ឥណ្ឌា៖ មនុស្ស ២៥នាក់ស្លាប់ក្នុងហេតុការណ៍រថយន្តក្រុងបុកបង្គោល ហើយឆេះ
ញូវដែលី៖មនុស្ស ២៥ នាក់បានស្លាប់ និងប្រាំបីនាក់ផ្សេងទៀតបានរងរបួស ក្រោយពេលរថយន្តក្រុងមួយគ្រឿងបានបោកទៅបុកបង្គោលភ្លើងហើយក្រឡាប់ឆេះ នៅលើផ្លូវល្បឿនលឿនក្នុងរដ្ឋភាគខាងលិច Maharashtra របស់ឥណ្ឌា កាលពីម៉ោង២រំលងអធ្រាត្រនៃព្រឹកថ្ងៃសៅរ៍។
មន្ត្រីប៉ូលិសជាន់ខ្ពស់ប្រចាំក្រុងកើតហេតុBuldhana នៃរដ្ឋ Maharashtra លោក Baburao Mahamuniបានប្រាប់AFPថា រថយន្តក្រុងកំពុងធ្វើដំណើរទៅកាន់ទីក្រុងPuneតាមបណ្ដោយផ្លូវល្បឿនលឿន Samruddhi Mahamarg មុនពេលបុកបង្គោលភ្លើងហើយក្រឡាប់ឆេះ។ លោកបន្តថា ៖ «មានមនុស្សប្រហែលពី ៣០ ទៅ ៣៥ នាក់ជិះឡានក្រុងនោះ។ មនុស្ស ២៥ នាក់បានស្លាប់ និងប្រាំបីនាក់ផ្សេងទៀតបានរងរបួស»។
រដ្ឋមន្ត្រីក្រសួងអភិវឌ្ឍន៍ជនបទរបស់រដ្ឋលោក Girish Mahajan បានប្រាប់អ្នកយកព័ត៌មានថា តៃកុងឡាន និងព្រូឡាន ត្រូវបានចាប់ខ្លួន ដើម្បីសាកសួរបន្ថែម។ លោកបន្តថា៖ «តៃកុងឡាបប្រាប់ថា កង់រថយន្តក្រុងបែក ហើយរេទៅបុកបង្គោលភ្លើង។ ប៉ុន្តែវាហាក់ដូចជាគាត់(តៃកុងឡាន)ងុយដេក។ យើងនឹងពិនិត្យមើលថាតើមានអ្វីកើតឡើង»។
លោក Mahajan បានបន្ថែមថា សាកសពជនរងគ្រោះបានឆេះដល់មើលមិនស្គាល់ ហើយក្រុមការងារកំពុងធ្វើកោសល្យវិច្ច័យដើម្បីជួយកំណត់អត្តសញ្ញាណ។ ចំណែកឯប៉ូលិសកំពុងបើកការស៊ើបអង្កេត ដោយអះអាងថា ក្មេងៗបីនាក់ស្ថិតនៅក្នុងចំណោមអ្នកដែលស្លាប់។
ទីភ្នាក់ងារសារព័ត៌មាន Press Trust of India (PTI) បានចុះផ្សាយដោយស្រង់សម្ដីអ្នករួចជីវិតម្នាក់ ដែលនិយាយថា ខ្លួនហក់ចេញតាមបង្អួតនៅពេលឡានក្រឡាប់។ សាក្សីនៅនឹងកន្លែងកើតហេតុម្នាក់ បានប្រាប់ PTI ថា ខ្លួនបានព្យាយាមយកមនុស្សចេញពីឡានដែលកំពុងឆេះ ប៉ុន្តែមិនអាចជួយបានដោយសារភ្លើងឆេះខ្លាំងពេក ដែលធ្វើឱ្យមនុស្សនៅក្នុងនោះត្រូវឆេះទាំងរស់។
គួរបញ្ជាក់ថា គ្រោះថ្នាក់នៅតាមដងផ្លូវស្ទើរតែជារឿងធម្មតាទៅហើយនៅឥណ្ឌា។ ចំនួនអ្នកស្លាប់ដោយសារគ្រោះថ្នាក់ចរាចរណ៍ក្នុងប្រទេសនេះ រួមចំណែក ១១ ភាគរយនៃចំនួនអ្នកស្លាប់ដោយសារគ្រោះថ្នាក់ចរាចរណ៍ទូទាំងពិភពលោក។ នេះបើយោងតាមរបាយការណ៍របស់ធនាគារពិភពលោក ចេញផ្សាយក្នុងឆ្នាំ ២០២១។
របាយការណ៍ដដែលបានប៉ាន់ប្រមាណថា មានអ្នកស្លាប់ដោយសារគ្រោះថ្នាក់ចរាចរណ៍ចំនួន ១៥០ ០០០ នាក់នៅក្នុងប្រទេសឥណ្ឌាជារៀងរាល់ឆ្នាំ ឬម្នាក់រៀងរាល់ ៤ នាទីម្តង ខណៈគ្រោះថ្នាក់ចរាចរណ៍បានធ្វើឱ្យសេដ្ឋកិច្ចឥណ្ឌាប្រហែល ៧៥ ប៊ីលានដុល្លារត្រូវខាតបង់ក្នុងមួយឆ្នាំៗ៕
ប្រែសម្រួល៖ហួន ឌីណា
ប្រភព៖ 25 dead after bus crashes and catches fire in India https://www.channelnewsasia.com/asia/bus-crash-fire-india-dead-injured-3599806
