មនុស្សរាប់ពាន់នាក់អាចនឹងស្លាប់ ក្រោយពេលបាត់ខ្លួនដោយសារទឹកជំនន់ភ្លាមៗនៅលីប៊ី
លីប៊ី៖ បណ្ដាញព័ត៌មាន Al Jazeera បានចុះផ្សាយនៅថ្ងៃអង្គារនេះថា មនុស្សរាប់ពាន់អាចនឹងស្លាប់បាត់បង់ជីវិត ក្រោយពេលបាត់ខ្លួនដោយសារតែទឹកជំនន់ដ៏ធ្ងន់ធ្ងរនៅតំបន់ភាគខាងកើតនៃប្រទេសលីប៊ី ដែលបង្កឡើងដោយខ្យល់ព្យុះដានីយ៉ែល (Daniel)។
នាយករដ្ឋមន្ត្រីនៃរដ្ឋាភិបាលដែលប្រកាសកាន់អំណាចដោយខ្លួនឯងនៅភូមិភាគខាងកើតនៃប្រទេសលីប៊ី លោក Osama Hamad បាននិយាយកាលពីថ្ងៃចន្ទថា មនុស្សរហូតដល់ ២ ០០០ នាក់ អាចស្លាប់ ដោយសារតែពួកគេបានបាត់ខ្លួនក្នុងគ្រោះទឹកជំនន់នេះ។ យ៉ាងណាមិញ លោក Osama មិនបានបញ្ជាក់ថា លោកបានតួលេខនេះពីខាងណាមកទេ។
ចំណែកឯលោក Ahmed al-Mosmari អ្នកនាំពាក្យរបស់កងកម្លាំងប្រដាប់អាវុធលីប៊ី ដែលមានមូលដ្ឋាននៅភាគខាងកើតរបស់ប្រទេសនេះ បានប្រាប់សន្និសីទសារព័ត៌មានថា ចំនួនអ្នកស្លាប់នៅក្រុង Derna ដែលជាក្រុងរងគ្រោះនៅតាមបណ្ដោយឆ្នេរសមុទ្រម៉េឌីទែរ៉ាណេ បានកើនឡើងលើសពី ២ ០០០ នាក់។ លោកបន្តថា មានមនុស្សចន្លោះពី ៥ ០០០ ទៅ ៦ ០០០ នាក់ ត្រូវបានរាយការណ៍ថាបាត់ខ្លួន។
លោក Al-Mosmari បានគូសបញ្ជាក់ថា គ្រោះមហន្តរាយធ្ងន់ធ្ងរបែបនេះ គឺដោយសារតែការបាក់ទំនប់វារីអគ្គិសនីចាស់ចំនួន២នៅក្បែរនោះ ដោយសារតែព្យុះដានីយ៉ែល ដែលបណ្តាលឱ្យមានទឹកជំនន់ដ៏សាហាវភ្លាមៗ។
ប៉ុន្តែប្រធានកាកបាទក្រហមនៅទីក្រុង Benghazi លោក Kais Fhakeri បានបញ្ជាក់ថា ព្យុះដានីយ៉ែល បានសម្លាប់មនុស្សយ៉ាងហោចណាស់ ១៥០ នាក់ បន្ទាប់ពីកម្រិតទឹកនៅក្នុងទីក្រុងបានកើនឡើងដល់កម្ពស់ ៣ ម៉ែត្រ ក្នុងទីក្រុង Derna ដែលមានប្រជាជនរស់នៅសរុប ១ សែននាក់ ។
អ្នកកាសែតរបស់ Al Jazeera លោក Malik Traina បានរាយការណ៍ពីរដ្ឋធានីទ្រីប៉ូលីរបស់លីប៊ី បាននិយាយថា៖ «ទីក្រុង Derna ហ៊ុំព័ទ្ធដោយភ្នំទាំងស្រុង ហើយទំនប់វារីអគ្គិសនីទាំងនោះបាក់ទៀត»។ លោកបន្តថា៖ «អ្នកជំនាញខ្លះនិយាយថា ទឹកជាង ៣០ លានម៉ែត្រគូប បានហូរចាក់ចូលទៅក្នុងក្រុង[ក្រោយពេលទំនប់វារីបាក់] ដែលធ្វើឱ្យភូមិឋានជាច្រើនត្រូវអូសបំផ្លាញទៅតាមទឹក»។
មិនត្រឹមតែប៉ុណ្ណេះ ក៏មានសេចក្ដីរាយការណ៍ថា ទឹកជំនន់បានកាត់ផ្ដាច់អ៊ិនធឺណិត និងភ្លើងប្រើប្រាស់ជាដើម ដែលធ្វើឱ្យពិបាកលើប្រតិបត្តិការជួយសង្រ្គោះ ក៏ដូចជាការប្រមូលព័ត៌មានស្ដីពីចំនួនជនរងគ្រោះ។
ជាមួយគ្នានេះ គេមើលឃើញថា ប្រតិបត្តិការស្វែងរក និងជួយសង្រ្គោះ អាចនឹងជួបនូវបញ្ហាប្រឈម ដោយសារតែលីប៊ីនៅតែបែងចែករវាងរដ្ឋបាលគូប្រជែងចំនួន២ ដោយមួយធ្វើការគ្រប់គ្រងនៅភាគខាងលិច និងមួយធ្វើការគ្រប់គ្រងនៅភាគខាងកើត ដែលក្រុមនីមួយៗទទួលបានការគាំទ្រពីកងជីវពល និងរដ្ឋាភិបាលបរទេសរៀងៗខ្លួន។
ចំណែកក្រុមប្រឹក្សាប្រធានាធិបតីលីប៊ី ដែលមានមូលដ្ឋាននៅទីក្រុងទ្រីប៉ូលី ពោលគឺរដ្ឋាភិបាលភូមិភាគខាងលិច បានប្រកាសតំបន់ចំនួនបីនៃខេត្ត Cyrenaica ភាគខាងកើតរបស់ប្រទេស ថាជាតំបន់គ្រោះមហន្តរាយដោយសារទឹកជំនន់ ហើយបានស្នើសុំជំនួយពីអន្តរជាតិ។
គួរគូសបញ្ជាក់ថា ព្យុះដានីយ៉ែលបានបក់បោកលើតំបន់ក្បែរក្រុង Derna ផ្សេងទៀត រួមមានទីក្រុង Benghazi ក្រុង Susa ក្រុង Bayda និងក្រុង al-Marj កាលពីថ្ងៃអាទិត្យ និងថ្ងៃចន្ទ ហើយឧត្តុនិយមលីប៊ីបានព្យាករថា ភ្លៀងធ្លាក់ខ្លាំងជោកជាំនឹងបន្តជាច្រើនថ្ងៃទៀត។ ក្រៅតែពីក្រុង Derna ព្យុះដដែលបានសម្លាប់មនុស្សជាង២០នាក់ផ្សេងទៀត រួមទាំងនៅក្រុង Bayda ក្រុង Susa ក្រុង Shahatt និងក្រុង Omar al-Mokhtar ជាដើម៕
ប្រែសម្រួល៖ហួន ឌីណា
ប្រភព៖ At least 150 killed, hundreds more feared dead as Storm Daniel sweeps Libya
