សកម្មជនបរិស្ថាន ត្រូវបានចោទប្រកាន់ពីបទបំពានសណ្តាប់ធ្នាប់សាធារណៈ បន្ទាប់ពីការតវ៉ានៅទីក្រុងឡុងដ៍
ឡុងដ៍៖ កញ្ញា ហ្គ្រេតា ធុនបឺក (Greta Thunberg) ដែលជាសកម្មជនបរិស្ថាន កាលពីថ្ងៃទី១៨ ខែតុលា ឆ្នាំ២០២៣ ត្រូវបានចោទប្រកាន់ពីបទល្មើសសណ្តាប់ធ្នាប់សាធារណៈ បន្ទាប់ពីកញ្ញាត្រូវបានចាប់ខ្លួនអំឡុងពេលដែលកំពុងចូលរួមក្នុងការតវ៉ាប្រឆាំងនឹងសន្និសីទមួយនៅទីក្រុងឡុងដ៍ ប្រទេសអង់គ្លេស ដែលជាកម្មវិធីជួបជុំដ៏ធំមួយរបស់បណ្ដាក្រុមហ៊ុនធំៗដែលរកស៊ីក្នុងវិស័យប្រេង និងឧស្ម័ន។
គួរបញ្ជាក់ថា កញ្ញា ហ្គ្រេតា ធុនបឺក ជាសកម្មជនបរិស្ថានជនជាតិស៊ុយអែត វ័យ ២០ ឆ្នាំរូបនេះ គឺជាមនុស្សម្នាក់ក្នុងចំណោម ២៩ នាក់ផ្សេងទៀតដែលត្រូវបានចាប់ខ្លួនក្នុងអំឡុងពេលចេញតវ៉ាកាលពីថ្ងៃទី១៧ ដោយពួកគេបានព្យាយាមបញ្ឈប់គណៈប្រតិភូដែលកំពុងធ្វើដំណើរចូលទៅក្នុងវេទិកាជួបជុំរបស់បណ្ដាក្រុមហ៊ុនថាមពលនៅឯសណ្ឋាគារមួយឈ្មោះថា InterContinental London Park Lane។
វីដេអូមួយបានបង្ហាញថា កញ្ញា ធុនបឺក ត្រូវបានគេចាប់ដាក់នៅខាងក្រោយឡានប៉ូលិស បន្ទាប់ពីកញ្ញាបានចូលរួមជាមួយហ្វូងមនុស្សដើម្បីតវ៉ាបិទច្រកចូលសណ្ឋាគារនិងបានស្រែកថា«ត្រូវលុបបំបាត់ឥទ្ធិពលប្រេងឥន្ធនៈហ្វូស៊ីលទៅលើវិស័យហិរញ្ញវត្ថុ»។ ក្រុមមន្ត្រីប៉ូលិសបានចេញអន្តរាគមន៍ទៅក្នុងហ្វូងបាតុករ ដើម្បីវែកច្រកផ្លូវសម្រាប់ប្រតិភូធ្វើដំណើរចូលកម្មវិធី។
មុននេះបន្តិច កញ្ញា ធុនបឺក បាននិយាយទៅកាន់អ្នកសារព័ត៌មាន ដោយបានបរិហារខ្លាំងៗអំពីសន្និសីទរបស់ថ្នាក់ដឹកនាំ នាយកប្រតិបត្តិក្រុមហ៊ុនថាមពល និងអ្នកនយោបាយថា «យើងមិនមានជម្រើសផ្សេងក្រៅពីត្រូវមកឈរតវ៉ានៅខាងក្រៅសន្និសីទនេះទេ ព្រោះយើងចង់ធ្វើការរំខានដល់សន្និសីទនេះ»។
បើយោងតាមប៉ូលិសក្រុងក្នុងតំបន់បានឱ្យដឹងថា នាងត្រូវបានចោទប្រកាន់ពីបទ «មិនគោរពតាមលក្ខខណ្ឌដែលមានចែងក្នុងមាត្រា ១៤ នៃច្បាប់សណ្តាប់ធ្នាប់សាធារណៈ»។ ជាក់ស្ដែង អំឡុងពេលបាតុកម្ម ក្រុមប៉ូលិសបានទាមទារឱ្យអ្នកតវ៉ាទាំងអស់ផ្លាស់ទីចេញពីដងផ្លូវ ទៅលើចិញ្ចើមថ្នល់វិញ ប៉ុន្តែពួកគេមិនបានធ្វើតាមនោះទេ។
