វ៉ាស៊ីនតោន៖ រដ្ឋមន្រ្តីការពារជាតិអាមេរិក លោក ល្លយដ៍ អូស្ទីន នៅថ្ងៃទី១៩ ខែកញ្ញា បានបញ្ជាក់ថា ឆាប់ៗនេះ អ៊ុយក្រែននឹងទទួលបានរថក្រោះចម្បាំង M1 Abrams មកពីសហរដ្ឋអាមេរិក។

រដ្ឋមន្រ្តីការពារជាតិអាមេរិក លោក ល្លយដ៍ អូស្ទីន បានគូសបញ្ជាក់យ៉ាងដូច្នេះថា រថក្រោះចម្បាំង M1 របស់អាមេរិក នឹងមកដល់ប្រទេសអ៊ុយក្រែនក្នុងពេលឆាប់ៗនេះ ដែលនឹងជួយបង្កើនសមត្ថភាពពាសដែកដ៏ខ្លាំងក្លាមួយទៀត ដើម្បីចូលរួមជាមួយក្រុមរថយន្តក្រោះខ្លារខិន (Leopards) ដែលមានស្រាប់នៅលើសមរភូមិ។

បើតាមមន្រ្តីយោធាជាន់ខ្ពស់អាមេរិកមួយរូប រថក្រោះចម្បាំង M1 Abrams មួយគ្រឿងដំបូងនឹងបញ្ជូនទៅដល់អ៊ុយក្រែនក្នុងពេលប៉ុន្មានថ្ងៃខាងមុខ ហើយដំណើរការនេះនឹងបញ្ចប់ទាំងស្រុងក្នុងពេលប៉ុន្មានសប្តាហ៍ប៉ុណ្ណោះ។

សូមបញ្ជាក់ថា ទីក្រុងវ៉ាស៊ីនតោនបានសន្យានឹងផ្គត់ផ្គង់ដល់អ៊ុយក្រែននូវរថក្រោះចម្បាំងចំនួន ៣១គ្រឿង ហើយការប្រគល់វានឹងចាប់ផ្តើមពីឆ្នាំ ២០២៣ តទៅ ដែលនេះជាផ្នែកមួយនៃកញ្ចប់ជំនួយសន្តិសុខមានទំហំ ៤៣ពាន់លានដុល្លារ ដែលសហរដ្ឋអាមេរិកបានសន្យា ចាប់តាំងពីរុស្ស៊ីបានចូលលុកលុយអ៊ុយក្រែនកាលពីខែកុម្ភៈ ឆ្នាំ ២០២២៕

ប្រភព៖ AFP ប្រែសម្រួលដោយ៖ ឈឹម ទីណា