ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ និងអង្គការអន្ដរជាតិខាងការងារ (ILO) ឯកភាពគ្នាក្នុងការបង្កើតផែនទីបង្ហាញផ្លូវ រយៈពេលប្រាំឆ្នាំបន្តទៀត សម្រាប់អភិវឌ្ឍន៍នៃការអនុវត្តកម្មវិធីមុខរបរ និងការងារសមរម្យសម្រាប់យុវជននៅកម្ពុជាជំហានទី៣ (DEYIII)។

ការឯកភាពនេះ ធ្វើនៅក្នុងកិច្ចប្រជុំពិភាក្សាការងាររវាងឯកឧត្តម សោម ចំណាន រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ និង លោក Felix Weidenkak អ្នកជំនាញខាងមុខរបរ និងការងារយុវជនថ្នាក់តំបន់ របស់អង្គការអន្ដរជាតិខាងការងារ (ILO) កាលពីថ្ងៃទី១ខែមិថុនា ឆ្នាំ ២០២៣។
កិច្ចប្រជុំនេះ ត្រូវបានធ្វើឡើងក្នុងគោលបំណងដើម្បីតាមដាន ត្រួតពិនិត្យវាយតម្លៃប្រសិទ្ធភាពនៃការអនុវត្តកម្មវិធី DEYII ដែលបានអនុវត្ដចាប់តាំងពីឆ្នាំ ២០២០ ដល់ឆ្នាំ ២០២៣ និងពិភាក្សាកំណត់ទិសដៅអាទិភាពនិងសូចនាករការងារសំខាន់ៗ នៅក្នុងអនុសាសន៍ ១៨ ចំនុច ដើម្បីធ្វើផែនទីបង្ហាញផ្លូវ សម្រាប់ការអភិវឌ្ឍកម្មវិធីដំណាក់កាលទី៣(DEYIII)សម្រាប់រយៈពេលប្រាំឆ្នាំបន្តទៀត។

ជាលទ្ធផល ភាគីទាំងពីរ បានសម្ដែងនូវការពេញចិត្តចំពោះវឌ្ឍនភាពនៃការអនុវត្តលទ្ធផលនៃការអនុវត្តកម្មវិធី DEYII កន្លងមក។ នេះបើតាមក្រសួងការងារ និងបណ្តុះបណ្តាលវិជ្ជាជីវៈ។

ប្រភពក្រសួងការងារ បានឱ្យដឹងទៀតថា៖«ភាគីទាំងពីរ បានឯកភាពគ្នាក្នុងការបង្កើតផែនទីបង្ហាញផ្លូវ (Roadmap) សម្រាប់អភិវឌ្ឍកម្មវិធី DEYIII ឆ្នាំ២០២៤-២០២៨ ឱ្យកាន់តែ ប្រសើរថែមទៀត ដើម្បីបន្តបង្កើន និងលើកកម្ពស់ឱកាសការងារសមរម្យសម្រាប់យុវជន។ ក៏ដូចជាចូលរួមអនុវត្តគោលនយោបាយបណ្តុះបណ្តាលជំនាញកម្រិត១ (C1) ដល់យុវជនចំនួន ១.៥ លាននាក់របស់រាជរដ្ឋាភិបាលស្របតាមចក្ខុវិស័យ “ពលរដ្ឋម្នាក់ត្រូវតែមានជំនាញមួយ”។

ពាក់ព័ន្ធការអនុវត្តកម្មវិធី(DEY) ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ធ្លាប់លើកឡើងថា ការអនុវត្តកម្មវិធី DEY ដំណាក់ទី២នេះ និងដំណាក់កាលបន្តបន្ទាប់ នឹងចូលរួមចំណែកដ៏សំខាន់ក្នុងការសម្រេចបានគោលដៅរបស់កម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងគោលដៅអភិវឌ្ឍដោយចរីភាព (SDG) ជាពិសេសគោលដៅទី៨។

ឯកឧត្តមបញ្ជាក់ថា «ខ្ញុំចង់ឃើញវត្ដមានកម្មវិធី DEY ដំណាក់កាលទី៣ ព្រោះខ្ញុំជឿជាក់យ៉ាងមុតមាំថាកម្មវិធី DEY ពិតជាឆ្លើយតប និងរួមចំណែកជំរុញកំណើនសេដ្ឋកិច្ច និងវិបុលភាពរបស់ប្រទេសកម្ពុជាបន្ថែមទៀត»៕ ដោយ៖ សុខ រក្សា