គួរដឹងដែរថា ២៦ នាក់ផ្សេងទៀត ក៏ត្រូវបានចោទប្រកាន់ពីបទល្មើសផ្សេងៗទាក់ទងនឹងការចេញតវ៉ាលើកនេះ។ ការចោទប្រកាន់របស់កញ្ញា ធុនបឺក ត្រូវបានប្រកាសឱ្យដឹងដំណាលគ្នាជាមួយនឹងព័ត៌មានដែលថាស្ថាបនិករបស់ក្រុមសកម្មជនបរិស្ថាន Just Stop Oil លោកស្រី អ៊ីនឌីហ្គោ រ៉ាំបេឡូ (Indigo Rumbelow) និងលោក រ៉ចឺ ហាឡាម (Roger Hallam) ត្រូវបានចាប់ខ្លួនបន្ទាប់ពីមានការចុះឆែកឆេរផ្ទះរបស់ពួកគេកាលពីពេលព្រឹក។
យោងតាមយុទ្ធនាការអាកាសធាតុដែលក្រុមសកម្មជនបានប្រកាស បានឱ្យដឹងថា ក្រុមប៉ូលិសបានសម្រុកចូលផ្ទះរបស់ពួកគេភ្លាមៗ ឆែកឆេររបស់របរ និងរឹបអូសឯកសារមួយចំនួន។ ពួកគេបានលើកឡើងថា អ្នកគាំទ្រក្រុមសកម្មជនបរិស្ថាននេះនឹងបន្តផែនការដើរក្បួនតវ៉ាជារៀងរាល់ថ្ងៃនៅទីក្រុងឡុងដ៍ ចាប់ពីថ្ងៃទី៣០ ខែតុលា។
អ្នកនាំពាក្យម្នាក់បាននិយាយថា «យើងនឹងមិនមានការភិតភ័យដោយសារតែក្រុមរដ្ឋាភិបាលឧក្រិដ្ឋកម្មរបស់យើងនោះទេ»។ អ្នកនាំពាក្យរូបនេះបានបន្តថា «ពួកគេមិនត្រឹមតែគាំទ្រឧក្រិដ្ឋកម្មសង្គ្រាមនៅហ្កាហ្សាប៉ុណ្ណោះទេ ប៉ុន្តែថែមទាំងរួមចំណែកដល់ឧក្រិដ្ឋកម្មដ៏ធំប្រឆាំងនឹងមនុស្សជាតិ នោះគឺការប្រើប្រាស់ប្រេង និងឧស្ម័នរបស់យើងទាំងអស់។ សកម្មភាពបំផ្លិចបំផ្លាញធនធានធម្មជាតិនេះ មិនដែលត្រូវបានអនុម័តតាមរយៈការបោះឆ្នោតតាមបែបប្រជាធិបតេយ្យនោះទេ ហើយវាកំពុងបង្កគ្រោះថ្នាក់ដល់ភពផែនដីដែលយើងកំពុងរស់នៅ»។
មិនត្រឹមតែប៉ុណ្ណោះ ក្រុមអ្នកតវ៉ាបានទៅប្រមូលផ្ដុំនៅមុខការិយាល័យរបស់ក្រុមហ៊ុនធានារ៉ាប់រងចំនួន ១០ កាលពីថ្ងៃពុធ ដោយទាមទារឱ្យពួកគេបញ្ឈប់ការធានារ៉ាប់រងទៅលើអណ្តូងរ៉ែ West Cumbria និងបំពង់បង្ហូរប្រេងឆៅនៅអាហ្វ្រិកខាងកើត។ បាតុករក៏បានប្រមូលផ្តុំគ្នានៅខាងក្រៅធនាគារ Standard Bank មុនពេលដើរក្បួនទៅកាន់ទីតាំងផ្សេងៗទៀត។
លោក ខ្លាវ ហ្វខ្រយ (Claude Fourcroy) អ្នកនាំពាក្យរបស់ក្រុមចលនា Money Rebellion បាននិយាយថា «យើងសូមជំរុញឱ្យធនាគារ និងក្រុមហ៊ុនធានារ៉ាប់រងឈប់គាំទ្រអណ្តូងរ៉ែនៅ West Cumbria និងបំពង់បង្ហូរប្រេងនៅអាហ្វ្រិកខាងកើត ព្រោះវានឹងធ្វើឱ្យការប្រែប្រួលអាកាសធាតុកាន់តែអាក្រក់ទៅៗ»៕
ប្រែសម្រួល៖ ធា សុណា
ប្រភពព័ត៌មាន៖ The Guardian
Greta Thunberg charged with public order offence after London oil protest
