នីញ៉ាម៉េ៖ ក្រុមបាតុកររាប់ពាន់នាក់ក្នុងប្រទេស នីហ្សេ កាលពីថ្ងៃអាទិត្យ បានបន្តធ្វើបាតុកម្ម នៅថ្ងៃទីបី ទាមទារឱ្យអតីតមេដឹកនាំអាណានិគមបារាំង ដកទ័ពរបស់ខ្លួនចេញ ដូចនឹងការចង់បានរបស់របបយោធា ដែលបានដណ្តើមអំណាច កាលពីខែកក្កដា។

ក្រុមបាតុករបានស្រែកពាក្យស្លោកដដែលៗ នៅក្នុងការជួបជុំគ្នា ក្នុងរដ្ឋធានី នីញ៉ាម៉េ (Niamey) ចាប់តាំងពីរដ្ឋប្រហារ ថ្ងៃទី ២៦ ខែកក្កដាថា «បារាំងទម្លាក់ចុះទៅ! បារាំងចេញទៅ»។

របបយោធារបស់នីហ្សេបានបោះពាក្យសម្តីថ្មីមួយ កាលពីថ្ងៃសុក្រ ដោយចោទប្រកាន់រដ្ឋាភិបាលបារាំងថា «ជ្រៀតជ្រែកដោយឥតលាក់លៀម» ហើយគាំទ្រប្រធានាធិបតីប្រទេសនីហ្សេ ដែលទើបត្រូវបានបណ្តេញចេញ។ ចាប់តាំងពីពេលនោះមក មនុស្សរាប់ម៉ឺននាក់បានចូលរួមក្នុងការតវ៉ានៅរង្វង់មូលមួយ នៅជិតមូលដ្ឋានយោធានីហ្សេ ជាទីដែលទាហានបារាំងឈរជើង។

កាលពីនៅថ្ងៃទី៣ ខែសីហា របបយោធាបានប្រកាសលុបចោលកិច្ចព្រមព្រៀងយោធា ជាមួយប្រទេសបារាំងដែលមានទាហានប្រហែល ១៥០០ នាក់ឈរជើង នៅក្នុងប្រទេសនីហ្សេ។

មេដឹកនាំយោធាក៏បានប្រកាស “បណ្តេញចេញ” ឯកអគ្គរដ្ឋទូតបារាំងហើយបាននិយាយថា ពួកគេកំពុងដកអភ័យឯកសិទ្ធិការទូតទៀតផង ។ ពួកគេបាននិយាយថា វត្តមានរបស់លោកទូត គឺជាការគំរាមកំហែងដល់សណ្តាប់ធ្នាប់សាធារណៈ៕

ប្រភពពី AFP ប្រែសម្រួល៖ សារ៉ាត