុពលទៅកាន់ឆាកអន្តរជាតិ»។

ប្រធានសហព័ន្ធកីឡាអេឡិចត្រូនិច ឯកឧត្តម ជា ច័ន្ទបរិបូណ៌ មានប្រសាសន៍ថា ៖«អ្វីដែលគួរឲ្យចាប់អារម្មណ៍ ឆ្នាំ២០២៣នេះ MOONTON GAMES បានសហការជាមួយកម្ពុជា រៀបចំព្រឹត្តិការណ៍ដ៏ធំមួយនៅភ្នំពេញ ខណៈកម្ពុជាមានកីឡាករ កីឡាការិនី និងអ្នកគាំទ្រលើវិញ្ញាសា Mobile Legends Bang Bang នេះយ៉ាងច្រើនសន្ធឹកសន្ធាប់។ ឯកឧត្តម បន្តថា នេះជាឱកាសធ្វើជាម្ចាស់ផ្ទះរៀបចំព្រឹត្តិការណ៍លំដាប់អន្តរជាតិដ៏ធំមួយនេះ គឺស្តែងអោយឃើញពីការអភិវឌ្ឍរបស់កម្ពុជា លើវិស័យកីឡាអេឡិចត្រូនិក ដោយឈរលើមូលដ្ឋាន នៃកត្តាសុខសន្តិភាព សុខសុវត្ថិភាព ជាពិសេសលុបបំបាត់ស្ទើរទាំងស្រុងនៃជំងឺកូវីដ-១៩។

គួរបញ្ជាក់ថា ព្រឹត្តិការណ៍ MSC ឆ្នាំ២០២៣ គ្រោងនឹងចាប់ពីថ្ងៃទី១០ ដល់ថ្ងៃទី១៨ ខែមិថុនា ឆ្នាំ២០២៣ ខាងមុខនេះ ដោយមានក្រុមអាជីពចំនួន១២ មានកម្ពុជា ឥណ្ឌូនេស៊ី ម៉ាឡេស៊ី សឹង្ហបុរី ហ្វីលីពីន វៀតណាម ឡាវ ថៃ អាមេរិកខាងជើង និងប្រទេសមជ្ឈិមបូព៌ា អាហ្រ្វិកខាងជើង និងតួគី ចូលរួម៕

ចាន់ វិចិត្រ