បុរសម្នាក់នៅខេត្តកំពង់ចាមកែច្នៃចេកទៅជាស្ករ និងស្រាដាក់លក់ក្នុងផ្សារទំនើបនិងអាចនាំទៅក្រៅប្រទេស
កំពង់ចាម៖ ចេក គឺជាដំណាំមួយប្រភេទដ៏ពេញនិយម និងជាតម្រូវការសម្រាប់មនុស្សគ្រប់រូបទាំងនៅកម្ពុជា និងបរទេស។ ផ្លែចេកតែងត្រូវបានពលរដ្ឋខ្មែរ យកទៅកែច្នៃជាបង្អែម និងអាហារជាច្រើនប្រភេទទៅតាមតម្រូវការ និងចំណង់ចំណូលចិត្ត។
ប្រើប្រាស់អត្ថប្រយោជន៍នៃផ្លែចេក បុរសម្នាក់នៅឃុំតាអុង ស្រុកចម្ការលើ ខេត្តកំពង់ចាម បានកែច្នៃចេក ទៅជាផលិតផលស្ករចេកដែលអាចនាំចេញទៅបរទេស និងស្រាចេកដែលអាចដាក់លក់ក្នុងផ្សារទំនើបធំៗទូទាំងប្រទេសផងដែរ។
លោក លឹម ផារ៉ា នាយកប្រតិបត្តិសហគ្រាសគំនិតថ្មីដែលកែច្នៃចេកទៅជាស្ករ និងស្រា បានប្រាប់ឱ្យដឹងថា មូលហេតុដែលនាំឱ្យលោកឈានដល់ការបង្កើតសហគ្រាសនេះឡើង ដោយសារបញ្ហាកកស្ទះកសិផលចេកខ្មែរ ទើបលោកស្វែងរកគំនិតក្នុងការកែច្នៃកសិផលទាំងនោះ។ ម្យ៉ាងគឺដោយសារតែលោកផ្ទាល់ និងគ្រួសារមានបទពិសោធន៍ច្រើនជាមួយនឹងកសិផលប្រភេទនេះ ដ្បិតនៅឃុំតាអុង ស្រុកចម្ការលើជាតំបន់ដែលដាំដុះចេកច្រើន។
សហគ្រាសមួយនេះបានបង្កើតឡើងតាំងពីឆ្នាំ ២០១៣ ដោយដើមឡើយ គឺមានការកែច្នៃត្រឹមតែផលិតផលស្ករចេកប៉ុណ្ណោះ។ លុះដល់ឆ្នាំ ២០១៥ ដោយហេតុថាបន្ទាប់ពីគាបយកទឹកចេកដើម្បីផលិតស្ករចេករួច កាករបស់វាគឺត្រូវចោល ដូចនេះហើយទើបម្ចាស់សហគ្រាសរូបនេះយកសាច់ចេកទាំងនោះបន្តកែច្នៃទៅជាស្រាដែលមានគុណភាពមួយមុខថែមទៀត។
ទាក់ទិនទៅនឹង ការកែច្នៃស្ករចេក លោក លឹម ផារ៉ា បានឱ្យដឹងថា មានផលវិបាកខ្លាំងនៅគ្រាដំបូង ពោលទាំងការផលិតម៉ាស៊ីនដើម្បីកែច្នៃ ហើយវាក៏ទាមទារពេលក្នុងការស្រាវជ្រាវយូរដោយហេតុថាពុំមានប្រទេសផ្សេងផលិតផលិតផលប្រភេទនេះឡើយ។ ការស្រាវជ្រាវ និងផលិតម៉ាស៊ីន បានចាយពេលអស់រយៈប្រមាណពីរឆ្នាំទើបអាចចាប់ផ្ដើមដំណើរការកែច្នៃបាន ។
លោក លឹម ផារ៉ា បានរៀបរាប់ឱ្យដឹងថា ស្ករចេក គឺជាស្ករមួយប្រភេទដែលអាចប្រើប្រាស់បានដូចស្ករសដែរ ហើយថែមទាំងមានកម្រិតជាតិផ្អែមតិចជាងទៀតផង។ លោកបានបញ្ជាក់ថា បើយោងតាមឯកសារស្រាវជ្រាវមួយចំនួនស្ករចេកនេះអាចជួយគ្រប់គ្រងជាតិស្ករក្នុងឈាមដែលជាអត្ថប្រយោជន៍សុខភាព និងមានអត្ថប្រយោជន៍មួយចំនួនទៀតផងដែរ។
