ក្រសួងទេសចរណ៍លើកទឹកចិត្តឱ្យអាជីវកម្មកាណូតទេសចរណ៍ដាក់ពាក្យស្នើសុំបញ្ជាក់ពីគុណភាពសេវាកម្ម
ភ្នំពេញ៖ ក្រសួងទេសចរណ៍នឹងបន្តចុះពង្រឹងគុណភាពសេវាកម្មកាណូតដែលទទួលស្គាល់ពីក្រសួងនិងលើកទឹកចិត្តឱ្យអាជីវកម្មកាណូតទេសចរណ៍ផ្សេងទៀតដាក់ពាក្យស្នើសុំបញ្ជាក់ពីក្រសួងដើម្បីធានាថា ការធ្វើដំណើរកម្សាន្តទេសចរណ៍តាមផ្លូវទឹកប្រកបដោយសុវត្ថិភាពនិងគុណភាព។ដោយឡែកមន្រ្តីជាន់ខ្ពស់នៃសមាគមទីភ្នាក់ងារទេសចរណ៍កម្ពុជាបានលើកឡើងថា តាមការសង្កេតការរៀបចំសេវាកាណូតទេសចរណ៍បានល្អអាចទទួលយកបាន តែម្ចាស់កាណូតបើអាចគួរតែប្តូរម៉ាស៊ីនកាណូតរបស់ខ្លួនដើម្បីកាត់បន្ថយសំឡេងរំខាន។
ក្រសួងទេសចរណ៍បានជូនដំណឹងនៅថ្ងៃទី៧ខែសីហាថា ក្រសួងកំពុងបន្តចុះត្រួតពិនិត្យ និងទទួលស្គាល់គុណភាពសេវាកម្មកាណូតទេសចរណ៍កម្ពុជា ដើម្បីធានាថា ការធ្វើដំណើរកម្សាន្តទេសចរណ៍តាមផ្លូវទឹកប្រកបដោយសុវត្ថិភាព និងគុណភាព ស្របតាមលក្ខណៈស្តង់ដារ។ ការវាយតម្លៃសុវត្ថិភាព និងគុណភាពសេវាកម្មកាណូតទេសចរណ៍កម្ពុជា ត្រូវមានលក្ខណៈវិនិច្ឆ័យចំនួន៣៤ និងលក្ខខណ្ឌតម្រូវចំនួន១៩ ក្នុងនោះ ផ្តោតទៅលើ៖ សូចនាករពីបរិស្ថាន, សូចនាករពីការតុបតែងខាងក្នុង, សូចនាករពីសុវត្ថិភាព, សូចនាករពីសំភារៈប្រើប្រាស់ និងសូចនាករពីបុគ្គលិក និងការបម្រើសេវាកម្មទេសចរណ៍។
ក្រសួងទេសចរណ៍បញ្ជាក់ថា ៖ «បច្ចុប្បន្នក្រសួងកំពុងទទួលការដាក់ពាក្យស្នើសុំជាបន្តបន្ទាប់ពីអាជីវកម្មកាណូតទេសចរណ៍ និងកំពុងបន្តចុះត្រួតពិនិត្យសុវត្ថិភាព-គុណភាពសេវាកម្ម មុនឈានដល់ការចេញវិញ្ញាបនបត្របញ្ជាក់គុណភាពសេវាកម្ម ដើម្បីអនុញ្ញាតឱ្យអាជីវកម្មអាចប្រើប្រាស់សម្រាប់ចុះកិច្ចសន្យាជាមួយក្រុមហ៊ុនជាដៃគូរ»។
ក្រសួងទេសចរណ៍ ក៏បន្តលើកទឹកចិត្តដល់អាជីវកម្មកាណូតទេសចរណ៍ផ្សេងទៀត ឱ្យមកដាក់ពាក្យស្នើសុំទទួលស្គាល់គុណភាពសេវាកម្ម ដោយឥតគិតថ្លៃ នៅទីស្តីការក្រសួងទេសចរណ៍រាជធានីភ្នំពេញ ឬតាមរយៈមន្ទីរទេសចរណ៍រាជធានី-ខេត្តផងដែរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានប្រាប់ឱ្យដឹងថា សេវាកម្មកាណូតទេសចរណ៍កម្ពុជា លោកស្រីមើលឃើញថា បច្ចុប្បន្ននេះ ពួកគាត់ជាអ្នកដែលបម្រើសេវាកម្មទាំងនេះ បានរៀបចំល្អប្រសើរសម្រាប់ភ្ញៀវទេសចរអាចទទួលយកបាន ហើយក៏មើលឃើញថា ក្រសួងទេសចរណ៍ ក៏ឧស្សាហ៍ចុះវាយតម្លៃ ត្រួតពិនិត្យ ដើម្បីទទួលស្គាល់ទៅលើសេវាកម្មរបស់អ្នកធ្វើអាជីវកម្មកាណូតទេសចរណ៍នេះផងដែរ។
