អ៊ុយក្រែន ច្រានចោលការរាយការណ៍ថា ខ្លួននៅពីក្រោយខ្នងការវាយប្រហារបំពង់បង្ហូរឧស្ម័ន Nord Stream
កៀវ៖ប្រធានាធិបតីអ៊ុយក្រែន លោក វ្ល៉ូឌីមៀរ ហ្សេលេនស្គី បានថ្លែងកាលពីថ្ងៃពុធ ទី០៧ ខែមិថុនា ថា អ៊ុយក្រែនមិនដឹងអ្វីពាក់ព័ន្ធទៅនឹងការបំផ្ទុះបំពង់បង្ហូរឧស្ម័នNord Stream នោះទេ។ការថ្លែងនេះចំពេលមានការរាយការណ៍ដោយស្រង់ព័ត៌មានបែកធ្លាយពីចារកម្មអាមេរិកថាក្រុងកៀវជាអ្នកនៅពីក្រោយការវាយប្រហារ។
លោក ហ្សេលេនស្គី បានថ្លែងក្នុងបទសម្ភាសន៍ជាមួយកាសែតអាល្លឺម៉ង់ Bild Daily ថា ក្នុងនាមជាប្រធានាធិបតី លោកមានអំណាចក្នុងការចេញបញ្ជា ប៉ុន្តែច្រានចោលថា «ខ្ញុំមិនបានចេញបញ្ជាឱ្យធ្វើការដូចនោះទេ»។ លោកបន្តថា៖ «ខ្ញុំជឿថាកងទ័ពរបស់យើង និងសេវាស៊ើបការណ៍សម្ងាត់របស់យើង មិនបានធ្វើអ្វីដូចនោះ» ដោយបន្ថែមថា លោកចង់ឃើញភស្តុតាងលើការចោទប្រកាន់អ៊ុយក្រែន។ លោក ហ្សេលេនស្គី បានសង្កត់ធ្ងន់បន្ថែមថា៖ «យើងមិនដឹងអ្វីសោះ ១០០ ភាគរយ»។
គួរបញ្ជាក់ថា ការច្រានចោលរបស់លោក ហ្សេលេនស្គី ធ្វើឡើងបន្ទាប់ពីកាសែតវ៉ាស៊ីនតោនប៉ុស្តិ៍ បានរាយការណ៍កាលពីថ្ងៃអង្គារ ដោយស្រង់ព័ត៌មានបែកធ្លាយពីចារកម្មអាមេរិក ថា ទីភ្នាក់ងារស៊ើបការណ៍អឺរ៉ុបបានប្រាប់ភ្នាក់ងារស៊ើបការសម្ងាត់អាមេរិក CIAថា ខ្លួនដឹងពីក្រុមប្រតិបត្តិការពិសេសរបស់អ៊ុយក្រែន គ្រោងនឹងបំផ្ទុះបំពង់បង្ហូរឧស្ម័ន Nord Stream ។
វ៉ាស៊ីនតោនប៉ុស្តិ៍ បានផ្សាយថា ការព្រមាននេះធ្វើឡើងបីខែមុនការផ្ទុះបានកើតឡើងដោយថា អ្នកមុជទឹកយោធាអ៊ុយក្រែនដែលប្រាប់ព័ត៌មានដោយផ្ទាល់ទៅអគ្គមេបញ្ជាការយោធារបស់ប្រទេស កំពុងរៀបចំផែនការវាយប្រហារនោះ។
គួររំឭកថា បំពង់បង្ហូរឧស្ម័ន Nord Stream 1 និង 2 ដែលត្រូវបានសាងសង់ឡើងដើម្បីបង្ហូរឧស្ម័នធម្មជាតិពីរុស្ស៊ីទៅកាន់អាល្លឺម៉ង់ឆ្លងកាត់សមុទ្របាល់ទិក ត្រូវបានបំផ្ទុះឱ្យធ្លាយកាលពីចុងខែកញ្ញា ឆ្នាំមុន។ ការបំផ្លិចបំផ្លាញនេះ បានបង្កឱ្យមានភាពអាសន្នទូទាំងតំបន់ ដោយសារវាកាត់ផ្តាច់ការផ្គត់ផ្គង់ថាមពលសំខាន់ៗសម្រាប់អឺរ៉ុប ចំពេលដែលសង្រ្គាមនៅអ៊ុយក្រែនបានធ្វើឱ្យតម្លៃថាមពលខ្ពស់ស្រាប់ហើយ។ ក្រោយផ្ទុះប្រទេសបីធំៗរួមមាន រុស្ស៊ី អាមេរិក និងអ៊ុយក្រែន រងការចោទប្រកាន់ថានៅពីក្រោយខ្នង ប៉ុន្តេ គ្មានការចោទប្រកាន់ណាមួយត្រូវបានធ្វើឡើងជាផ្លូវការ ពីសំណាក់រដ្ឋាភិបាលណាមួយនោះទេ៕ប្រែសម្រូល៖ ហួន ឌីណា
ប្រភព៖ Zelenskyy denies Ukraine behind Nord Stream blasts https://www.channelnewsasia.com/world/zelenskyy-denies-ukraine-behind-nord-stream-blasts-3547076
