ភ្នំពេញ៖ មន្រ្តីអ្នកនាំពាក្យនៃបេឡាជាតិសន្តិសុខសង្គម (ប.ស.ស) បានបញ្ជាក់ឱ្យដឹងថា រយៈពេលជិតប្រាំបីខែក្នុងឆ្នាំ២០២៣នេះ ស្រ្តីសម្រាលកូនជិតបួនម៉ឺននាក់ ទទួលបានប្រាក់ឧបត្ថម្ភពីរាជរដ្ឋាភិបាលសរុបប្រមាណជាង ១៦ ៨២៦លានរៀល។

ជាមួយគ្នានេះទឹកប្រាក់សរុបប្រមាណជាងពីរពាន់លានរៀល ត្រូវបានរាជរដ្ឋាភិបាលបើកផ្តល់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ តាមរយៈបេឡាជាតិរបបសន្តិសុខសង្គម (ប.ស.ស) ក្នុងរយៈពេល ២១ ថ្ងៃ ក្នុងខែសីហា ឆ្នាំ២០២៣នេះ។

តាមរយៈ ប.ស.ស លោក ហេង សុផាន់ណារិទ្ធ អគ្គនាយករង និងជាអ្នកនាំពាក្យនៃបេឡាជាតិសន្តិសុខសង្គម បានបញ្ជាក់នៅថ្ងៃទី២១ ខែសីហាថា បន្ទាប់ពីរាជរដ្ឋាភិបាលបានប្រកាសដាក់ចេញនូវគោលនយោបាយផ្តល់ប្រាក់ឧបត្ថម្ភជូនដល់ស្រ្តីមានផ្ទៃពោះ និងកុមារអាយុក្រោម២ឆ្នាំ ចាប់ពីថ្ងៃទី១ រហូតមកដល់ថ្ងៃទី២១ ខែសីហា ទឹកប្រាក់សរុបប្រមាណជាងពីរពាន់លានរៀល ត្រូវបានរាជរដ្ឋាភិបាលបើកផ្តល់ជូនបងប្អូនស្រ្តីមានផ្ទៃពោះ និងកុមារអាយុក្រោម ២ឆ្នាំ តាមរយៈ ប.ស.ស។

លោកបានបន្ថែមថា ក្នុងនោះ ស្រ្តីពិនិត្យផ្ទៃពោះមុនសម្រាលមានចំនួន ២ ៧៥០នាក់, ពិនិត្យសុខភាពក្រោយសម្រាលចំនួន ១ ១០០នាក់, កុមារអាយុក្រោម២ឆ្នាំ ដែលបានទទួលវ៉ាក់សាំងចំនួន ៧៥៤នាក់, និងស្រ្តីបានសម្រាលកូនរួចចំនួន ៣ ២២៧នាក់ ដែលមានចំនួនកូនសរុប ៣ ២៤១នាក់។

លោក ហេង សុផាន់ណារិទ្ធ បានបញ្ជាក់ថា បើគិតចាប់ពីថ្ងៃទី១ ខែមករា រហូតមកដល់ថ្ងៃទី២១ ខែសីហា ឆ្នាំ២០២៣នេះ ប.ស.សបានបើកប្រាក់ឧបត្ថម្ភបន្ថែមរបស់រាជរដ្ឋាភិបាលសរុបប្រមាណជាង ១៦ ៨២៦លាន ៧២ម៉ឺន រៀល ដល់សមាជិក ប.ស.ស ជាស្រ្តីសម្រាលកូនសរុបចំនួន ៣៩ ៩៤៧នាក់ និងមានចំនួនកូនសរុប ៤០ ២២៣នាក់»។

ទន្ទឹមនឹងការផ្តល់ប្រាក់ឧបត្ថម្ភរបស់រាជរដ្ឋាភិបាលនេះដែរ បេឡាជាតិសន្តិសុខសង្គម ក៏បានបើកផ្តល់តាវកាលិកផ្នែកថែទាំសុខភាពជូនសមាជិករបស់ខ្លួន ទាំងក្នុងវិស័យឯកជន និងវិស័យសាធារណៈ ដែលក្នុងរយៈពេលដូចគ្នា គឺចាប់ពីថ្ងៃទី១ ខែមករា រហូតដល់ថ្ងៃទី២១ ខែសីហានេះ ប.ស.ស. បានចំណាយថវិកាប្រមាណជាង ៨៣ ៨១៧លានរៀលស្មើនឹង ៤៦ ៩៩១ ករណី។

លោកបានសង្កត់ធ្ងន់ថា ៖ «តាមរយៈការផ្តល់នូវប្រាក់ឧបត្ថម្ភ រួមទាំងអត្ថប្រយោជន៍ជាច្រើននេះ សរបញ្ជាក់ឱ្យឃើញថា រាជរដ្ឋាភិបាលបានផ្តល់ការគាំពារ និងយកចិត្តទុកដាក់កាន់តែខ្ពស់ចំពោះសុខុមាលភាព និងជីវភាពរស់នៅរបស់ប្រជាពលរដ្ឋ ពិសេសកម្មករនិយោជិត តាមរយៈគោលនយោបាយដែលបានដាក់ចេញថ្មីៗជាបន្តបន្ទាប់»។

លោក ហេង សុផាន់ណារិទ្ធ ធ្លាប់បានបញ្ជាក់កាលពីសប្តាហ៍មុនថា រដ្ឋាភិបាលដែលកើតចេញពីគណបក្សប្រជាជនកម្ពុជា នឹងបន្តអនុវត្តនូវកម្មវិធីនានា ក៏ដូចជាកម្មវិធីនៃការផ្តល់ប្រាក់ឧបត្ថម្ភដល់ស្ត្រីមានផ្ទៃពោះ និងកូនអាយុក្រោម ២ ឆ្នាំ បើទោះបីជាមានការផ្លាស់ប្តូរនាយករដ្ឋមន្រ្តីថ្មីក៏ដោយ។

លោកថា ការផ្តល់ប្រាក់ឧបត្ថម្ភនេះគឺជាគោលនយោបាយរបស់រាជរដ្ឋាភិបាលដែលកើតចេញពីកម្មវិធីគោលនយោបាយរបស់គណបក្សប្រជាជនកម្ពុជា ក្នុងការចូលរួមលើកកម្ពស់សុខមាលភាពមាតា ទារក ជាដើម៕ ដោយ៖ នាង សុគន្ធា