មកទល់បច្ចុប្បន្ន ស្ករចេករបស់សហគ្រាសគំនិតថ្មីត្រឹមតែមានលក់នៅផ្សារទំនើបធំៗនៅស្រុកខ្មែរប៉ុណ្ណោះទេ តែស្ករមួយប្រភេទនេះថែមទាំងអាចនាំចេញទៅក្រៅប្រទេសដូចជា ប្រទេសអាល្លឺម៉ង់ និងប្រទេសកូរ៉េដែរ។
ដោយឡែក សម្រាប់ការកែច្នៃស្រាចេកវិញ លោក លឹម ផារ៉ា បានឱ្យដឹងថា មួយផ្នែកគឺបានមកពីរូបមន្តដូនតារបស់លោក ពោលគឺអ្នកជំនាញក្នុងតំបន់របស់លោក និងមួយផ្នែកទៀត បានមកពីមិត្តភ័ក្ដិដែលមានជំនាញស្តង់ដារក្នុងការកែច្នៃស្រា បូកបញ្ចូលគ្នាទើបឈានដល់ការអភិវឌ្ឍស្រានេះឱ្យទៅជាផលិតផលស្តង់ដារ និងគុណភាពខ្ពស់។
បច្ចុប្បន្នស្រាចេក របស់សហគ្រាសគំនិតថ្មី បានដាក់លក់នៅតាមបណ្ដាលផ្សារទំនើបធំៗជាច្រើនដូចជា៖ ផ្សារទំនើបជីបម៉ុង, ផ្សារទំនើបអ៊ីអន, ផ្សារម៉ាត 7 Eleven និងផ្សារទំនើបនៅខេត្តព្រះសីហនុ ខណៈមុនពេលមានវិបត្តិកូវីដ១៩ ស្រាមួយប្រភេទនេះមានវត្តមាននៅតាមបណ្ដាផ្សារតូចធំ ៤០០កន្លែងឯណោះ។
លោក លឹម ផារ៉ា បានឱ្យដឹងដែរថា ៖ «ស្រាចេកនេះមានរសជាតិផ្អែមដែលស្រដៀងទៅនឹងស្រាទំពាំងបាយជូរដែរ គ្រាន់តែមិនចត់ខ្លាំងដូចស្រាទំពាំងបាយជូរទេ»។
ដំណើរការអាជីវកម្មប្រមាណជា ១០ឆ្នាំ លោក លឹម ផារ៉ា ក៏ថ្លែងឱ្យដឹងពីផលវិបាកនៃការកែច្នៃ ផងដែរ ពោល គឺការខ្សត់ចេកតាមរដូវកាលមួយចំនួន ដោយហេតុថាកសិករត្រូវឆ្លាស់ប្ដូរការដាំទៅជាដំណាំផ្សេងដែលកំពុងមានទីផ្សារខ្ពស់ ឬលក់បានតម្លៃថ្លៃ។
ក្នុងនាមជាអ្នកកែច្នៃផលិតផលក្នុងស្រុកមួយរូប និងជាអនុប្រធានសមាគមអ្នកផលិតចំណីអាហារកម្ពុជា លោក លឹម ផារ៉ា ចង់ផ្តល់ជាយោបល់ទៅដល់ទាំងកសិករ និងអ្នកផលិតឱ្យយោគយល់គ្នា និងព្យាយាមស្វែងរកដំណោះស្រាយឈ្នះៗមួយរវាងភាគីទាំងសងខាងដើម្បីជំរុញការកែច្នៃក្នុងស្រុក។
លោកសង្កត់ធ្ងន់ថា ៖ «រាល់ថ្ងៃបញ្ហាចម្បងមួយគឺ កិច្ចសន្យាកសិកម្ម ដែលធ្វើឱ្យអ្នកផលិតមិនទុកចិត្តកសិករ ហើយកសិករមិនទុកចិត្តអ្នកផលិត។ អ៊ីចឹងទៅធ្វើឱ្យទាំងអ្នកផលិត និងកសិករពិបាកទៅវិញទៅមក អ្នកផលិតពិបាករកវត្ថុធាតុដើម ឯកសិករពិបាករកអ្នកទិញកសិផល»។
ជាមួយគ្នានេះដែរ លោក លឹម ផារ៉ា សំណូមពរទៅដល់អតិថិជនក្នុងស្រុកទាំងអស់ឱ្យចូលរួមគាំទ្រផលិតផលកែច្នៃក្នុងស្រុកទាំងអស់ ដើម្បីពង្រឹងសេដ្ឋកិច្ចជាតិ ខណៈពេលដែលសេដ្ឋកិច្ចសកលកំពុងស្ថិតក្នុងសភាពមិននឹងន៕
ដោយ៖ស្រ៊ុន សិរីវឌ្ឍនៈ
