ភ្នំពេញ៖ ចាបកន្លង់ Olive-backed Sunbird ជាសត្វស្លាបមានមាឌល្អិត និងចំពុះកោង ដោយក្នុងនេះចាបឈ្មោលមាន សម្បុរស្រស់ស្អាតមើលទៅគួរជាទីទាក់ទាញអ្នកផងទាំងពួង។

បើយោងតាមទំព័រហ្វេសប៊ុករបស់ក្រសួងបរិស្ថានបានឱ្យដឹងនៅថ្ងៃទី ១៧ ខែ ឧសភា ឆ្នាំ ២០២៣ថាសត្វចាបកន្លង់ វាច្រើនរស់នៅតាមសួនច្បារក្នុងភូមិស្រុក ព្រៃក្បោះ ព្រៃកោងកាង និងតំបន់ឆ្នេរជាដើម។

បើយោងតាមសៀវភៅសត្វស្លាបនៃប្រទេសកម្ពុជា និងក៏ដូចជាឯកសារស្រាវជ្រាវមួយចំនួនបានបង្ហាញថាសត្វចាបកន្លង់មានទំហំដងខ្លួន ១១.៥សង់ទីម៉ែត្រ ហើយវាចូលចិត្តស៊ីលំអងផ្កាជាចំណីអាហារ ។

សត្វប្រភេទនេះគឺគេអាចសម្គាល់សត្វឈ្មោល មានខ្នងពណ៌បៃតងខ្ចីរលោង ថ្ងាស បំពង់ក និងដើមទ្រូងមានពណ៌ខៀវចាស់ពោះ និង ចំណែកគូថពណ៌លឿង និងកន្ទុយពណ៌ស ។ បក្សីឈ្មោលក្រោយបន្តពូជមានបំពង់កពណ៌ខៀវចាស់ ។

ចាបកន្លង់ញីវិញ ផ្នែកពោះមានពណ៌លឿង ខាងក្រោមកន្ទុយពណ៌ស ។សម្រាប់រដូវការបន្តពូជរបស់ចាបកន្លង់ គឺចាប់ពីខែធ្នូ រហូត ដល់ខែកញ្ញា ៕ ដោយ៖ម៉ាដេប៉ូ