ស៊ីម៉ាក់បង្កើតក្រុមការងារផ្តល់សេវាជួយគាំទ្រសេដ្ឋកិច្ចសង្គមដល់ជនពិការដោយសារមីន និងសំណល់ជាតិផ្ទុះសង្រ្គាម
ភ្នំពេញ៖មជ្ឈមណ្ឌលសកម្មភាពកំចាត់មីនកម្ពុជា(CMAC) បានបង្កើតក្រុមការងារផ្តល់សេវាជួយគាំទ្រសេដ្ឋកិច្ចសង្គមដល់ជនពិការដោយសារមីន និងសំណល់ជាតិផ្ទុះសង្រ្គាម ក្នុងគោលដៅចូលរួមចំណែកលើកកម្ពស់ជីវភាពរស់នៅ និងសុខុមាលភាពរបស់របស់ជនពិការ។
ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានបញ្ជាក់តាមរយៈហ្វេសប៊ុករបស់លោកកាលពីចុងសប្តាហ៍មុនថា ស្របតាមគោលនយោបាយរបស់រាជរដ្ឋាភិបាលអា ណត្តិទី៧នេះ មជ្ឈមណ្ឌលសកម្មភាពកំចាត់មីនកម្ពុជា បានបង្កើត «ក្រុមការងារ គម្រោងផ្តល់សេវាជួយគាំទ្រសេដ្ឋកិច្ចសង្គមដល់ជនពិការដោយសារមីន និងសំណល់ជាតិផ្ទុះសង្រ្គាម»។ការបង្កើតនេះ ក្នុងគោលដៅចូលរួមចំណែកលើកកម្ពស់ជីវភាពរស់នៅ និងសុខុមាលភាពរបស់ជនមានពិការភាពដោយសារមីន និងសំណល់ជាតិផ្ទុះសង្គ្រាម។
បើតាមឯកឧត្តម ហេង រតនា ខេត្តគោលដៅសម្រាប់ការអនុវត្តគម្រោងនេះដំណាក់កាលទី១មានខេត្តពោធិ៍សាត់ បាត់ដំបង ប៉ៃលិន និងខេត្តបន្ទាយមានជ័យ ខណៈដែលមន្ត្រីជំនាញ បានទទួលការហ្វឹកហ្វឺន និងបំពាក់សម្ភារបច្ចេកទេសរួចជាស្រេច ដើម្បីចាប់ផ្តើមដំណើរការប្រតិបត្តិការតាមគោលដៅក្នុងផែនការគម្រោង។
ដោយឡែកកាលពីថ្ងៃទី២០ ដល់ថ្ងៃទី២៣ ខែតុលាកន្លងទៅនេះ អាជ្ញាធរមីនមជ្ឈមណ្ឌលសកម្មភាពកំចាត់មីនកម្ពុជា និងកម្មវិធីអភិវឌ្ឍន៍សហប្រជាជាតិ( UNDP) បានសម្របសម្រួលរៀបចំទស្សនកិច្ចសិក្សាស្វែងយល់ និងផ្លាស់ប្តូរបទពិសោធន៍លើវិស័យសកម្មភាពមីនជូនគណៈប្រតិភូប្រទេសអាមេនីផងដែរ។
យោងតាមអាជ្ញាធរមីន ក្នុងដំណើរទស្សនកិច្ចនេះ គណៈប្រតិភូបានទៅទស្សនាការហ្វឹកហ្វឺនបោសសម្អាតមីននៅវិទ្យាស្ថានបច្ចេកទេសសកម្មភាពមីននៅខេត្តកំពង់ឆ្នាំង នៅមជ្ឈមណ្ឌលស្តារកាយសម្បទា និងការបោសសម្អាតមីននៅខេត្តបាត់ដំបងផងដែរ។
នាព្រឹកថ្ងៃទី២៣ ខែតុលាឯកឧត្តម ហេង រតនា បានទទួលស្វាគមន៍ និងពិភាក្សាការងារជាមួយនឹងគណៈប្រតិភូប្រទេសអាមេនី ដែលដឹកនាំដោយលោកVaghinak Sargsyan នាយកមជ្ឈមណ្ឌលបោសសម្អាតមីនមនុស្សធម៌ប្រទេសអាមេនី ដើម្បីផ្លាស់ប្តូរបទពិសោធន៍ និងការពង្រឹងកិច្ចសហប្រតិបត្តិការរវាងអង្គភាពទាំងពីរ។
បើតាមឯកឧត្តម ហេង រតនា តាមរយៈនៃកិច្ចពិភាក្សានេះ អង្គភាពបោសសម្អាតមីនមនុស្សធម៌ប្រទេសអាមេនី បានបង្ហាញការចាប់អារម្មណ៍ខ្លាំងលើបទពិសោធន៍ជំនាញបច្ចេកទេសរបស់អង្គភាពស៊ីម៉ាក់ ក៏ដូចជាប្រសិទ្ធភាព និងល្បឿននៃប្រតិបត្តិការបោសសម្អាតមីនរបស់អង្គភាពស៊ីម៉ាក់ តាមរយៈការធ្វើសមាហរណកម្មកម្លាំងជំនាញរួមគ្នា រួមមាន អ្នកឯកទេសបោសម្អាតមីន ឧបករណ៍បោសសម្អាតមីន គ្រឿងចក្រ សុនខហិតមីន និងកណ្តុរហិតមីនជាដើម។
សូមជម្រាបថា ក្នុងរយៈពេលបួនថ្ងៃកន្លងទៅនេះ គណៈប្រតិភូរបស់អង្គភាពបោសសម្អាតមីនមនុស្សធម៌ប្រទេសអាមេនី ក៏បានទស្សនកិច្ចសិក្សានៅតាមការដ្ឋានបោសសម្អាតមីនរបស់អង្គភាពស៊ីម៉ាក់ នៅខេត្តកំពង់ឆ្នាំង បាត់ដំបង និងខេត្តប៉ៃលិន។
សូមរម្លឹកថា រយៈពេលប្រាំបួនខែ ឆ្នាំ២០២៣នេះ ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមមានចំនួន ២៧នាក់ ក្នុងនោះខេត្តដែលមានជនរងគ្រោះថ្នាក់ដោយសារមីន និងសំណង់ជាតិផ្ទុះពីសង្គ្រាមច្រើនជាង គឺខេត្តបន្ទាយមានជ័យ ឧត្តរមានជ័យ បាត់ដំបង និងខេត្តរតនគិរី៕
ដោយ៖ជា សុខនី
