ហ្សាការតា៖ ក្រុមគ្រូពេទ្យឥណ្ឌូនេស៊ីរាប់រយនាក់ដែលរួមមាន វេជ្ជបណ្ឌិត និងគិលានុបដ្ឋាយិកា កាលពីថ្ងៃចន្ទទី៥ខែមិថុនាបាននាំគ្នាធ្វើបាតុកម្មតវ៉ា ដើម្បីជំរុញឱ្យសមាជិកសភាបញ្ឈប់ការពិភាក្សាលើសំណើកែប្រែច្បាប់ស្ដីពីការថែទាំសុខភាព ដែលពួកគេអះអាងថានឹងបន្ថយការការពារសម្រាប់ក្រុមគ្រូពេទ្យ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានរ៉យទ័រ។

ការតវ៉ានេះធ្វើឡើងបន្ទាប់ពីសភារបស់ឥណ្ឌូនេស៊ីកាលពីខែកុម្ភៈ បានស្នើឱ្យមានការកែប្រែជាច្រើនចំពោះច្បាប់ថែទាំសុខភាពបច្ចុប្បន្ន រួមទាំងការសម្រួលដល់អ្នកជំងឺក្នុងការដាក់ពាក្យបណ្ដឹងចោទប្រកាន់ព្រហ្មទណ្ឌប្រឆាំងនឹងបុគ្គលិកថែទាំសុខភាពដែលប្រព្រឹត្តកំហុសនិងការអនុញ្ញាតឱ្យមានគ្រូពេទ្យជំនាញពីបរទេសអាចចូលបម្រើការងារបាននៅក្នុងប្រទេស នៅពេលខ្វះបុគ្គលិកពេទ្យ។

រដ្ឋាភិបាលឥណ្ឌូណេស៊ីបានអះអាងថា ការកែប្រែគឺចាំបាច់ដើម្បីសម្រួលដល់ច្បាប់បច្ចុប្បន្ន។ អ្នកនាំពាក្យក្រសួងសុខាភិបាល លោកស្រី Siti Nadia Tarmizi បាននិយាយថា ច្បាប់ថ្មីនេះមានគោលបំណងកែលម្អសេវាកម្មនៅឥណ្ឌូណេស៊ី។

ទន្ទឹមនេះមានសហជីពក្រុមគ្រូពេទ្យយ៉ាងហោចណាស់ចំនួនប្រាំ បានលើកឡើងពីការព្រួយបារម្ភផ្សេងៗ ក្រោមហេតុផលថា ច្បាប់ថ្មីនឹងអាចធ្វើឱ្យបុគ្គលិកសុខាភិបាលជួបការលំបាក។

ប្រធានសមាគមវេជ្ជសាស្ត្រឥណ្ឌូនេស៊ី លោក Mohammad Adib Khumaidi ដែលបានចូលរួមការតវ៉ានៅខាងក្រៅសភា កាលពីថ្ងៃចន្ទ បាននិយាយប្រាប់រ៉យទ័រ ថា៖ «ការភ័យខ្លាចរបស់យើង គឺទាក់ទងនឹងភាពច្បាស់លាស់ផ្នែកច្បាប់ និងការការពារ»។

ចំណែកឯប្រធានសមាគមទន្តពេទ្យ លោក Usman Sumantri បានចោទសួរថាតើមានស្តង់ដារដើម្បីធានាថាវេជ្ជបណ្ឌិតបរទេស នឹងធ្វើឱ្យប្រសើរឡើងនូវកម្រិតនៃការថែទាំនៅក្នុងប្រទេសឥណ្ឌូនេស៊ី ដែលជួបការលំបាករួចទៅហើយដោយសារតែកង្វះបុគ្គលិកពេទ្យ ជាពិសេសអ្នកឯកទេស ឬយ៉ាងណា។ លោកបន្តថា៖ «យើងត្រូវពិចារណា ថាតើវាអាចប៉ះពាល់ជាអវិជ្ជមានដល់ក្រុមគ្រូពេទ្យឥណ្ឌូនេស៊ីឬអត់»។

ភ្លាមៗនៅថ្ងៃចន្ទ គេមិនទាន់ឃើញមានប្រតិកម្មសម្រាប់ដំណោះស្រាយយ៉ាងណាពីរដ្ឋាភិបាលឥណ្ឌូណេស៊ីយ៉ាងនោះទេ ចំពោះបាតុកម្មរបស់ក្រុមគ្រូពេទ្យនេះ។ ជាមួយគ្នានោះ គេក៏មិនទាន់ដឹងច្បាស់ដែរ ថានៅពេលណាដែលសភានឹងបញ្ចប់កំណែច្បាប់ ដែលខ្លួនបានស្នើឡើង៕ ប្រែសម្រួល៖ ហួន ឌីណា