ភ្នំពេញ៖ ថ្លែងក្នុងពិធីសំណេះ សំណាលជាមួយនិស្សិតអាហារូបករណ៍ទេពកោសល្យឌីជីថលតេជោឆ្នាំសិក្សា ២០២២-២០២៣ ចំនួន៣១៤នាក់ នារសៀលថ្ងៃទី៣ ខែឧសភា ឆ្នាំ២០២៣ នៅទីស្តីការក្រសួង ឯកឧត្តមជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍មានប្រសាសន៍ថា ក្រោមការយកចិត្តទុកដាក់ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការកសាងធនធានមនុស្សឆ្នើម ក្នុងយុគសម័យឌីជីថល ដើម្បីជំរុញកំណើនសេដ្ឋកិច្ច និងលើកកម្ពស់ សុខុមាលភាពសង្គម ។

ឯកឧត្តមបន្តថា សម្តេចតេជោនាយករដ្ឋមន្ត្រី បានផ្តល់អាហារូបករណ៍ទេពកោសល្យឌីជីថល ផ្តល់ជូននិស្សិតឆ្នើមដើម្បីបង្កើនសមត្ថភាពធនធានមនុស្សជំនាញបច្ចេកវិទ្យាឌីជីថល ក្នុងការចូលរួមអភិវឌ្ឍសេដ្ឋកិច្ចនិងសង្គមឌីជីថល និងរដ្ឋាភិបាលឌីជីថល។

ជាមួយគ្នានេះ ឯកឧត្ដមរដ្ឋមន្ត្រី បានអបអរសាទរជាថ្មីម្ដងទៀត ចំពោះនិស្សិតពូកែទាំង ៣១៤នាក់ ដែលទទួលបានអាហារូបកណ៍ដ៏ពិសេសនេះ។ បន្ថែមលើនេះ ឯកឧត្តមរដ្ឋមន្ត្រី បានណែនាំដល់និស្សិតទាំងអស់ត្រៀមលក្ខណៈឱ្យបានល្អ ត្រូវផ្តោតការយកចិត្តទុកដាក់រៀនសូត្រឱ្យពូកែ និងធ្វើការស្រាវជ្រាវផ្សារភ្ជាប់នឹងការអនុវត្តជាក់ស្ដែងឱ្យបានច្រើនដើម្បីក្លាយជាធនធានមនុស្សឆ្នើមក្នុងវិស័យបច្ចេកវិទ្យាឌីជីថល ហើយក្លាយខ្លួនជាអ្នកដឹកនាំលើវិស័យនេះ។

ឯកឧត្តមរដ្ឋមន្ត្រី មានសង្ឃឹមនិងជឿជាក់យ៉ាងមុតមាំថា ក្មួយៗនឹងខិតខំរៀនសូត្រ អភិវឌ្ឍចំណេះដឹងរបស់ខ្លួន ដើម្បីចូលរួមចំណែកអភិវឌ្ឍកម្ពុជាឆ្ពោះទៅសម្រេចបានបរិវត្តកម្មឌីជីថលនៅកម្ពុជានាពេលអនាគត។

ឯកឧត្តម រដ្ឋមន្រ្តី ជា វ៉ាន់ដេត គួសបញ្ជាក់ផងដែរថា “អាហារូបករណ៍ទេពកោសល្យឌីជីថលតេជោ” មានតួនាទីសំខាន់សម្រាប់អភិវឌ្ឍធនធានមនុស្សឆ្នើម ក្នុងយុគសម័យឌីជីថល ដើម្បីជំរុញកំណើនសេដ្ឋកិច្ច និងលើកកម្ពស់សុខុមាលភាពសង្គម។

គួរបញ្ជាក់ផងដែរថា និស្សិតអាហារូបករណ៍ទេពកោសល្យឌីជីថលតេជោឆ្នាំសិក្សា ២០២២-២០២៣ ចំនួន៣១៤នាក់ កំពុងសិក្សាឆ្នាំទី១ នៅ គ្រឹះស្ថានឧត្តមសិក្សាចំនួន៥ គឺបណ្ឌិត្យសភាបច្ចេកវិទ្យាឌីជីថលកម្ពុជា (CADT) សាកលវិទ្យាល័យភូមិន្ទភ្នំពេញ (RUPP) វិទ្យាស្ថានបច្ចេកវិទ្យាកម្ពុជា (ITC) សាកលវិទ្យាល័យអាមេរិកាំងភ្នំពេញ (AUPP) និងសាកលវិទ្យាល័យអន្តរជាតិផារ៉ាហ្គន (Paragon) ។

ក្នុងឱកាសនព ឯកឧត្តមរដ្ឋមន្ត្រី បានប្រគល់រង្វាន់លើកទឹកចិត្តដល់ក្រុមនិសិ្សតដែលទទួលបានជ័យលាភីក្នុងកម្មវិធីប្រកួតប្រជែងថ្នាក់ជាតិ និងថ្នាក់តំបន់ ដែលរួមមាន ពានរង្វាន់បច្ចេកវិទ្យាវាស់ស្ទង់កម្ពស់ទឹកក្នុងកម្មវិធីប្រកួតប្រជែងបច្ចេកវិទ្យារបស់គណៈកម្មការទន្លេមេគង្គ ពានរង្វាន់កម្មវិធីប្រកួត ធុរកិច្ចថ្មីឌីជីថល SmartStart 2023 និងពានរង្វាន់កម្មវិធីប្រកួតរ៉ូបូតថ្នាក់ជាតិ Robocon 2022 ដោយបេក្ខភាពជ័យលាភីម្នាក់ៗទទួលបានថវិកាចំនួន ២០០ដុល្លារ និងអាវយឺតក្រសួងចំនួន១ ហើយ ឯកឧត្តមរដ្ឋមន្ត្រី បានប្រគល់ជូននិស្សិតជ័យលាភីអាហារូបករណ៍ទេពកោសល្យឌីជីថលតេជោចំនួន ៣១៤នាក់ នូវវិញ្ញាបនបត្រទទួលស្គាល់អាហារូបករណ៍ កុំព្យូទ័រយួរដៃមួយគ្រឿង កាបូបស្ពាយ១ និងអាវយឺតក្រសួង១ ផងដែរ៕ អត្ថបទ រូបភាព ង៉ាន់ ទិត្យ