ក្រសួងទេសចរណ៍៖ ពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ីលើកទី១៤ នឹងពង្រឹងទំនាក់ទំនងទេសចរណ៍ និងការទូតរវាងប្រទេសទាំងពីរបន្ថែមទៀត
ភ្នំពេញ៖ មន្រ្តីជាន់ខ្ពស់នៃក្រសួងទេសចរណ៍ បានបញ្ជាក់ថា ពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ី លើកទី១៤ (The 14th Indonesian Trade and Tourism Promotion) ដែលបានរៀបចំឡើងនៅប្រទេសកម្ពុជាក្នុងរយៈពេលបីថ្ងៃកន្លងមកនេះ ដើម្បីពង្រឹងទំនាក់ទំនងរវាងកម្ពុជា និងឥណ្ឌូនេស៊ីបន្ថែមទៀត ទាំងផ្នែកការទូត ធរុកិច្ចនិងទេសចរណ៍រវាងប្រទេសទាំងពីរ។
ឯកឧត្តម ថោង រដ្ឋសក្កិ រដ្ឋលេខាធិការក្រសួងទេសចរណ៍បានប្រាប់ឱ្យដឹងនៅថ្ងៃទី៦ ខែសីហា ថា នៅក្នុងពិព័រណ៍ (ITTP 2023)លើកទី១៤នេះ បានផ្តោតសំខាន់ទៅលើការពង្រឹងទំនាក់ទំនងជាមួយគ្នារវាងប្រទេសឥណ្ឌូនេស៊ី និងប្រទេសកម្ពុជា ហើយក្នុងពិព័រណ៍នេះមានអ្នកចូលរួមសរុបប្រមាណ ៥០០ នាក់ និងមានស្តង់ពិព័រណ៍សរុបចំនួន ៦០ ស្តង់ ដែលបានដាក់បង្ហាញដូចជា ផលិតផលផ្សេងៗ ការផ្សព្វផ្សាយកម្មវិធី និងគោលដៅទេសចរណ៍ ម្ហូបអាហារ ការអប់រំ តន្ត្រី…និងបានបើកជូនមហាជនចូលរួមទស្សនាដោយសេរីផងដែរ។
ឯកឧត្តមបានបញ្ជាក់ថា ៖ «ឆ្នាំ២០២៣ គឺជាខួបលើកទី៦៤ នៃទំនាក់ទំនងការទូតរវាងប្រទេសកម្ពុជា និងប្រទេសឥណ្ឌូនេស៊ី ហើយខ្ញុំបាទក៏បានជូនពរដល់ព្រឹត្តិការណ៍ពិព័រណ៍នេះទទួលបានជោគជ័យ និងជូនពរដល់ប្រទេសឥណ្ឌូនេស៊ី ដែលកំពុងធ្វើជាប្រធានអាស៊ានទទួលបានជោគជ័យក្នុងរៀបចំកិច្ចប្រជុំអាស៊ាន និងកិច្ចប្រជុំពាក់ព័ន្ធ»។
នៅកំលុងពេលចូលរួមពិធីនេះដែរ លោក ងួន ម៉េងតិច អគ្គនាយកសភាពាណិជ្ជកម្មកម្ពុជា បាននិយាយថា ក្នុងនាមវិស័យឯកជន សភាពាណិជ្ជកម្ម ស្វាគមន៍រាល់អ្នកវិនិយោគមកពីគ្រប់បណ្តាប្រទេសទាំងអស់ ដែលមានបំណងចង់វិនិយោគនៅកម្ពុជា លើគ្រប់វិស័យ សភាពាណិជ្ជកម្ម នឹងជួយសម្របសម្រួល ជួយរកដៃគូក្នុងស្រុក ក៏ដូចជាការណែនាំពីលក្ខខណ្ឌវិនិយោគល្អជាច្រើន ដែលរាជរដ្ឋាភិបាលបានរៀបចំជូនវិនិយោគិនបរទេស។
