កាកបាទក្រហមកម្ពុជាបន្តប្រតិបត្តិការមនុស្សធម៌ទៅតាមផែនការអភិវឌ្ឍឆ្នាំទី២ និងឆ្នាំទី៣ នៃយុទ្ធសាស្ត្រ ២០២១-២០៣០លើវិស័យអាទិភាពទាំងបួន
ភ្នំពេញ៖ កាកបាទក្រហមកម្ពុជានឹងប្រើប្រាស់មូលនិធិជាង១៣លានដុល្លារ ដែលទទួលបានពីយុទ្ធនាការកៀរគររកមូលនិធិ តាមរយៈប្រធានបទ «រួមគ្នាជាមួយកាកបាទក្រហមកម្ពុជាដើម្បីបរិយាបន្នសង្គម» ក្នុងទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៣ សម្រាប់ប្រតិបត្តិការមនុស្សធម៌ទៅតាមផែនការអភិវឌ្ឍឆ្នាំទី២ និងឆ្នាំទី៣ នៃយុទ្ធសាស្ត្រ ២០២១-២០៣០។
យោងតាមសេចក្តីប្រកាសព័ត៌មានថ្ងៃទី៧ ខែមិថុនា ឆ្នាំ ២០២៣បានឱ្យដឹងថា គិតមកដល់ ថ្ងៃទី១ ខែមិថុនាថ្នាក់កណ្តាលបានទទួលសម្ភារៈនិងថវិកាពីសប្បុរសជន៩៩៩ អង្គ/នាក់ មានមូលនិធិសមមូលជាដុល្លារអាម៉េរិក ចំនួនជាង ១៣,៩លានដុល្លារអាម៉េរិក។ ឯនៅតាមសាខាខេត្តចំនួន ២៤ទៀត ក៏បាននិងកំពុងដំណើរការ កៀរគររកមូលនិធិតាមលទ្ធភាពរៀងៗខ្លួន។
កាកបាទក្រហមកម្ពុជា បានលើកឡើងថា ៖ «កាកបាទក្រហមកម្ពុជា បាននិងកំពុងធ្វើប្រតិបត្តិការមនុស្សធម៌ទៅតាមផែនការអភិវឌ្ឍឆ្នាំទី២ និងឆ្នាំទី៣ នៃយុទ្ធសាស្ត្រ ២០២១-២០៣០ ទៅលើវិស័យអាទិភាពទាំង ៤ ដែលបានកំណត់»។
វិស័យអាទិភាពទាំងនោះរួមមាន៖ ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ, ការអប់រំថែទាំសុខភាពតាមសហគមន៍, ការលើកកម្ពស់គោលការណ៍គ្រឹះ តម្លៃមនុស្សធម៌ សុខុមាលភាពសង្គម និងការអភិវឌ្ឍស្ថាប័ន/អភិវឌ្ឍសាខា។
សេចក្តីប្រកាសព័ត៌មានបានបន្តថា ៖ «គ្រួសារងាយរងគ្រោះបំផុតជាង ១២ ម៉ឺនគ្រួសារ ទទួលផលដោយផ្ទាល់ពីការផ្ដល់អំណោយសម្រាលជីវភាព, ការកសាងសមិទ្ធផលផ្ទះស្នាក់អាស្រ័យ, កន្លែងលាងសម្អាតដៃ,បង្គន់អនាម័យ, អណ្ដូងទឹកស្អាតជាដើម»។
ប្រភពដដែលបន្តថា ៖ «លើសពីនេះទៅទៀត កាកបាទក្រហមកម្ពុជា បានពង្រីកការផ្ដល់ទុនប្រាក់កម្ចីឥតការប្រាក់ចំនួន ៥៤៣គ្រួសារបន្ថែម ក្នុងឆ្នាំ២០២២ និងពង្រីក បន្ថែមទៀតនៅដើមឆ្នាំ២០២៣នេះចំនួន ២៦៧គ្រួសារ រួមជាមួយការបង្វិលប្រាក់ដើមទុនចាស់រំលស់មកវិញ សម្រេចបានសរុប ៨១០គ្រួសារ នៅតំបន់ប្រឈមនឹងគ្រោះថ្នាក់មីន ក្នុងខេត្តពោធិ៍សាត់ ប៉ៃលិន ឧត្តរមានជ័យ និងព្រះវិហារ»។
ជាមួយគ្នានេះដែរ កាកបាទក្រហមក៏មាននូវការអប់រំផ្សព្វផ្សាយលើកកម្ពស់យល់ដឹងពីការប្រែប្រួលអាកាសធាតុ, ការថែទាំសុខភាពសាធារណៈ សុខភាពមាតា-ទារក កុមារ មនុស្សចាស់, ការយល់ដឹងពីជំងឺមហារីកសុដន់ មហារីកមាត់ស្បូន, ការកាត់បន្ថយគ្រោះថ្នាក់ចរាចរណ៍ និងគ្រោះថ្នាក់ដោយសារមីន ដែលបានអប់រំផ្ទាល់បានជាង ៥២ ម៉ឺនគ្រួសារ និងប្រយោលជាច្រើនម៉ឺនគ្រួសារទៀត។
កាកបាទក្រហមបានបញ្ជាក់ថា ៖ «កាកបាទក្រហមកម្ពុជា បានបន្តផ្តល់មូលនិធិ ១លានដុល្លារ ដែលឆ្នាំនេះ ជាលើកទី១២ ជូនទៅមន្ទីរពេទ្យកុមារគន្ធបុប្ផា និងផ្តល់ការ ឧបត្ថម្ភថវិកា និងស្បៀង តាមចំនួនសមស្របដល់មន្ទីរពេទ្យកុមារអង្គរ និងអង្គការ/សមាគម ចំនួន ២០ បានផ្តល់ថវិកាពីរលានដុល្លារ ដល់អាជ្ញាធរមីន និងបានជួយដល់គ្រោះរញ្ជួយដីនៅតួកគី ១០ម៉ឺនដុល្លារ»។
សូមបញ្ជាក់ដែរថា ឆ្នាំនេះ ជាឆ្នាំទី៤ហើយ ដែលកាកបាទក្រហមកម្ពុជា ពុំបានប្រារព្ធមិខ្ទីងថ្នាក់ជាតិអបអរទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា តែកាកបាទក្រហមកម្ពុជា បានយកឱកាសនៃខួប១៦០ឆ្នាំ នៃទិវា ៨ ឧសភានេះ ធ្វើយុទ្ធនាការកៀរគររកមូលនិធិ។
យោងតាមរបាយការណ៍របស់កាកបាទក្រហមកម្ពុជា គិតចាប់ពីឆ្នាំ២០១០ដល់ឆ្នាំ២០២១ កាកបាទក្រហមកម្ពុជាបានសាងសង់ផ្ទះជូនជនចាស់ជរាគ្មានទីពឹង និងជនទីទ័លខ្លាំងបំផុតបានចំនួន១២១៨ ខ្នង ដែលមានអ្នកទទួលផលចំនួន ១២១៨ គ្រួសារផងដែរ។
ប្រភពដដែលបានបន្ត សម្រាប់ឆ្នាំ២០២២ កន្លងទៅនេះ កាកបាទក្រហមកម្ពុជា បានប្រគល់ផ្ទះដែលបានសាងសង់រួចរាល់ចំនួន១០៤ខ្នងបន្ថែមទៀតជូនចាស់ជរាគ្មានទីពឹង និងស្រ្តីមេម៉ាយក្រីក្រមានកូនច្រើន៕ដោយ៖ នាង សុគន្ធា
