កម្មវិធីអភិវឌ្ឍន៍សហប្រជាជាតិ៖ រយៈពេលជាងប្រាំពីឆ្នាំចំនួនប្រជាជនកម្ពុជាក្រីក្របានថយចុះពី ៥.៦លាននាក់ មកនៅត្រឹមតែ ២.៨លាននាក់
ភ្នំពេញ៖ យោងតាមរបាយការណ៍ស្តីពីសន្ទស្សន៍ភាពក្រីក្រពហុសមាសភាគសកលឆ្នាំ២០២៣ (MPI) របស់កម្មវិធីអភិវឌ្ឍន៍សហប្រជាជាតិឬយូអិនឌីភី(UNDP) បានបង្ហាញថា រយៈពេលជាងប្រាំឆ្នាំកន្លងទៅនេះ គឺគិតចាប់ពីឆ្នាំ២០១៤ ដល់ពាក់កណ្ដាលឆ្នាំ២០២២ អត្រានៃចំនួនប្រជាជនកម្ពុជាក្រីក្រ បានថយចុះពី ៥.៦លាននាក់ មកនៅត្រឹមតែ ២.៨លាននាក់។
របាយការណ៍MPI របស់អង្គការយូអិនឌីភី និងអង្គការ OPHI (Oxford Poverty &Human Development Initiative) បានចេញផ្សាយកាលពីដើមខែកក្កដា ឆ្នាំ២០២៣ និងត្រូវផ្សព្វផ្សាយលើបណ្តាញសង្គមហ្វេសប៊ុករបស់អង្គការយូអិនឌីភី កម្ពុជា កាលពីថ្ងៃទី១៧ ខែតុលា ឆ្នាំ២០២៣។
ប្រភពដដែលបានបង្ហាញថា អត្រានៃភាពក្រីក្ររបស់កម្ពុជាបានធ្លាក់ចុះពី ៣៦,៧ ភាគរយក្នុងឆ្នាំ២០១៤ មកនៅត្រឹម ១៦,៦ភាគរយ ក្នុងឆ្នាំ២០២២ ដែលមានន័យថាចំនួនប្រជាជនក្រីក្របានថយចុះពីចំនួន ៥.៦លាននាក់ មកនៅត្រឹមតែចំនួន ២.៨លាននាក់ប៉ុណ្ណោះ។
របាយការណ៍ដដែលបានឱ្យដឹងទៀតថា ក្នុងរយៈពេលប្រាំពីឆ្នាំកន្លះមកនេះ ប្រជាជនកម្ពុជាមួយនាក់ ក្នុងចំណោមប្រាំនាក់ បានចាកចេញពីភាពក្រីក្រ ដូច្នេះកម្ពុជាបានក្លាយជាប្រទេសមួយដែលសម្រេចបាននូវវឌ្ឍនភាពល្អប្រសើរលើការកាត់បន្ថយអត្រានៃភាពក្រីក្រក្នុងប្រទេស បើប្រៀបធៀបនឹងប្រទេសនានានៅលើពិភពលោក។
ទន្ទឹមនឹងនេះ នៅក្នុងរបាយការណ៍ MPI ដដែល ក៏បានលើកឡើងពីអត្រានៃភាពក្រីក្រនៅក្នុងខេត្តក្រុងចំនួន ២៥ របស់កម្ពុជា ដែលក្នុងនោះមានខេត្តចំនួន១៧ បានថយចុះអត្រានៃភាពក្រីក្រ ខណៈដែលមានខេត្តចំនួនពីរ គឺមានអត្រាភាពក្រីក្រខ្ពស់ជាងគេ គឺខេត្តស្ទឹងត្រែង និងព្រះវិហារ ដែលធ្វើឱ្យអត្រានៃភាពក្រីក្របានធ្លាក់ចុះខ្លាំងពីចំនួន ៦៤,៣ភាគរយ មកនៅត្រឹមចំនួន ៣៤,៦ភាគរយ។
