បាងកក៖ នៅទីបំផុត សភាថៃបានបោះឆ្នោតជ្រើសរើសលោក Srettha Thavisin ជានាយករដ្ឋមន្ត្រីថ្មីរបស់ប្រទេសថៃជាផ្លូវការហើយ។

សភាថៃបានបោះឆ្នោតជ្រើសរើសលោក Srettha Thavisin ជានាយករដ្ឋមន្ត្រីថ្មីរបស់ប្រទេសថៃ នៅថ្ងៃទី២២ ខែសីហា ឆ្នាំ២០២៣ ដែលនេះនឹងនាំទៅរកការបិទបញ្ចប់ភាពជាប់គាំងនយោបាយ ចាប់តាំងពីការបោះឆ្នោតសកលកាលពីខែឧសភាមក។ លទ្ធផលបោះឆ្នោតបានបង្ហាញថា សមាជិកព្រឹទ្ធសភា និងរដ្ឋសភាលើស ៣៧៥រូបបានបោះឆ្នោតគាំទ្រលោក Srettha Thavisin។

សូមបញ្ជាក់ថា គណបក្សភឿថៃ នៅថ្ងៃទី២២ ខែសីហាដដែលនេះ បានប្រកាសជាផ្លូវការពីការតែងតាំងមហាសេដ្ឋីអចលនទ្រព្យ លោក Srettha Thavisin ជាបេក្ខជននាយករដ្ឋមន្ត្រីរបស់ខ្លួន សម្រាប់ការបោះឆ្នោតជ្រើសរើសនាយករដ្ឋមន្ត្រីថ្មីថៃរបស់សភា។

លោក Srettha នឹងបន្តតំណែងលោក ប្រាយុទ្ធ ចាន់អូចា ដែលជានាយករដ្ឋមន្រ្តីចាំផ្ទះថៃ ដែលបានកាន់អំណាចតាំងពីឆ្នាំ២០១៤ នៅពេលដែលលោកបានទម្លាក់រដ្ឋាភិបាលភឿថៃមុន ក្នុងរដ្ឋប្រហារ៕ ប្រភព៖ AFP ប្រែសម្រួលដោយ៖ ឈឹម ទីណា