លោកបៃឌិន កំពុងស្នើសុំប្រាក់ ៦០ពាន់លានដុល្លារសម្រាប់អ៊ុយក្រែន និង ១៤ ពាន់លានដុល្លារសម្រាប់អ៊ីស្រាអែល
វ៉ាស៊ីនតោន៖ ប្រធានាធិបតីអាមេរិក លោក ចូ បៃដិន (Joe Biden) នឹងស្នើសុំទៅកាន់សភា អាមេរិកសម្រាប់ទឹកប្រាក់ចំនួន ៦០ពាន់លានដុល្លារ ជាជំនួយដល់អ៊ុយក្រែន និងទឹកប្រាក់ចំនួន ១៤ពាន់លានដុល្លារផ្សេងទៀត សម្រាប់ជាជំនួយដល់អ៊ីស្រាអែល។
បើតាមការចុះផ្សាយរបស់កាសែតរ៉យទ័រ(Reuters) សំណើនេះក៏នឹងរួមបញ្ចូលផងដែរនូវទឹកប្រាក់ចំនួន ១០ ពាន់លានដុល្លារសម្រាប់ជំនួយមនុស្សធម៌ ១៤ ពាន់លានដុល្លារសម្រាប់ដោះស្រាយបញ្ហាអសន្តិសុខនៅតាមព្រំដែន និង៧ពាន់លានដុល្លារសម្រាប់តំបន់ឥណ្ឌូប៉ាស៊ីហ្វិក។
បើតាមការចុះផ្សាយដដែលបានឱ្យដឹងថា ចំនួនទឹកប្រាក់ពាក់កណ្តាលដែលលោក បៃដិន កំពុងស្នើសុំឱ្យអ៊ុយក្រែន (៣០ពាន់លានដុល្លារ) នឹងត្រូវប្រើប្រាស់ដើម្បីធ្វើទំនើបកម្មស្តុកអាវុធរបស់អ៊ុយក្រែន។
ជាមួយគ្នានេះលោក បៃដិន នឹងត្រូវបង្ហាញសំណើនេះតាមរយៈសុន្ទរកថានៅសេតវិមាន នាថ្ងៃព្រហស្បតិ៍ ម៉ោង ៨យប់ (ត្រូវនឹងថ្ងៃសុក្រ ម៉ោង៧ព្រឹក ម៉ោងនៅកម្ពុជា)។
ដោយឡែក លោកបៃឌិន ត្រូវបានគេរំពឹងយ៉ាងមុតមាំថានឹងអាចស្នើឱ្យសភាអនុម័តការចំណាយបន្ថែមទាំងនេះបានក្នុងរយៈពេលឆាប់ៗខាងមុខ ខណៈដែលទីក្រុងវ៉ាស៊ីនតោនកំពុងតែយកចិត្ត ទុកដាក់ទៅលើការវាយប្រហារដ៏សាហាវកាលពីថ្ងៃទី ៧ ខែតុលា លើអ៊ីស្រាអែល ដោយក្រុមសកម្មប្រយុទ្ធហាម៉ាស។
ទន្ទឹមនឹងគ្នានោះ សហរដ្ឋអាមេរិក ក៏កំពុងតែសម្លឹងមើលការគាំទ្របន្ថែមទៀតដល់អ៊ុយក្រែនដែលប្រឈមមុខនឹងការឈ្លានពានរុំារ៉ៃពីរុស្ស៊ី។
គួររំឭកថា កាលពីថ្ងៃពុធថ្មីៗនេះ លោកបៃដិន បានធ្វើដំណើរទៅកាន់ប្រទេសអ៊ីស្រាអែល ខណៈដែលប្រទេសនេះកំពុងប្រឈមមុខនឹងសង្រ្គាម។ ដំណើរទស្សនកិច្ចរបស់លោក បៃឌិន នាពេលនោះទទួលបានការគាំទ្រច្រើន ក្នុងនោះក៏មាននូវការចុះកិច្ចផ្ដល់ជំនួយមនុស្សធម៌ទៅកាន់ តំបន់កាហ្សាផងដែរ។
ជាការបង្ហាញពីជំហរគាំទ្ររបស់អាមេរិក លោក បៃដិន បាននិយាយក្នុងដំណើរទស្សនកិច្ចនោះថា៖ «ខ្ញុំមកអ៊ីស្រាអែលជាមួយនឹងសារសំខាន់មួយគឺ អ៊ីស្រាអែលមិននៅម្នាក់ឯងទេ! ។ដរាបណាសហរដ្ឋអាមេរិកឈរ យើងនឹងមិនទុកឱ្យអ្នកនៅម្នាក់ឯងទេ»៕ ប្រែសម្រួល៖ កែវ បុស្បា
