ចិន ហាមមន្ត្រីរដ្ឋាភិបាលមិនឱ្យប្រើប្រាស់ផលិតផលក្រុមហ៊ុនអេបផលសម្រាប់ការងារ
ប៉េកាំង៖ ប្រទេសចិនបានដាក់បម្រាមទៅកាន់មន្ត្រីរបស់រដ្ឋាភិបាលមិនឱ្យប្រើប្រាស់ទូរស័ព្ទអាយហ្វូន( iPhone) របស់ក្រុមហ៊ុន អេបផល(Apple) និងឧបករណ៍ដែលមានម៉ាកបរទេសផ្សេងទៀតសម្រាប់ការងារ ឬសូម្បីតែនាំឧបករណ៍ទំនាក់ទំនងម៉ាកបរទេសណាមួយចូលទៅក្នុងការិយាល័យធ្វើការ។ នេះបើតាមការរាយការណ៍របស់កាសែត Wall Street Journal កាលពីថ្ងៃពុធកន្លងទៅ។
ការហាមប្រាមនេះធ្វើឡើងមុនព្រឹត្តិការណ៍ Apple (AAPL.O) នៅសប្តាហ៍ក្រោយ ដែលអ្នកវិភាគជឿថាក្រុមហ៊ុន iPhone នឹងបញ្ចេញនូវទូរស័ព្ទស៊េរីថ្មី ដែលអាចបង្កឱ្យមានការប្រកួតប្រជែងក្នុងចំណោមក្រុមហ៊ុនបរទេសដែលកំពុងប្រតិបត្តិការនៅក្នុងប្រទេសចិន ហើយក៏ស្របពេលដែលភាពតានតឹងរវាងចិន និងសហរដ្ឋអាមេរិកកំពុងកើនឡើងផងដែរ។
អស់រយៈពេលជាងមួយទសវត្សមកហើយ ប្រទេសចិនកំពុងតែរិះរកវិធីដើម្បីកាត់បន្ថយការពឹងផ្អែកលើបច្ចេកវិទ្យាបរទេស ដោយស្នើឱ្យក្រុមហ៊ុនពាក់ព័ន្ធរបស់រដ្ឋដូចជាធនាគារប្តូរទៅប្រើប្រាស់កម្មវិធីក្នុងស្រុក និងជំរុញការផលិតបន្ទះឈីបក្នុងស្រុកវិញជាដើម។
អ្នកវិភាគជាច្រើនបាននិយាយកាលពីថ្ងៃពុធថា សកម្មភាពរបស់ទីក្រុងប៉េកាំងកំពុងតែបង្ហាញពីឆន្ទៈ ដែលចង់លុបបំបាត់ក្រុមហ៊ុនបច្ចេកវិទ្យាអាមេរិកចេញពីប្រទេសរបស់ខ្លួន ដើម្បីបង្កើនឯករាជ្យភាព។
ក្រុមអ្នកវិភាគបានបន្តទៀតថា តាមរយៈការស្ដែងចេញបែបនេះ អាមេរិកគួរតែកាត់បន្ថយការពឹងផ្អែក ទាំងអតិថិជននិងខ្សែច្រវាក់ផ្គត់ផ្គង់ពីប្រទេសចិន ដើម្បីទប់ទល់នូវស្ថានការណ៍កាន់តែតឹងតែង ណាមួយនាពេលអនាគត។
រីឯភាពតានតឹងរវាងចិន និងអាមេរិកបានកើនឡើងកាន់តែខ្លាំង នៅពេលដែលទីក្រុងវ៉ាស៊ីនតោន បានធ្វើការជាមួយសម្ព័ន្ធមិត្តក្នុងការរារាំងការចូលប្រើប្រាស់ឧបករណ៍សំខាន់ៗរបស់ប្រទេសចិន ដើម្បីរក្សាការប្រកួតប្រជែងឧស្សាហកម្មបន្ទះឈីបរបស់ខ្លួន។ ជាការតបស្នង ទីក្រុងប៉េកាំងបានដាក់ច្បាប់រិតបន្តឹងលើការនាំចូលទំនិញសំខាន់ៗរបស់សហរដ្ឋអាមេរិក ក្នុងនោះក៏មានការរឹតបន្តឹងលើការ នាំចេញក្រុមហ៊ុនផលិតយន្តហោះ Boeing (BA.N) និងក្រុមហ៊ុនបន្ទះឈីប Micron Technology (MU .O) ដែលមានទីតាំងដំឡើងនៅក្នុងប្រទេសចិនផងដែរ។
នៅលើទឹកដីសហរដ្ឋអាមេរិកឯណោះវិញ ក៏មាននូវការរិតបន្តឹងទៅលើក្រុមហ៊ុនចិនផងដែរ ដោយចុងក្រោយនេះសហរដ្ឋអាមេរិកបានចេញសកម្មភាពប្រឆាំងនឹងក្រុមហ៊ុនផលិតស្មាតហ្វូនចិន Huawei Technologies និងវេទិកាវីដេអូខ្លី TikTok ដែលជាកម្មសិទ្ធិរបស់ ByteDance របស់ប្រទេសចិន។
ដោយឡែក ក្នុងកំលុងពេលនៃការដំណើរទស្សនកិច្ចទៅកាន់ប្រទេសចិនកាលពីសប្តាហ៍មុន រដ្ឋមន្ត្រីក្រសួងពាណិជ្ជកម្មអាមេរិក លោកស្រី Gina Raimondo បាននិយាយថា ក្រុមហ៊ុនអាមេរិកបានត្អូញត្អែរទៅកាន់លោកស្រីថា ប្រទេសចិនបានក្លាយទៅជាប្រទេសដែលពិបាកក្នុងការធ្វើសកម្មភាពវិនិយោគ ដោយជារឿយៗតែងមានការផាកពិន័យ ការវាយឆ្មក់ និងសកម្មភាពផ្សេងទៀតដែលធ្វើឱ្យវាមានហានិភ័យក្នុងការធ្វើអាជីវកម្មនៅក្នុងប្រទេសដែលមានសេដ្ឋកិច្ចធំលំដាប់ទី២លើពិភពលោកមួយនេះ។
គួរបញ្ជាក់ថា ប្រទេសចិនគឺជាទីផ្សារដ៏ធំបំផុតមួយរបស់ក្រុមហ៊ុន Apple ដោយគ្រាន់តែទីផ្សារចិនមួយអាចបង្កើតប្រាក់ចំណូលបានជិតមួយភាគប្រាំនៃប្រាក់ចំណូលសរុបរបស់ខ្លួន៕
ប្រែសម្រួល៖ កែវ បុស្បា ប្រភព៖ https://www.reuters.com/world/china/china-bans-govt-officials-using-iphone-work-wsj-2023-09-06/
