ការស្ទង់មតិ៖ ប្រជាជនថៃភាគច្រើនប្រឆាំងនឹងការបង្កើតរដ្ឋាភិបាលចម្រុះរបស់គណបក្សភឿថៃ
ថៃ៖ ការស្ទង់មតិមួយកាលពីថ្ងៃអាទិត្យ បានបង្ហាញថា ប្រជាជនថៃភាគច្រើនមិនយល់ស្របនឹងផែនការបង្កើតរដ្ឋាភិបាលចម្រុះជាមួយគណបក្សដែលគាំទ្រដោយយោធា។ ការស្ទង់មតិនេះ ត្រូវបានធ្វើឡើងនៅពីរថ្ងៃមុនការបោះឆ្នោតសភា ពោលគឺជាការបោះឆ្នោតដែលគេរំពឹងថានឹងអាចបញ្ចប់ភាពជាប់គាំងនយោបាយនៅប្រទេសថៃអស់រយៈពេលបីខែមកនេះ។
សូមបញ្ជាក់ថា ចំនួន ៦៤ភាគរយនៃអ្នកចូលរួមឆ្លើយសំណួរស្ទង់មតិសរុប ១ ៣១០នាក់ មិនយល់ស្រប ឬមិនយល់ស្របទាំងស្រុងចំពោះគណបក្សភឿថៃដែលចង់បង្កើតរដ្ឋាភិបាលចម្រុះជាមួយគូប្រជែងដែលជាគណបក្សគាំទ្រដោយយោធា នេះបើយោងតាមការស្ទង់មតិដោយវិទ្យាស្ថានជាតិគ្រប់គ្រងការអភិវឌ្ឍ។
គួរដឹងដែរថា ប្រទេសថៃបានស្ថិតនៅក្រោមការដឹកនាំដោយរដ្ឋាភិបាលចាំផ្ទះអស់រយៈពេលប្រាំខែមកហើយ ដោយសារតែត្រូវប្រឈមមុខនឹងភាពមិនប្រាកដប្រជា បន្ទាប់ពីគណបក្សដែលបានឈ្នះការបោះឆ្នោតកាលពីខែឧសភា គឺគណបក្សឈានទៅមុខ (Move Forward Party) ត្រូវបានរារាំងពីសំណាក់សមាជិកសភាអភិរក្សនិយម និងរាជានិយម មិនឱ្យបង្កើតរដ្ឋាភិបាលថ្មីបាន។
ក្រោយការខកខានមិនអាចបង្កើតរដ្ឋាភិបាលថ្មីបានគណបក្សដែលឈរនៅលេខរៀងទី២ គឺគណបក្សភឿថៃ ដែលជាគណបក្សត្រូវបានបង្កើតឡើងដោយគ្រួសារមហាសេដ្ឋីនិរទេសខ្លួន និងដែលជាអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា បាននិងកំពុងខិតខំប្រឹងប្រែងបង្កើតរដ្ឋាភិបាលវិញម្ដង។
កាលពីថ្ងៃអាទិត្យ លោកស្រី ផែថងថាន ស៊ីណាវ៉ាត្រា (Paetongtarn Shinawatra) ដែលជាកូនស្រីរបស់លោកថាក់ស៊ីន និងជាបេក្ខភាពនាយករដ្ឋមន្ត្រីម្នាក់ក្នុងចំណោមបេក្ខភាពនាយករដ្ឋមន្ត្រីទាំងបីនាក់របស់គណបក្សភឿថៃ បានធ្វើការសុំទោសដល់អ្នកគាំទ្រ ដោយសារតែគណបក្សនេះមិនអាចរក្សាការសន្យារបស់ខ្លួនដែលថានឹងមិនចូលរួមជាមួយគណបក្សដែលគាំទ្រដោយពួកយោធា។
លោកស្រីបានប្រាប់ទៅកាន់អ្នកសារព័ត៌មានថា ៖ «យើងត្រូវតែធ្វើការកែតម្រូវដើម្បីនាំប្រទេសជាតិឲ្យឈានទៅមុខបាន។ ដូច្នេះវាជាការពិតណាស់ដែលថា បក្សភឿថៃនឹងត្រូវទទួលរងនូវការរិះគន់ពីប្រជាជន។ យើងសូមធ្វើការទទួលយកនូវការរិះគន់ទាំងអស់នោះ និងសុំទោសចំពោះការធ្វើឱ្យមនុស្សជាច្រើនខកចិត្ត និងសោកសៅ»។
