លោក ស៊ី ព្រមានប្រឆាំងនឹងការកាត់ផ្ដាច់ពីចិន ហើយលើកសរសើរពីគំនិតផ្ដួចផ្ដើមខ្សែក្រវាត់ និងផ្លូវ
ប៉េកាំង៖ប្រធានាធិបតីចិន លោក ស៊ី ជីនភីង បានព្រមានប្រឆាំងនឹងការកាត់ផ្តាច់ពីប្រទេសចិន ពេលបើកវេទិកាគំនិតផ្តួចផ្តើមខ្សែក្រវាត់និងផ្លូវ (BRI) នៅទីក្រុងប៉េកាំងកាលពីថ្ងៃពុធ ដោយបានរិះគន់កិច្ចខិតខំប្រឹងប្រែងរបស់លោកខាងលិចក្នុងការកាត់បន្ថយការពឹងផ្អែកលើសេដ្ឋកិច្ចចិន ។នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
លោក ស៊ី ក៏បានលើកសរសើរផងដែរចំពោះផែនការដ៏ធំរបស់ខ្លួនមួយនេះ ដែលបានចាប់ផ្តើមកាលពី១ទសវត្សរ៍មុន ក្នុងបំណងកសាងហេដ្ឋារចនាសម្ព័ន្ធសកល និងបណ្តាញថាមពលតភ្ជាប់អាស៊ីជាមួយទ្វីបអាហ្រ្វិក និងអឺរ៉ុប តាមរយៈផ្លូវគោក និងផ្លូវសមុទ្រ ដោយនិយាយថា «សេចក្ដីព្រាងបានក្លាយទៅជាគម្រោងពិត»។
វេទិកា BRI មានការចូលរួមពីតំណាងប្រទេសជាង ១៣០ ដែលភាគច្រើនមកពីប្រទេសកំពុងអភិវឌ្ឍន៍ រួមទាំងប្រមុខរដ្ឋមួយចំនួន ក៏ដូចជា «មិត្តសម្លាញ់» របស់លោក ស៊ី គឺ ប្រធានាធិបតីរុស្ស៊ី លោក វ្ល៉ាឌីមៀរ ពូទីន។
លោក ស៊ី បានប្រាប់ប្រតិភូជាង ១ ០០០ នាក់ ដែលប្រមូលផ្តុំគ្នានៅក្នុងបន្ទប់សន្និសីទក្នុងមហាសាលប្រជាជនភាគខាងលិចនៃទីលានធានអានមេនថា ៖ «យើងប្រឆាំងនឹងការដាក់ទណ្ឌកម្មឯកតោភាគី ការបង្ខិតបង្ខំសេដ្ឋកិច្ច ការផ្តាច់ទំនាក់ទំនងបែងចែក និងការរំខាននៃសង្វាក់ផ្គត់ផ្គង់»។
មេដឹកនាំចិនដដែលបានជំរុញប្រឆាំងនឹងកិច្ចខិតខំប្រឹងប្រែងរបស់លោកខាងលិច ដើម្បីកាត់បន្ថយការពឹងផ្អែកលើសេដ្ឋកិច្ចចិនដោយនិយាយថា «ជីវិតរបស់យើងនឹងមិនប្រសើរជាងមុនទេ ហើយការអភិវឌ្ឍរបស់យើង ក៏នឹងមិនលឿនជាងនេះដែរ ប្រសិនបើយើងចាត់ទុកការអភិវឌ្ឍរបស់ប្រទេសដទៃ ថាជាការគំរាមកំហែង ហើយការពឹងពាក់គ្នាទៅវិញទៅមកខាងសេដ្ឋកិច្ច ថាជាហានិភ័យ»។
កន្លងមកមេដឹកនាំលោកខាងលិចបានទទូចថា គោលដៅរបស់ខ្លួនគឺដើម្បី «កាត់បន្ថយហានិភ័យ» មិនមែនកាត់ផ្ដាច់ពីប្រទេសចិននោះទេ ដោយនិយាយថា ពួកគេចង់ធ្វើពិពិធកម្មខ្សែសង្វាក់ផ្គត់ផ្គង់ដែលពឹងផ្អែកខ្លាំងពេកលើសេដ្ឋកិច្ចចិន។
ទោះបីជា BRI ពីដំបូងឡើយបានកំណត់ការតភ្ជាប់ប្រទេសចិនទៅអឺរ៉ុបខាងលិចក៏ដោយ ក៏មន្រ្តីជាន់ខ្ពស់របស់សហភាពអឺរ៉ុប បានអវត្តមានក្នុងវេទិកានាពេលនេះ។ ប្រមុខរដ្ឋតែមួយគត់ដែលមានវត្តមានពីប្លុក គឺនាយករដ្ឋមន្ត្រីហុងគ្រី លោក Viktor Orban ។ អ្នកចូលរួមគួរឱ្យកត់សម្គាល់ផ្សេងទៀត រួមមានរដ្ឋមន្ត្រីពាណិជ្ជកម្មរបស់រដ្ឋបាលតាលីបង់ អាហ្វហ្គានីស្ថាន លោក Haji Nooruddin Azizi។
លោក Azizi បានប្រាប់អ្នកយកព័ត៌មានក្នុងពិធីនោះថា ៖«ចិនមានការចាប់អារម្មណ៍កាន់តែច្រើននៅពេលនេះ ក្នុងការអភិវឌ្ឍអាហ្វហ្គានីស្ថាន ។ដូច្នេះយើងកាន់តែមានទំនាក់ទំនងជាមួយចិន»។
បើតាមរ៉យទ័រ អ្នកវិភាគបាននិយាយថា មន្ទិលរបស់លោកខាងលិចចំពោះផែនការដ៏ធំរបស់លោក កើតចេញពីការសង្ស័យលើរបៀបដែលឥទ្ធិពលចិនរីកសាយភាយលើពិភពលោក។ ពេលខ្លះ ចិនជំទាស់នឹងការរិះគន់លើ BRI ដោយនិយាយថា វាធ្វើឡើងដោយមានការរើសអើងប្រឆាំងនឹងចិន និងមានបំណងចង់ទប់ស្កាត់កំណើនសេដ្ឋកិច្ចរបស់ចិន ខណៈមើលរំលង «ចេតនាល្អពិតប្រាកដ»។
អ្នកវិភាគក៏បាននិយាយផងដែរថា ការផ្តល់ប្រាក់កម្ចីផ្នែកហេដ្ឋារចនាសម្ព័ន្ធមួយចំនួនរបស់ប្រទេសចិនតាមរយៈគម្រោងនេះ បានធ្វើឱ្យប្រទេសក្រីក្រមានប្រាក់កម្ចី ដែលមិនអាចសងវិញបាន ដែលនេះជា «អន្ទាក់បំណុល»។
ទោះជាយ៉ាងណាក៏ដោយ ក្នុងសុន្ទរកថាក្រោយលោក ស៊ី លោក ពូទីន បានសរសើរ BRI និងបានអំពាវនាវឱ្យមានការវិនិយោគជាសកលនៅក្នុងផ្លូវសមុទ្រភាគខាងជើង ដែលលោកបាននិយាយថា អាចធ្វើឱ្យពាណិជ្ជកម្មកាន់តែស៊ីជម្រៅរវាងតំបន់ភាគខាងកើត និងខាងលិច។ មន្ត្រីអឺរ៉ុបជាច្រើននាក់ បានចាកចេញពីសាលប្រជុំពេលលោក ពូទីន ឡើងដល់ឆាកនិយាយ៕ ដោយ៖ហួនឌីណា
