បើតាមសម្ដីរបស់អ្នកចាត់ការទូទៅលោក Jurgen Klopp បានឲ្យដឹងថាអ្នកចាំទី Alisson Becker នឹងអវត្តមានចន្លោះពី ២ទៅ៣សប្ដាហ៍ ដោយសាររងរបួសកំភួនជើងក្នុងការប្រកួតបើកឆាកដែល Liverpool ឈ្នះ Norwich ៤-១ កាលពីថ្ងៃសុក្រសប្តាហ៍មុន។

កីឡាករសញ្ជាតិប្រេស៊ីលរងរបួសដោយខ្លួនឯងពេលព្យាយាមទាត់បាល់ឡើង នៅនាទី៣៩តង់ទីមួយ ហើយត្រូវបានប្ដូរចេញភ្លាមៗជំនួសដោយ Adrian។ របួសនេះក៏នឹងធ្វើឲ្យ Alisson អវត្តមានប្រកួតសំខាន់ទល់នឹង Chelsea នៅពាន Super Cup យប់ស្អែកផងដែរ។

Liverpool បាននាំយក Lonergan អតីតអ្នកចាំទី Middlesbrough ដែលទំនេរគ្មានក្លិបលេងមកធ្វើជាជម្រើសទី៣ បន្ទាប់ពីក្លិបជើងឯក Champions League ៦សម័យកាលអនុញ្ញាតឲ្យ Huddersfield ខ្ចីជើងយុវជនរបស់ខ្លួន Kamil Grabara រហូតដល់បញ្ចប់រដូវកាល៕ធ.ដ