ក្រុមហ៊ុនស្រាបៀរចិនបើកការស៊ើបអង្កេត ក្រោយវីដេអូកម្មករក្រុមហ៊ុន នោមដាក់គ្រឿងផលិត ផ្ទុះល្បីលើអ៊ិនធឺណិត
ប៉េកាំង៖ក្រុមហ៊ុនផលិតស្រាបៀរដ៏ធំបំផុតមួយរបស់ប្រទេសចិន ស៊ីនតៅ(Tsingtao)បាននិយាយថា ខ្លួនបានបើកការស៊ើបអង្កេតមួយ បន្ទាប់ពីវីដេអូដែលបង្ហាញឱ្យឃើញពីបុគ្គលិករោងចក្រនោមដាក់គ្រឿងផ្សំផលិតស្រាបៀរ បានផ្ទុះល្បីលើបណ្ដាញសង្គម។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានរ៉យទ័រ។
វិដេអូឃ្លីបដែលគេចែកចាយលើបណ្ដាញសង្គមចិន Weibo កាលពីថ្ងៃព្រហស្បតិ៍ បានបង្ហាញពីកម្មករជាបុរសម្នាក់នៅឃ្លាំងស្តុកស្រាបៀរ Tsingtao បានឡើងទៅលើកន្លែងផលិតវត្ថុធាតុដើមស្រា ហើយចាប់ផ្តើមនោមកន្លែងនោះ។ វីដេអូនេះ បានទាក់ទាញការចូលមើលរហូតដល់ទៅជាងរាប់សិបលានដង។
ក្រុមហ៊ុន Tsingtao បានលើកឡើងកាលពីថ្ងៃសុក្រថា ខ្លួនបានទាក់ទងប៉ូលិសជុំវិញបញ្ហានេះ ហើយការស៊ើបអង្កេតកំពុងបន្ត។ ក្រុមហ៊ុនបាននិយាយក្នុងសេចក្ដីថ្លែងការណ៍មួយថា ៖ «ក្រុមហ៊ុនរបស់យើងយកចិត្តទុកដាក់ខ្ពស់ចំពោះវីដេអូពាក់ព័ន្ធ ដែលបានផុសចេញពីក្រុមហ៊ុន Tsingtao Brewery Number 3 នៅថ្ងៃទី ១៩ ខែតុលា»។
ក្រុមហ៊ុននេះបន្តថា ៖ «យើងបានរាយការណ៍ពីបញ្ហានេះទៅប៉ូលិសឱ្យបានលឿនបំផុត ហើយស្ថាប័នសន្តិសុខសាធារណៈបានចូលរួមនៅក្នុងការស៊ើបអង្កេតរបស់យើង»។
ក្រុមហ៊ុន Tsingtao បន្តថា ទោះបីបញ្ហាកន្លែងស្តុកកើតហេតុត្រូវបានដោះស្រាយរួចរាល់ក្ដី ក្រុមហ៊ុននៅតែបន្តពង្រឹងនីតិវិធីគ្រប់គ្រងរបស់ខ្លួន និងធានាគុណភាពផលិតផល។
ជុំវិញបញ្ហានេះផងដែរ គេឃើញមានអ្នកប្រើប្រាស់បណ្ដាញសង្គមបញ្ចេញមតិប្លែកៗពីគ្នា ដោយជាច្រើនបានប្រតិកម្មនឹងវីដេអូនេះទាំងកំហឹង និងបានបញ្ចេញសំឡេងគាំទ្រឱ្យ Tsingtao មានចំណាត់ការទៅលើបុរសដែលនោមនោះ។
ជាមួយគ្នានោះ ក៏មានមតិចំអកផងដែរ។ រ៉យទ័រស្រង់សម្ដីអ្នកប្រើប្រាស់បណ្ដាញសង្គមម្នាក់ ដែលបញ្ចេញមតិថា៖ «ខ្ញុំតែងតែគិតថា ស្រាបៀរនេះរស់ជាតិដូចទឹកនោមសេះ។ វាបែរជាខ្ញុំគិតខុសទៅវិញ»៕
ប្រែសម្រួល៖ហួន ឌីណា
