ភ្នំពេញ៖ សម្ដេចតេជោ ហ៊ុន សែន បានថ្លែងថា គោលនយោបាយដ៏សំខាន់មួយរបស់គណបក្សប្រជាជនកម្ពុជា គឺការគាំពារសង្គមលើស្រ្តី និងកុមារ ។ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងដូចនេះ ក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសម្ភព នៃមន្ទីរពេទ្យកុមារជាតិ នៅព្រឹកថ្ងៃទី២០ ខែមេសា ឆ្នាំ២០២៣ ។

សម្តេចតេជោ ហ៊ុន សែន បានប្រកាសថា ការពង្រឹងសមត្ថភាព វិស័យសុខាភិបាល គឺជាកត្តាចាំបាច់ខ្លាំងណាស់ ដើម្បីកសាង និងធ្វើម៉េចឱ្យប្រជាពលរដ្ឋ ទទួលសេវាសុខភាព ក្នុងនោះ មានការបង្កើនការព្យាបាលស្រ្ដី និងកុមារ ។

សម្ដេច បានបញ្ជាក់ថា គោលនយោបាយគាំពារសង្គមទៅលើស្ត្រីក្រីក្រ ដែលមានផ្ទៃពោះ ចាប់ពីពេលមានផ្ទៃពោះ រហូតដល់ឆ្លងទន្លេ និងរហូតដល់អាយុ ២ឆ្នាំ គឺជាគោលនយោបាយដ៏សំខាន់មួយរបស់ គណបក្សប្រជាជនកម្ពុជាំ ដែលនឹងបន្ត ហើយពង្រីកទំហំនៃប្រាក់ ដែលត្រូវទទួលបានសម្រាប់ស្ត្រីទាំងអស់ ព្រោះវាជាបញ្ហាមនុស្សម្នាក់ជីវិត២ នៅទីនេះ៕

អត្ថបទ៖ ស៊ូ វណ្ណលុក, រូបភាព៖ វ៉េង លីមហួត និង សួង ពិសិដ្ឋ