ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា អនុញ្ញាតឱ្យលោក Lan Tianli អភិបាលតំបន់ស្វយ័តជនជាតិជាំង ខេត្តក្វាងស៊ី នៃសាធារណរដ្ឋប្រជាមានិតចិន ចូលជួបសំដែងការគួរសម និងពិភាក្សាការងារ នៅវិមានសន្តិភាព រាជធានីភ្នំពេញ នារសៀលថ្ងៃទី២០ ខែមេសា ឆ្នាំ២០២៣។

ឯកឧត្តម ធានលី បានគោរពជូនពរសម្ដេចតេជោ សូមឱ្យទេវតាឆ្នាំថ្មី តាមជួយបីបាច់ថែរក្សា និងប្រសិទ្ធិពរជ័យបវរមហាប្រសើរជូនសម្ដេចតេជោ និងសូមឱ្យសម្ដេចតេជោ មានសុខភាពល្អបរិបូរណ៍ កម្លាំងមាំមួន ជន្មាយុឺនយូរ វិបុលសុខនិងសេរីជ័យមង្គល និងសូមគោរពវាយតម្លៃខ្ពស់ចំពោះការអភិវឌ្ឍន៍របស់កម្ពុជា។

ឯកឧត្តមធានលី បានមានប្រសាសន៍ថា ឯកឧត្តមបានមកកម្ពុជា កាលពីឆ្នាំ២០១៦ ដែលពេលនេះ កម្ពុជា មានការរីកចម្រើនយ៉ាងខ្លាំង មានអាគារខ្ពស់ៗ និងប្រជាជនមានជីវភាពធូរធារ និងរីករាយ , ឯកឧត្តមធានលី សូមគោរពអបអរសាទរ ។

ឯកឧត្តម ធានលី ក៏បានគោរពជម្រាបជូន សម្ដេចតេជោថា ដំណើរទស្សនកិច្ចរបស់ឯកឧត្តម មកកាន់ព្រះរាជាណាចក្រកម្ពុជានៅពេលនេះ គឺមានបំណង៣, ទី១ គឺ គោរពថ្លែងអំណរគុណជូនចំពោះសម្ដេចតេជោដោយផ្ទាល់ ដែលដរាបរៀងមក បានគាំទ្រតំបន់ ស្វយ័តក្វាងស៊ី ជាពិសេសគាំទ្រការរៀបចំពិព័រណ៍ចិន អាស៊ាន នៅទីក្រុងណានីង។ ទី២ ជំរុញការអនុវត្តកិច្ចព្រមព្រៀងរវាងថ្នាក់ដឹកនាំកំពូលរបស់ចិននិងកម្ពុជា ជាពិសេស ការកសាងសហគមន៍ជោគវាសនារួមចិន កម្ពុជា និងទី៣ គោរពសុំអនុសាសន៍ដ៏ខ្ពង់ខ្ពស់ ពីសម្ដេចតេជោ ដើម្បីពង្រឹងកិច្ចសហប្រតិបត្តិការ រវាងប្រទេសទាំងពីរឲ្យ កាន់តែរឹងមាំថែមទៀត។

ជាការឆ្លើយតប សម្រេចតេជោ ហ៊ុន សែន បានឯកភាព និងថ្លែងអំណរគុណ ចំពោះការ វាយតម្លៃលើទំនាក់ទំនងរវាង ប្រទេសទាំងពីរកម្ពុជាចិន ។

សម្ដេចតេជោ បានផ្ដល់អនុសាសន៍ឲ្យឯកឧត្តមធានលី បន្តកិច្ចសហប្រតិបត្តិការដែលមានស្រាប់ ឱ្យកាន់តែស៊ីជម្រៅនិងអនុវត្តកិច្ចព្រមព្រៀង ដែលមានស្រាប់ដែរនោះ ឲ្យបានគ្រប់ជ្រុងជ្រោយ ៕ អត្ថបទ៖ ស៊ូ វណ្ណលុក, រូបភាព៖ វ៉េង លីមហួត និង សួង ពិសិដ្ឋ