សភាម៉ិកស៊ិកបើកសវនាការលើបញ្ហា UFOs និងបានបង្ហាញពីសាកសព«មនុស្សភពក្រៅ»
ម៉ិកស៊ិក៖ សាកសពដែលត្រូវបានគេជឿថា «មិនមែនមនុស្ស» ចំនួនពីរត្រូវបានបង្ហាញក្នុងអំឡុងពេលសវនាការសភានៅប្រទេសម៉ិកស៊ិក ដោយបង្កឱ្យមានការភ្ញាក់ផ្អើលយ៉ាងខ្លាំង មានទាំងការជឿផង ការមិនជឿផង និងការសើចចំអកនៅលើបណ្តាញសង្គមកាលពីថ្ងៃពុធកន្លងទៅថ្មីៗនេះ។
អដ្ឋិធាតុសាកសពដែលត្រូវបានគេអះអាងនោះត្រូវបានដាក់តាំងបង្ហាញនៅក្នុងប្រអប់តូចៗចំនួនដោយនេះគឺជាលើកដំបូងក្នុងប្រវត្តិសាស្ត្រហើយដែលសភាម៉ិកស៊ិកបានដោះស្រាយជាផ្លូវការនូវបញ្ហានៃជីវិតក្រៅភពដែលកើតមាន។
សាកសព ទាំងពីរដែលដាក់បង្ហាញនេះមានម្រាមដៃតែបីប៉ុណ្ណោះ និងក្បាលវែងៗ។ លោក JaimeMaussan ជាអ្នកកាសែត និងអ្នកវិទ្យាសាស្ត្រ UFO ជនជាតិម៉ិកស៊ិក បាននិយាយថា សាកសពទាំងពីរ នេះត្រូវបានរកឃើញនៅក្នុងប្រទេសប៉េរូ ក្បែរខ្សែបន្ទាត់ Nazca បុរាណកាលពីឆ្នាំ ២០១៧។
លោក Maussan បានឱ្យដឹងថា ការវិភាគកាលបរិច្ឆេទកាបូនដោយសាកលវិទ្យាល័យជាតិស្វយ័តម៉ិកស៊ិកបានបង្ហាញថា សាកសព្វនេះមានអាយុកាលប្រហែល មួយពាន់ឆ្នាំ។
ស្របពេលជាមួយគ្នានេះដែរ សមាជិកសភាម៉ិកស៊ិក បានសុំឱ្យលោក Maussan ស្បថដើម្បីប្រាប់ការពិតក្នុង ពេលសវនាការ។លោក Maussan បានស្បថ និងបាននិយាយបន្ថែមថា យើង (មនុស្ស)មិនមែនរស់នៅម្នាក់ឯងទេ និងថាអាជ្ញាធរអាមេរិកកំពុងបិទបាំងភស្តុតាងអំពីរឿងទាំងនេះដែរ។
គួរជម្រាបថា ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលសហរដ្ឋអាមេរិកបានធ្វើការបង្ហាញអំពីព័ត៌មានសាធារណៈតិចតួចបំផុតអំពី UAP ឬ UFO។ ចំណែកមន្ទីរបញ្ចកោណក៏បាននឹងកំពុងបន្តស៊ើបអង្កេតយ៉ាងសកម្មលើរបាយការណ៍នៅក្នុងប៉ុន្មានឆ្នាំថ្មីៗ ខណៈទីភ្នាក់ងារអវកាសអាមេរិក Nasa កាលពីខែឧសភាក៏បានបានបើកកិច្ចប្រជុំជាសាធារណៈលើកដំបូងរបស់ខ្លួនលើបញ្ហាមនុស្សក្រៅភពនេះ ផងដែរដើម្បីជំរុញឱ្យមានវិធីសាស្រ្តបែបវិទ្យាសាស្ត្រឱ្យកាន់តែច្បាស់ថែមទៀត ដើម្បីបញ្ជាក់ពីប្រភពដើមនៃអ្វីដែលគេហៅថា បាតុភូតមិនធម្មតាដែលមិនស្គាល់អត្តសញ្ញាណ UAPs។
យ៉ាងណាមិញ ការបង្ហាញរបស់ប្រទេសម៉ិកស៊ិកថ្មីៗនេះ បានបង្កឱ្យមានទាំងភាពភ្ញាក់ផ្អើល និងការចំអក រួមទាំងការបង្កើតរូបភាពបែបកំប្លែង អមដោយរូបថតរបស់ E.T. ដែលជាសត្វចម្លែកនៅក្នុងខ្សែភាពយន្ត។ ចំណែកលោក Maussan បានប្រឈមមុខនឹងប្រតិកម្មតប និងការរិះគន់ជាច្រើនពីអ្នកដែលមិនជឿថាមានមនុស្សក្រៅភព និងបានចោទថាអ្វីដែលលោកធ្វើគឺគ្រាន់ដើម្បីទាក់ទាញចំណាប់អារម្មណ៍៕
ដោយៈ ស្រ៊ុន សិរីវឌ្ឍនៈ
ប្រភព៖ https://www.straitstimes.com/world/mexican-congress-holds-hearing-on-ufos-featuring-purported-alien-bodies-0