របាយការណ៍បញ្ជាក់ថា ៖ «ទោះបីជាអត្រានៃភាពក្រីក្រនៅតាមទីជនបទភាគច្រើនបានថយចុះ ក៏ប៉ុន្តែចំពោះអត្រានៃភាពក្រីក្រនៅក្នុងតំបន់ទីក្រុងវិញហាក់ដូចជាគ្មានសញ្ញាថយចុះឡើយ»។
អង្គការUNDP កម្ពុជា បានសរសេរលើហ្វេសប៊ុករបស់ខ្លួនដែរថា វឌ្ឍនភាពរបស់ប្រទេសកម្ពុជា គឺដោយសារភាពប្រសើរឡើងនៃសូចនាករសុខភាព និងកម្រិតជីវភាព ជាពិសេសអត្រាមរណភាពកុមារ អាហារូបត្ថម្ភ ប្រេងឥន្ធនៈ អនាម័យ និងអគ្គិសនី។ យ៉ាងណាក៏ដោយ បញ្ហាប្រឈមនៅតែមាននៅក្នុងសូចនាករអប់រំ និងលំនៅដ្ឋាន។
ប្រភពដដែលបន្តថា ៖ «របាយការណ៍នេះ មានទិន្នន័យ និងការវិភាគជាច្រើនដែលអាចជួយអ្នកតាក់តែងគោលនយោបាយ អ្នកអនុវត្ត និងអ្នកស្រាវជ្រាវក្នុងការតាក់តែង និងអនុវត្តគោលនយោបាយ និងកម្មវិធីប្រកបដោយប្រសិទ្ធភាព ដើម្បីដោះស្រាយភាពក្រីក្រក្នុងគ្រប់ទម្រង់របស់វា»។
ទាក់ទងនឹងរបាយការណ៍នេះ លោក ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានឱ្យដឹងនៅថ្ងៃទី១៨ ខែតុលាថា ក្នុងនាមជាប្រជាពលរដ្ឋខ្មែរ មានក្ដីមោទនភាពជាមួយនឹងរាជរដ្ឋាភិបាលកម្ពុជា ដែលបានទទួលសមិទ្ធផលអត្រានៃភាពក្រីក្របានធ្លាក់ចុះបែបនេះ ខណៈដែលការធ្លាក់ចុះនេះ វាកើតពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា អង្គការអន្តរជាតិ និងប្រទេសដៃគូផ្សេងៗដែលបានជួយគាំទ្រកន្លងមក។
លោកបន្តថា ទោះបីអត្រានៃភាពក្រីក្របានធ្លាក់ចុះពិតមែន ប៉ុន្តែងាកមកសេដ្ឋកិច្ចកម្ពុជាបច្ចុប្បន្ននេះ ការនាំចេញទៅអន្តរជាតិ និងប្រទេសដៃគូមានការថយចុះ ហើយការថយចុះនេះក៏មិនមែនតែកម្ពុជានោះដែរ បណ្ដាប្រទេសផ្សេងៗនៅក្នុងតំបន់អាស៊ាន និងនៅក្នុងពិភពលោក ក៏មានអត្រាការនាំចេញថយចុះផងដែរ។
លោកបានឱ្យដឹងទៀតថា បញ្ហានៃការថយចុះនេះ វាបានកើតឡើងដោយសារកត្តាជំងឺកូវីដ១៩ និងកត្តាសង្គ្រាមនៅប្រទេសផ្សេងៗ ដែលកត្តាសង្គ្រាមនេះ គឺធ្វើឱ្យប៉ះពាល់ខ្លាំងទៅដល់ការអភិវឌ្ឍន៍សេដ្ឋកិច្ចគ្រប់ប្រទេសទាំងអស់ នៅក្នុងតំបន់អាស៊ីខាងលិច និងអាស៊ានជាដើម។
