ភ្នំពេញ៖ក្រុមប្រឹក្សាជាតិប្រឆាំងអំពើពុករលួយដែលបានបើកកិច្ច ប្រជុំ នា រសៀលថ្ងៃទី ២៤ ខែមីនា ឆ្នាំ ២០២៣នេះបានឱ្យដឹងថា ក្នុងខែមីនានេះ អង្គភាពប្រឆាំងអំពើពុករលួយបានទទួលមន្រ្តីប្រកាសទ្រព្យសម្បត្តិ និងបំណុល៤៧៥ នាក់និងដោយឡែកចំពោះពាក្យប្តឹងវិញមាន ចំនួន សរុប៤៩។

យោងតាមសេចក្តីប្រកាសព័ត៌មានរបស់ក្រុមប្រឹក្សាជាតិប្រឆាំងអំពើពុករលួយ បានឱ្យដឹងថា សម្រាប់ការងារប្រកាសទ្រព្យសម្បត្តិ និងបំណុល ក្នុង ខែមីនាឆ្នាំ ២០២៣មានមន្រ្តីចំនួន ៤៧៥ នាក់ បានមកប្រកាស ទ្រព្យសម្បត្តិ និងបំណុល ក្នុងនោះមន្ត្រីទើបទទួលបានការតែងតាំងថ្មីចំនួន ៣៩៩ នាក់។

ប្រភពដដែលបញ្ជាក់បន្ថែមថាក្រៅពីការប្រកាសទ្រព្យសម្បត្តិនៅក្នុងខែដដែលនេះប្រធានអង្គភាពប្រឆាំងអំពើពុករលួយក៏បាន សម្រេចបើក មើល ឯកសារ ទ្រព្យសម្បត្តិ និងបំណុល តាមសំណូមពរស៊ើបអង្កត ចំនួនពីរ ករណីផងដែរ។

ទន្ទឹមនេះសម្រាប់ ពាក្យប្ដឹងក្នុងខែនេះមាន ចំនួន សរុប៤៩ ពាក្យប្ដឹង។

អង្គភាពប្រឆាំងអំពើពុករលួយបានឱ្យដឹងបន្ថែមថាក្នុងខែដដែលនេះ អង្គភាព មួយនេះក៏បានចុះផ្សព្វផ្សាយអំពីច្បាប់បានមួយ វគ្គដែល ជាការ ផ្សព្វផ្សាយស៊ីជម្រៅ និង ដើម្បីបញ្ចប់ពាក្យប្ដឹងនៅសាលាស្រុកបរសេដ្ឋ ខេត្តកំពង់ស្ពឺ ដែលមានអ្នកពាក់ព័ន្ធចូលរួមចំនួន ១១១ នាក់។

ក្រៅពីនេះនេះអង្គភាពប្រឆាំងអំពើពុករលួយក៏បាន ចុះសង្កេតការណ៍ ប្រឡងជ្រើសរើសនិស្សិតចូលសិក្សានៅតាមគ្រឹះស្ថានបណ្តុះបណ្តាលវិស័យសុខា ភិបាល ឃើញថាការប្រឡងបានដំណើរការដោយត្រឹមត្រូវ យុត្តិធម៌ និងមានតម្លាភាព។ ការចុះសង្កត ការណ៍លទ្ធកម្មសាធារណៈមានចំនួន ១៦៧ គម្រោង របស់អង្គភាពលទ្ធកម្មចំនួន ៥៤ អង្គភាព។

អង្គភាពប្រឆាំងអំពើពុករលួយ ក៏បានចាត់កម្លាំងជំនាញចុះពិនិត្យ វាស់ វែងសាឡង់ដឹកខ្សាច់នៅខេត្តកណ្តាល និងខេត្តព្រៃវែង ជូនក្រសួង សេដ្ឋកិច្ច និងហិរញ្ញវត្ថុផងដែរ៕
ដោយ៖ម៉ាដេប៉ូ