(ភ្នំពេញ)៖ គិតរហូតមកដល់ពេលនេះចលនា ភូមិមួយផលិតមួយ បានប្រមូលផ្តុំផលិតផល ៦៨០មុខ ហើយកំពុងបានទទួលការគាំទ្រពីសំណាក់ពលរដ្ឋកម្ពុជាក៏ដូចជាបរទេសផងដែរ។
គួរបញ្ជាក់ថាការថ្លែងបញ្ជាក់បែបនេះធ្វើឡើងដោយ លោក សួង ណយ អគ្គលេខាធិការរងនៃគណៈកម្មាធិការជាតិជំរុញ ចលនា ភូមិមួយផលិតផលមួយ ក្នុងវេទិការធុរកិច្ចប្រកបដោយនិរន្តរភាព ”រួមគ្នាភាពរីកចម្រើនរបស់សហគ្រាសធុនមីក្រូតូច និង មធ្យមនៅកម្ពុជា” ដែលបានរៀបចំឡើងនៅសណ្ឋានគារ អូកវូដ ព្រីមៀ ភ្នំពេញ នារសៀលថ្ងៃទី ០៦ ខែកក្កដា ឆ្នាំ២០២៣កន្លងមក។

ទាក់ទិនក្នុងរឿងនេះ លោក សួង ណយបានបញ្ជាក់ថា៖”ចាប់ពីពេលនេះទៅ ឬ ចាប់ពីមួយឆ្នាំទៅមួយឆ្នាំយើងនឹងប្រមូលផ្តុំនូវផលិតផលបន្ថែម ហើយបើយើងសហការគ្នាបានល្អក្នុងនេះដូចជាយើងចងក្រងគ្នាជាចង្កោមច្រើនដូចជា ជាមួយ ភោជនីយដ្ឋាន ផ្សារម៉ាត ផ្សារទំនើប និង កន្លែងលក់ទំនិញ ឬកន្លែងនាំចេញដែលចលនានេះហើយនឹងជួយធ្វើឱ្យចលនាភូមិមួយផលិតផលមួយដំណើរការកាន់តែរលូនទៅមុខ ។ អ្វីដែលទាំងអ្នកផលិត និងអ្នកទិញគាំទ្រដោយសារថាទីមួយគឺយើងផលិតច្រើន មានគុណភាព មានសោភណ្ឌភាព មានអនាម័យ ជាពិសេសសុចរិតភាពតែម្តង។ បើយើងមានសុចរិតភាព ដែលមានន័យថាស្មោះត្រង់គេចូលចិត្ត គេគាំទ្រ គេទិញហើយទិញទៀត ដែលលក្ខណៈនេះហើយធ្វើឱ្យចលនាភូមិមួយផលិតផលមួយរីកចម្រើនលូតលាស់ឆាប់រហ័ស”។

លោកបានបញ្ជាក់បន្ថែមថា ចលនាភូមិមួយផលិតមួយត្រូវរាជរដ្ឋាភិបាលកម្ពុជាគាំទ្រ ពិសេស សម្តេចតេជោហ៊ុនសែនជាស្ថាបនិកចាប់តាំងតែពីឆ្នាំ២០០២ រហូតមកដល់ពេលបច្ចុប្បន្នធ្វើឱ្យមានគោលនយោបាយរបស់រាជរដ្ឋាភិបាលគាំទ្រ ប្រជាជនខិតខំផលិត អ្នកទិញជួយគាំទ្រអញ្ចឹងធ្វើឱ្យចលនាភូមិមួយផលិតផលមួយទៅមុខលឿន។ ភូមិមួយផលិតផលកំពុងដើរបានត្រឹមត្រូវតាមគន្លងរបស់រាជរដ្ឋាភិបាល។

លោកបានបញ្ជាក់ថាមកទល់ពេលនេះ ចលនាភូមិមួយ ផលិតផលមួយនេះ ត្រូវបានពង្រីកទៅកាន់ទីផ្សារក្នុងប្រទេសកម្ពុជាប្រមាណពី៧០ ទៅ ៨០ភាគរយហើយ និងមួយចំនួនក៏មាននាំចេញទៅកាន់បរទេសផងដែរ ។
ជាមួយការលើកឡើងបែបនេះលោកបានបញ្ជាក់ប្រាប់ដែរថា”នៅសល់អ្នកផលិតមួយចំនួនយើងកំពុងជំរុញឱ្យគាត់សុំច្បាប់អនុញ្ញាត្តិពីស្តង់ដា អនាម័យសុវត្តិភាពពីព្រោះថា បើកាលណាយើងចូលផ្សារទំនើបចាំបាច់ត្រូវមានលក្ខខណ្ឌ ។ យើងឱ្យអ្នកទិញជួបគ្នានិយាយពីរឿងនេះដើម្បីងាយក្នុងការឈានដល់ការចុះកិច្ចព្រមព្រៀងជាមួយគ្នា”។

លោក សួង ណយ បានរំពឹងយ៉ាងមុតមាំថានៅថ្ងៃខាងមុខ ផលិតផលពីភូមិមួយផលិតផលមួយនឹងទទួលបានការគាំទ្រទាំងពីសំណាក់ ពលរដ្ឋកម្ពុជា និងបរទេស។ ទន្ទឹមជួយគ្នានេះលោកក៏ចង់ឱ្យបរទេសបាន ស្គាល់ពីផលិតផលខ្មែរ សំដៅដើម្បីជំរុញពង្រីកទីផ្សារបន្ថែម និងជំរុញការនាំចេញ ដើម្បីលើកកម្ពស់ដល់សហគមន៍មូលដ្ឋាន បង្កើតការងារ ដល់ពលរដ្ឋកម្ពុជា៕

អត្ថបទ៖លោក ជិនម៉ាដេប៉ូ
រូបភាព៖ លោក ងីម ឆៃហួត