លោកបានបញ្ជាក់ថា ៖ «យើងចង់ផ្តល់ទំនុកចិត្ត និងភាពកក់ក្តៅ ដល់អ្នកវិនិយោគទាំងអស់ដែលមករកស៊ីនៅស្រុកយើង តាមរយៈការស្វាគមន៍ដល់ពួកគេ និងណែនាំដល់ពួកគេពីច្បាប់ និងលក្ខខណ្ឌវិនិយោគល្អនៅស្រុកយើង។ តាមរយៈកម្មវិធីផ្សព្វផ្សាយពាណិជ្ជកម្ម និងទេសចរណ៍ឥណ្ឌូនេស៊ី លើកទី១៤ (ITTP 2023)នេះ ខ្ញុំជឿថា មិនមែនតែឥណ្ឌូនេស៊ីទេ ដែលអាចទាញប្រយោជន៍កិច្ចសហការនេះ កម្ពុជាយើងក៏អាចទាញប្រយោជន៍ពីកិច្ចសហការនេះបានដូចគ្នាដែរ»។
លោក ធួន ស៊ីណាន ប្រធានក្រុមប្រឹក្សាភិបាលក្រុមហ៊ុន IMCT ខូអិលធីឌី និងជាប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានប្រាប់ឱ្យដឹងដែរថា ឥណ្ឌូនេស៊ី ជាប្រទេសដែលមានប្រជាជនច្រើនជាងគេក្នុងតំបន់អាស៊ាន ជាប្រទេសដែលមានសក្តានុពលបំផុតក្នុងការទាក់ទាញទេសចរមកកាន់កម្ពុជា។
លោកបានបន្ថែមថា ការជំរុញផ្សព្វផ្សាយពីគ្នាទៅវិញទៅមកមិនមែនជារឿងអាក្រក់នោះទេ ដោយសារតែប្រយោជន៍ដែលទទួលបាន គឺមានឱ្យគ្នាទៅវិញទៅមក តាមរយៈការផ្សព្វផ្សាយនេះហើយ។ លោកបន្តថា ការដឹងពីគ្នាទៅវិញទៅមក នឹងធ្វើឱ្យប្រទេសទាំងពីរកាន់តែមានភាពជិតស្និទ្ធ យល់ពីគ្នា និងចែករំលែកបទពិសោធន៍ឱ្យគ្នាទៅវិញទៅមក ខណៈដែលឥណ្ឌូនេស៊ីជាប្រទេសលូតលាស់មួយដែរលើឧស្សាហកម្មទេសចរណ៍។
លោក ធួន ស៊ីណាន បានបញ្ជាក់បន្ថែមថា ៖ «លើសពីការផ្សព្វផ្សាយពីទេសចរណ៍រវាងគ្នា ខ្ញុំចង់ឱ្យមានជើងហោះហើរត្រង់រវាងគ្នាឱ្យបានកាន់តែច្រើន។ កន្លងមកកម្ពុជា ធ្លាប់មានជើងហោះហើរត្រង់ជាមួយប្រទេសម្តងដែរ តែត្រូវផ្អាកវិញ។ ដូចនេះ ការធ្វើដំណើរទៅកាន់ប្រទេសឥណ្ឌូនេស៊ី និងពីឥណ្ឌូនេស៊ីមកវិញ ត្រូវឆ្លងកាត់ច្រើនមួយចំនួន ដែលនាំឱ្យខាតពេលវេលា និងចំណាយច្រើន»។
លោកបានបន្ថែមថា ការតភ្ជាប់ជើងហោះហើរឡើងជាមួយឥណ្ឌូនេស៊ីនេះ វាមិនត្រឹមតែជួយបង្កើនលំហូរទេសចរណ៍ ពាណិជ្ជកម្ម និងការវិនិយោគប្រទេសទាំងពីរប៉ុណ្ណោះទេ វាថែមទាំងទាក់ទាញទេសចរដែលទៅកំសាន្តនៅកោះបាលី ឱ្យមកកាន់កម្ពុជាផងដែរ។
យោងតាមរបាយការណ៍ក្រសួងទេសចរណ៍ ក្នុងឆ្នាំ២០២២កន្លងទៅ កម្ពុជាទទួលបានទេសចរណ៍អន្តរជាតិចំនួនជាង ២,២លាននាក់ កើនឡើងប្រមាណជាងមួយពាន់ភាគរយ ក្នុងនោះទេសចរឥណ្ឌូនេស៊ីមានចំនួនជាង ៧,៥ម៉ឺន កើនឡើងជិត ៨០០ នាក់៕
ដោយ៖វណ្ណ សុជាតា