លោកស្រីបន្តថា អាជីវកម្មកាណូតទេសចរណ៍ទាំងអស់ដែលបានទទួលស្គាល់ពីក្រសួងទេសចរណ៍ គឺប្រាកដណាស់អាជីវកម្មរបស់ពួកគាត់មានស្ដង់ដារអនាម័យ គុណភាពសេវាកម្ម ហើយនិងសោភ័ណភាពនៃការរៀបចំរបស់ពួកគាត់តាមបែបលក្ខណៈធម្មជាតិនៅជុំវិញបឹងទន្លេសាប។
ស្របពេលគុណភាពសេវាកម្ម អនាម័យ មានភាពល្អគួរសមហើយ លោកស្រីក៏បានលើកឡើងដែរថា អ្នកធ្វើអាជីវកម្មកាណូតទេសចរណ៍ ក៏គួរតែផ្លាស់ប្ដូរម៉ាស៊ីនកាណូតរបស់ខ្លួន ដើម្បីកាត់បន្ថយសំឡេងរំខានពីម៉ាស៊ីនកាណូតទៅកាន់ភ្ញៀវទេសចរ ព្រោះបើកម្ពុជាប្រៀបធៀបជាមួយប្រទេសជិតខាង ម៉ាស៊ីនកាណូតទេសចរណ៍ក្នុងប្រទេសជិតខាងកម្ពុជា ត្រូវបានផ្លាស់ប្ដូរអស់ហើយ។
លោកស្រី ឆាយ ស៊ីវលីន ថ្លែងថា ប្រសិនជាយើងអាចធ្វើការផ្លាស់ប្ដូរ ឬដាក់ម៉ាស៊ីនកាណូតដែលស្ងាត់ស្ងៀម នោះវាកាន់តែធ្វើឱ្យល្អថែមទៀតនៅក្នុងសេវាកម្មកាណូតទេសចរណ៍ ទោះបីជាបច្ចុប្បន្ននេះ យើងបានប្រឹងប្រែងល្អច្រើនហើយ ប៉ុន្តែទាស់ត្រង់តែសំឡេងម៉ាស៊ីនវានៅលាន់ដូចសម័យដើមនៅឡើយ។ ដូច្នេះយើងគួរតែផ្លាស់ប្ដរវាទៅ ដើម្បីអាចទាក់ទាញភ្ញៀវទេសចរបន្ថែមទៀត»។
លោកស្រីបន្ថែមថា ពេលខ្លះភ្ញៀវទេសចរធ្លាប់ទទួលសេវាកម្មកាណូតពីប្រទេសជិតខាងកម្ពុជា ដែលធ្វើដំណើរដោយគ្មានសំឡេងម៉ាស៊ីនរំខាន ខណៈដែលកម្ពុជាមានបរិយាកាស ទេសភាពធម្មជាតិដ៏ស្រស់ស្អាត ប៉ុន្តែបែរជាមានសំឡេងរំខានខ្លាំងពីម៉ាស៊ីនកាណូត។ ដូច្នេះវាជារឿងមួយដែលសោកស្ដាយចំពោះទេសភាពធម្មជាតិដ៏ស្រស់ស្អាតបែបនេះ។
យោងតាមក្រសួងទេសចរណ៍ បានឱ្យដឹងថា គិតមកដល់ពេលនេះមានអាជីវកម្មកាណូតទេសចរណ៍ចំនួន២ នៅក្នុងខេត្តសៀមរាប រួមមាន៖ សមាគមកាណូតដឹកភ្ញៀវទេសចរណ៍ចុងឃ្នៀស និងសហគមន៍ទេសចរណ៍ធម្មជាតិ កំពង់ឃ្លំាង ត្រូវបានក្រសួងទេសចរណ៍ទទួលស្គាល់ និងចេញវិញ្ញាបនបត្របញ្ជាក់ពីគុណភាពសេវាកម្ម៕
ដោយ៖ជា សុខនី
