គណបក្សភ្លើងទៀន កំពុងរៀបចំឯកសារស្នើសុំជួបរដ្ឋមន្រ្តីក្រសួងមហាផ្ទៃ ពិភាក្សាការចុះបញ្ជីគណបក្ស
ភ្នំបេញ៖ លោក រ៉ុង ឈុន អនុប្រធានគណបក្សភ្លើងទៀន បានប្រាប់ឱ្យដឹងថា គណបក្សរបស់លោកកំពុងរៀបចំឯកសារឡើងវិញ ដើម្បីដាក់សំណើសុំជួបជាមួយឯកឧត្តមអភិសន្តិបណ្ឌិតឧបនាយករដ្ឋមន្រ្តី ស សុខា រដ្ឋមន្ត្រីក្រសួងមហាផ្ទៃ ជាថ្មីម្តងទៀត ដើម្បីពិភាក្សាពាក់ព័ន្ធការចុះបញ្ជីគណបក្សនយោបាយរបស់ខ្លួន។
ការស្នើសុំជួបនេះ ក្នុងគោលបំណងដើម្បីពិភាក្សាលើការរកដំណោះស្រាយពាក់ព័ន្ធឯកសារលិខិតបញ្ជាក់ការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ បន្ទាប់ពីត្រូវបានបដិសេធទទួលយកសំណើ កាលពីមុនពេលរដ្ឋាភិបាលអាណត្តិទី៧បង្កើតរូបរាងឡើង។
លោក រ៉ុង ឈុន បានប្រាប់ឱ្យដឹងនៅថ្ងៃទី៧ ខែកញ្ញា ឆ្នាំ២០២៣ ដោយបញ្ជាក់ថា ៖ «កាលមុនបោះឆ្នោត យើងបានស្នើទៅក្រសួងមហាផ្ទៃ តែគេថាចាំបោះឆ្នោតហើយ។ លុះបោះឆ្នោតហើយ នៅថ្ងៃទី២ ខែសីហា គណបក្សបានដាក់ម្តងទៀត មន្រ្តីនៃក្រសួងមហាផ្ទៃមិនទទួលទេ ប៉ុន្តែបានប្រាប់មកវិញថា ចាំបង្កើត
រដ្ឋាភិបាលថ្មីហើយ»។
លោកបានបន្តថា ៖ «មកដល់ពេលនេះ ការបង្កើតរាជរដ្ឋាភិបាល ក៏បានបង្កើតរួចហើយដែរ ដូចនេះ គណបក្សយើងនឹងដាក់សំណើសុំជួបម្តងទៀតក្នុងពេលឆាប់ៗខាងមុខនេះ តែយើងមិនទាន់កំណត់ថ្ងៃជាក់លាក់នៅឡើយទេ»។
បើតាម លោក រ៉ុង ឈុន ការដាក់ឯកសារ ដើម្បីស្នើសុំជួបជាមួយឯកឧត្តមអភិសន្តិបណ្ឌិត ស សុខា ដែលជារដ្ឋមន្ត្រីថ្មីនៃក្រសួងមហាផ្ទៃនេះ បន្ទាប់ពីក្រសួងឱ្យរង់ចំនៅក្រោយការបង្កើតរាជរដ្ឋាភិបាលថ្មី ដែលគិតទល់ពេលនេះ មានរយៈពេលជាង ១០ ថ្ងៃមកហើយ។ តែយ៉ាងណាក្តី អនុប្រធានគណបក្សប្រឆាំងរូបនេះ នៅតែអះអាងថា គណបក្សនឹងដាក់សំណើទៅម្តងទៀត។
អ្នកនាំពាក្យក្រសួងមហាផ្ទៃ លោក ផាត សុផានិត នៅថ្ងៃទី៧ ខែកញ្ញា ឆ្នាំ២០២៣ បានប្រាប់ឱ្យដឹងតាមរយៈប្រព័ន្ធតេឡេក្រាមថា ចំពោះលោកផ្ទាល់ មិនមានយោបល់អ្វីនោះទេចំពោះសំណើផ្សេងៗរបស់គណបក្សនយោបាយ។
លោកបានបញ្ជាក់ថា ៖ «ក្រសួងនឹងពិនិត្យលើសំណើរបស់គ្រប់បណ្តាគណបក្សនយោបាយដែលដាក់មកក្រសួង ហើយនឹងចាត់ចែងអនុវត្តទៅតាមអ្វីដែលច្បាប់អនុញ្ញាត»។
សូមបញ្ជាក់ថា គណៈកម្មាធិការជាតិរៀបចំការបោះឆ្នោត (គ.ជ.ប) បានបដិសេធមិនទទួលស្គាល់ និង
មិនអនុញ្ញាតឱ្យគណបក្សភ្លើងទៀន ចូលរួមក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ កាលពីខែកក្កដាកន្លងមកឡើយ ដោយសារមិនមានឯកសារគ្រប់គ្រាន់៕
ដោយ៖ គឹម យុត្ថារ៉ូ