លោក ហុង វណ្ណៈ បានថ្លែងថា៖ «ខ្ញុំយល់ថាបើទោះបីស្ថានភាពសេដ្ឋកិច្ចសកលកំពុងជួបវិបត្តិក្នុងអន្តរកាលនេះក៏ដោយ អត្រានៃភាពក្រីក្រនៅកម្ពុជា គឺវាមិនមានការកើនឡើងទៀតទេ ប៉ុន្តែវាមានតែថយ នេះបើយោងតាមការខិតខំប្រឹងប្រែងរបស់រាជរដ្ឋាភិបាល និងភាគីពាក់ព័ន្ធដែលកំពុងធ្វើសព្វថ្ងៃនេះ»។
លោកបន្ថែមថា ទន្ទឹមនេះការប្រកបមុខរបររបស់ប្រជាពលរដ្ឋបច្ចុប្បន្ន ក៏កាន់តែល្អប្រសើរជាងមុនដែរ ដោយសារតែមានការអភិវឌ្ឍន៍ហេដ្ឋារចនាសម្ព័ន្ធសម្រាប់ទ្រទ្រង់ និងការរៀបចំមូលដ្ឋានគ្រឹះសម្រាប់វិនិយោគ គឺមានលក្ខណៈរឹងមាំ ដូច្នេះអ្វីទាំងអស់នោះ វាជាការចូលរួមចំណែកទប់ស្កាត់ការកើនឡើងវិញនៃភាពក្រីក្រ។
ចំណែក ឯកឧត្តម ឈួរ សុបញ្ញា រដ្ឋលេខាធិការក្រសួងមុខងារសាធារណៈ ក្នុងនាមជាមន្ត្រីរាជរដ្ឋាភិបាល លោកមើលឃើញថា សមិទ្ធផលទាំងនេះ គឺកើតចេញពីការខិតខំប្រឹងប្រែងរបស់រាជរដ្ឋាភិបាល និងភាគីពាក់ព័ន្ធ ដែលបានពីការអនុវត្តន៍ប្រព័ន្ធគាំពារសង្គម ក្នុងការរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ។
ឯកឧត្តមបានប្រាប់ថា ការថយចុះអត្រានៃភាពក្រីក្រនេះ ក៏ទទួលបានពីការផ្ដល់សេវាសមស្របរបស់រាជរដ្ឋាភិបាលកម្ពុជាទៅកាន់ប្រជាពលរដ្ឋ ដើម្បីធ្វើយ៉ាងណាឱ្យប្រជាពលរដ្ឋ អាចបង្កើនជីវភាព និងចំណូលរបស់ពួកគាត់ឱ្យកាន់តែល្អប្រសើរ។ជារួមការថយចុះនេះ វាជាផ្នែកមួយបង្ហាញឱ្យឃើញពីប្រសិទ្ធភាព និងការទទួលយកបានរបស់ប្រជាពលរដ្ឋក្រោមការដឹកនាំរបស់រាជរដ្ឋាភិបាលកម្ពុជា ដើម្បីធ្វើយ៉ាងណាឱ្យគ្រប់វិស័យទាំងអស់មានការអភិវឌ្ឍ។
ឯកឧត្តម ឈួរ សុបញ្ញា មានប្រសាសន៍ថា ៖ «ប្រសិទ្ធភាពនៃការធ្វើឱ្យចំនួនប្រជាពលរដ្ឋក្រីក្របានថយចុះនេះ វាបានបង្ហាញឱ្យឃើញពីចក្ខុវិស័យ និងគោលនយោបាយរបស់យើងដែលបានឆ្លើយតបផងដែរ។ អញ្ចឹង! ចក្ខុវិស័យ និងគោលនយោបាយរបស់យើង គឺធ្វើការឆ្លើយតបទៅនឹងស្ថានភាពជាក់ស្ដែង មិនមែនមានតែគោលនយោបាយបានតែល្អមើលនៅលើក្រដាសនោះទេ»៕
ដោយ៖ជា សុខនី
