គណបក្សចលនាឆ្ពោះទៅមុខ បដិសេធការបង្កើតសម្ព័ន្ធភាពជាមួយគណបក្សភឿថៃជាថ្មី
ថៃ៖ គណបក្សចលនាឆ្ពោះទៅមុខ (MFP) ដែលឈ្នះការបោះឆ្នោតថៃកាលពីខែឧសភា បានបដិសេធការបង្កើតសម្ព័ន្ធភាពជាមួយគណបក្សភឿថៃជាថ្មី ដើម្បីបង្កើតរដ្ឋាភិបាលបន្ទាប់ ដោយហៅវាថា ជាការបង្ខូចទ្រង់ទ្រាយនៃលទ្ធផលបោះឆ្នោត។
អគ្គលេខាធិការគណបក្ស MFP លោក Chaithawat Tulaton បានប្រាប់សន្និសីទសារព័ត៌មានកាលពីថ្ងៃអង្គារថា ៖ «ការបង្កើតរដ្ឋាភិបាលនៅពេលនេះ មិនឆ្លុះបញ្ចាំងពីសំឡេងរបស់ប្រជាជនទេ និងបំភ្លៃឆន្ទៈរបស់ប្រជាជនក្នុងការបោះឆ្នោត»។
ការថ្លែងយ៉ាងដូច្នេះ ធ្វើឡើងបន្ទាប់ពីសម្ព័ន្ធភាពចម្រុះរបស់គណបក្សនយោបាយទាំង២ បានដួលរលំ បន្ទាប់ពីលោក ភីតា លីមចារ៉នរ៉ាត ដែលជាមេដឹកនាំនៃគណបក្ស MFP មិនទទួលបានសម្លេងគាំទ្រគ្រប់គ្រាន់ពីសមាជិកសភា និងព្រឹទ្ធសភា ដើម្បីក្លាយជានាយករដ្ឋមន្រ្តី និងបង្កើតរដ្ឋាភិបាល។
គណបក្សភឿថៃ ដែលជាគណបក្សមានទំនាក់ទំនងជាមួយអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត បានឆ្ពោះទៅមុខក្នុងការបង្កើតសម្ព័ន្ធភាពថ្មីជាមួយគណបក្សនយោបាយផ្សេងទៀត ដើម្បីព្យាយាមបង្កើតរដ្ឋាភិបាល បន្ទាប់ពីដកខ្លួនចេញពីសម្ព័ន្ធភាពជាមួយ MFP។
ក្រុមអ្នករិះគន់បានចោទប្រកាន់គណបក្សភឿថៃថា បានបោះបង់បក្ស MFP ចោល ដើម្បីធានាថាគណបក្សខ្លួនដឹកនាំរដ្ឋាភិបាល។ យ៉ាងណាមិញ ភឿថៃបានទទូចថា ការដកខ្លួនរបស់បក្ស ធ្វើឡើងដោយការមើលឃើញយ៉ាងច្បាស់ថា គណបក្ស MFP មិនអាចឈ្នះការគាំទ្រពីសមាជិកព្រឹទ្ធសភាអភិរក្សនិយម ដែលប្រឆាំងនឹងគោលនយោបាយសេរីរបស់បក្សនេះ។
គួរបញ្ជាក់ថា ទោះបីជាបក្សភឿថៃមានប្រវត្តិជូរចត់ជាមួយក្រុមយោធាក៏ដោយ ក៏គណបក្សនេះកំពុងបញ្ចុះបញ្ចូលយ៉ាងស្វិតស្វាញ ដើម្បីទាក់ទាញយកការគាំទ្រពីគណបក្សអភិរក្សនិយម និងសមាជិកព្រឹទ្ធសភាផ្សេងទៀត ដែលមានសម្ព័ន្ធភាពជាមួយក្រុមយោធា ដែលធ្លាប់ធ្វើរដ្ឋប្រហាររដ្ឋាភិបាលដឹកនាំដោយគណបក្សនេះរហូតដល់ទៅ២លើក។
ដោយសំដៅលើការចងសម្ព័ន្ធភាពជាមួយក្រុមយោធានិយម លោក Chaithawat នៃគណបក្ស MFP និយាយកាលពីថ្ងៃអង្គារដដែលថា ៖ «យើងមិនចង់មានការពាក់ព័ន្ធណាមួយ នៅក្នុងការបង្កើតរដ្ឋាភិបាលក្រោមលក្ខខណ្ឌបែបនេះនោះទេ»។
យ៉ាងណាមិញ គណបក្សភឿថៃ បានតែងតាំងលោក ស្រេថា ថាវីស៊ីន ឱ្យធ្វើជាបេក្ខជននាយករដ្ឋមន្រ្តីរបស់បក្ស ខណៈអតីតមហាសេដ្ឋីអចលនទ្រព្យរូបនេះ គ្មានបទពិសោធន៍នយោបាយមុនការបោះឆ្នោតនោះទេ។ ប៉ុន្តែដើម្បីទទួលបានជោគជ័យ លោក ស្រេថា នឹងត្រូវការការគាំទ្រឱ្យលើសពីពាក់កណ្ដាលនៃចំនួនសមាជិកសភាទាំង២សរុប ដែលនេះស្ថិតនៅក្នុងភាពស្រពិចស្រពិលនៅឡើយ។
ទោះបីជាយ៉ាងនេះក៏ដោយ មេដឹកនាំគណបក្សភឿថៃ លោក Cholnan Srikaew បាននិយាយថា លោករំពឹងថានឹងមានការបោះឆ្នោតជ្រើសរើសនាយករដ្ឋមន្ត្រីនៅចន្លោះថ្ងៃទី ១៨ ដល់ថ្ងៃទី ២២ ខែសីហា ហើយលោកមានទំនុកចិត្តថា លោក ស្រេថា នៅតែអាចយកឈ្នះបាន ដោយគ្មានការគាំទ្រពីគណបក្ស MFP៕
ប្រែសម្រួល៖ហួន ឌីណា ប្រភព៖ Thailand’s Move Forward Party refuses alliance with runners up