លោកស្រី ផែថងថាន ក៏បានបន្ថែមថា គណបក្សភឿថៃនឹងខិតខំធ្វើការឱ្យអស់ពីសមត្ថភាពដើម្បីដោះស្រាយបញ្ហារបស់ប្រទេសថៃ ប្រសិនបើខ្លួនអាចបង្កើតរដ្ឋាភិបាលបាន។ គណបក្សភឿថៃ ក៏បានរៀបចំបេក្ខភាពនាយករដ្ឋមន្ត្រីមួយរូបទៀតរួចជាស្រេចហើយ ដែលលោកគឺជាមហាសេដ្ឋីអចលនទ្រព្យ លោក ស្រេតថា ថាវីស៊ីន (Srettha Thavisin)។
គួរបញ្ជាក់ថា លោក ថាវីស៊ីន ត្រូវការសំឡេងគាំទ្រពីសភាទ្វេភាគីឱ្យបានច្រើនជាងពាក់កណ្តាល ជាពិសេសសមាជិកព្រឹទ្ធសភាដែលតែងតាំងដោយរបបយោធាផ្ទាល់។
លោកស្រី ផែថងថាន បានលើកឡើងកាលពីថ្ងៃសៅរ៍ថា នៅថ្ងៃអង្គារ៍ទី២២ ខែសីហា លោក ថាក់ស៊ីន គ្រោងនឹងត្រឡប់ចូលប្រទេសថៃវិញ បើទោះជាត្រូវប្រឈមនឹងការកាត់ទោសជាប់ពន្ធនាគារក៏ដោយ។ កាលពីថ្ងៃអាទិត្យ អ្នកស្រីបាននិយាយថា «ការវិលត្រឡប់របស់លោក ថាក់ស៊ីន មិនមានពាក់ព័ន្ធនឹងរឿងនយោបាយនោះទេ ហើយគាត់គ្រាន់តែចង់ត្រឡប់មកនៅប្រទេសកំណើតវិញតែប៉ុណ្ណោះ»។
គួររំឭកថា រដ្ឋាភិបាលដែលដឹកនាំគណបក្សភឿថៃ ត្រូវបានបណ្តេញចេញដោយរដ្ឋប្រហារយោធាក្នុងឆ្នាំ២០០៦ និងឆ្នាំ២០១៤។ នៅពេលនោះផងដែរ លោក ថាក់ស៊ីន និងប្អូនស្រីរបស់លោក គឺលោកស្រី យីងឡាក់ ស៊ីណាវ៉ាត្រា ត្រូវបានបណ្ដេញចេញពីប្រទេសថៃ ដោយសារតែមានទំនាស់ផលប្រយោជន៍រវាងបក្ស និងឥស្សរជនដ៏មានឥទ្ធិពល និងពួកយោធារាជានិយម។
យោងតាមការស្ទង់មតិកាលពីថ្ងៃអាទិត្យ សំឡេងគាំទ្ររបស់លោកស្រី ផែនថងថាន ឱ្យក្លាយជានាយករដ្ឋមន្ត្រីមានចំនួន ៣៨,៦ភាគរយ បន្ទាប់មកលោក ថាវីស៊ីន មានចំនួន ៣៦,៦ភាគរយ។ កាលពីថ្ងៃព្រហស្បតិ៍ផងដែរ គណបក្សភឿថៃក៏ទទួលបានការប្រកាសគាំទ្រពីគណបក្សរួមថៃសាងជាតិ (United Thai Nation Party) ដែលជាដៃគូប្រជែងនិងជាគណបក្សដែលមានការគាំទ្រដោយពួកយោធា។
បន្ថែមលើនេះ សមាជិកសភាមកពីគណបក្សផាឡាំងប្រាឆារ៉ាត់ (Palang Pracharat Party) ក៏ធ្លាប់បានប្រកាសគាំទ្រគណបក្សភឿថៃ ឱ្យដឹកនាំបង្កើតរដ្ឋាភិបាល ដើម្បីដោះស្រាយភាពជាប់គាំងនយោបាយដែលបានអូសបន្លាយយ៉ាងយូរ៕
ប្រែសម្រួល៖ធា សុណា
ប្រភពព័ត៌មាន៖ Reuters
Most Thais oppose plan for Pheu Thai-military coalition government – poll
