អតីតមេដឹកនាំអាមេរិក លោក ត្រាំ រងការចោទប្រកាន់ពីបទរៀបចំផែនការផ្ដួលរំលំការបោះឆ្នោតឆ្នាំ ២០២០
អាមេរិក៖ អតីតប្រធានាធិបតីអាមេរិក លោក ដូណាល់ ត្រាំ កាលពីថ្ងៃអង្គារបានរងការចោទប្រកាន់ពីបទរៀបចំផែនការផ្តួលរំលំការបោះឆ្នោតឆ្នាំ២០២០ និងបទចោទផ្សេងទៀត។ នេះបើតាមការចុះផ្សាយរបស់ប្រព័ន្ធផ្សព្វផ្សាយផ្សេងៗ ដែលរាយការណ៍ពីឯកសារច្បាប់ស្ដីពីការចោទប្រកាន់លោក ត្រាំ របស់ក្រុមប្រឹក្សាស៊ើបអង្កេតពិសេស។
បើតាមបណ្ដាញព័ត៌មាន BBC ឯកសារកម្រាស់ ៤៥ ទំព័របានបង្ហាញថា លោក ត្រាំ រងការចោទប្រកាន់លើបទចោទចំនួនបួន ដែលរួមមានទាំងការសមគំនិតដើម្បីបន្លំសាធារណៈអាមេរិក ការបំភ្លៃសាក្សី និងការសមគំនិតប្រឆាំងនឹងសិទ្ធិពលរដ្ឋ។ បទចោទទាំងនេះ គ្របដណ្តប់លើការស៊ើបអង្កេតលើព្រឹត្តិការណ៍វាយប្រហារវិមានកាពីតូលថ្ងៃទី០៦ ខែមករា ឆ្នាំ ២០២១។
ការស៊ើបអង្កេតក្នុងសំណុំរឿងទាក់ទងនឹងការបោះឆ្នោតឆ្នាំ២០២០ បានផ្តោតលើសកម្មភាពរបស់លោក ត្រាំ ក្នុងរយៈពេល២ខែ ចន្លោះពីពេលដែលលោកចាញ់ឆ្នោតរហូតដល់ហេតុការណ៍វាយប្រហារលើវិមានកាពីតូលនៅក្រុងវ៉ាស៊ីនតោន ឌីស៊ី។
មន្រ្តីដឹកនាំការស៊ើបអង្កេតនេះ គឺលោក ហ្សាក់ ស្មីត(Jack Smith) ដែលជាទីប្រឹក្សាពិសេសតែងតាំងដោយក្រសួងយុត្តិធម៌អាមេរិក បាននិយាយកាលពីល្ងាចថ្ងៃអង្គារថា ៖ «ការវាយប្រហារលើរដ្ឋធានីនៃប្រទេសរបស់យើងកាលពីថ្ងៃទី ០៦ ខែមករា ឆ្នាំ ២០២១ គឺជាការវាយប្រហារដែលមិនធ្លាប់មានពីមុនមក លើលទ្ធិប្រជាធិបតេយ្យរបស់អាមេរិក»។
លោក ស្មីត បានបញ្ចប់សេចក្តីថ្លែងការណ៍ខ្លីរបស់លោក ដោយសន្យាថានឹងស្វែងរក «ការកាត់ទោសដ៏ឆាប់រហ័សមួយ» ខណៈសង្កត់ធ្ងន់ថា លោក ត្រាំ «ត្រូវតែសម្មត់ថាគ្មានទោសរហូតដល់មនាការបញ្ជាក់ថាមានទោស»។
លោក ត្រាំ កំណត់ថានឹងបង្ហាញខ្លួននៅក្នុងតុលាការនៅថ្ងៃព្រហស្បតិ៍ នៅទីក្រុងវ៉ាស៊ីនតោន ឌីស៊ី។
គួរគូសបញ្ជាក់ថា ការចោទប្រកាន់នេះ ធ្វើឡើងខណៈលោក ត្រាំ ដែលពេលនេះមានអាយុ ៧៧ ឆ្នាំ ត្រៀមខ្លួនឈរឈ្មោះប្រកួតប្រជែងតំណែងប្រធានាធិបតីជាថ្មី។ លោកតែងហៅសំណុំរឿងប្រឆាំងនឹងរូបលោក ថាគឺជារឿងគួរឱ្យអស់សំណើច។
អតីតប្រធានាធិបតីរូបនេះ បានរងការចោទប្រកាន់ក្នុងសំណុំរឿង២ផ្សេងទៀតរួចមកហើយ ដែលរួមមានទាំងការកាន់កាប់ឯកសារសម្ងាត់មិនត្រឹមត្រូវ និងការក្លែងបន្លំកំណត់ត្រាជំនួញ ដើម្បីបិទបាំងការយកលុយទៅសូកតារាថតរឿងអាសអាភាសម្នាក់កុំឱ្យទម្លាយរឿងអាស្រូវរបស់ខ្លួន៕
ប្រែសម្រួល៖ហួន ឌីណា
