ប៉េកាំង៖ ប្រទេសចិនមិនទាន់បានប្រកាសនៅឡើយទេថា តើប្រធានាធិបតី លោក ស៊ី ជីនពីង (Xi Jinping) នឹងទទួលយកការអញ្ជើ​ញរបស់ប្រធានាធិបតី ចូ បៃដិន (Joe Biden) ទៅបំពេញទស្សនកិច្ចនៅសហរដ្ឋអាមេរិកនៅខែក្រោយ ឬក៏យ៉ាងណា។ ប៉ុន្តែក្រុងប៉េកាំងកំពុងរៀបចំដំណើរទស្សនកិច្ចដោយរដ្ឋមន្ត្រីការបរទេស លោក វ៉ាង យី (Wang Yi) ដែលគ្រោងនឹងជួបជាមួយរដ្ឋមន្ត្រីការបរទេសអាមេរិកលោក អាន់តូនី ប្លិងកិន (Antony Blinken) នៅទីក្រុងវ៉ាស៊ីនតោននៅចុងសប្តាហ៍នេះ។

ដំណើរទស្សនកិច្ចរបស់លោក វ៉ាង ទំនងជាការរៀបចំបើកផ្លូវសម្រាប់កិច្ចប្រជុំកំពូលរវាងលោក ស៊ី និងលោក បៃដិន។​

គេសង្កេតឃើញថា ប្រទេសចិន​បាន​បញ្ជូន​គណៈប្រតិភូ​ជាច្រើន​ទៅកាន់​អាមេរិក​ក្នុង​រយៈពេល​ប៉ុន្មាន​ខែ​ថ្មីៗ​នេះ ដែលនេះបាន​បង្ហាញឱ្យឃើញ​ថា​ ទីក្រុង​ប៉េកាំង​កំពុងចាប់អារម្មណ៍​លើ​ការកែលម្អ​ទំនាក់ទំនង​ជាមួយ​អាមេរិក​ បើទោះជា​ប្រ​ទេ​ស​ទាំងពីរ​មានការ​ខ្វែងគំនិត​គ្នា​ខ្លាំង​លើ​បញ្ហា​ជាច្រើន​ក៏ដោយ។

ជាក់ស្ដែង លោក វ៉ាង នឹងជួបជាមួយលោក ប្លិងកិន នៅទីក្រុងវ៉ាស៊ីនតោនក្នុងសប្តាហ៍នេះ ដើម្បីពិភាក្សាអំពីកិច្ចប្រជុំកំ​ពូល APEC។ រីឯគណៈប្រតិភូធុរកិច្ចចិន វប្បធម៌ និងកីឡា ក៏នឹងធ្វើទស្សនកិច្ចនៅទីក្រុងញូវយ៉កក្នុងសប្តាហ៍នេះផងដែរ ពោលគឺលោក វ៉ាង និងគណៈប្រភូចិន ក៏ដូចជាលោក ប្លិងកិន កំពុងចាត់វិធានការកែលម្អទំនាក់ទំនង និងត្រួសត្រា​យផ្លូវសម្រាប់កិច្ចប្រជុំកំពូលរវាងមេដឹកនាំរបស់ពួកគេ។​

កិច្ចចរចារវាងអាមេរិក និងចិនកាន់តែមានផលិតភាព ដោយភាគីទាំងពីរកំពុងងាកចេញពីការប្រឈមមុខដាក់គ្នាក្នុងប៉ុន្មានខែថ្មីៗនេះ និងឆ្ពោះទៅរកកិច្ចសហប្រតិបត្តិការកាន់តែប្រសើរ។ នេះ​ជា​ការ​វិវឌ្ឍ​ជា​វិជ្ជមានមួយ ព្រោះ​ជាការប​ង្ហាញ​ថា​ប្រទេស​ទាំង​ពីរ​មាន​ឆន្ទៈ​សហការ​គ្នា​ដើម្បី​ដោះស្រាយ​បញ្ហាចម្រូងចម្រាសរបស់​ពួកគេ។​

ថ្វីបើមានការជជែកគ្នាដើម្បីស្វែងរកកិច្ចសហប្រតិបត្តិការកន្លងមកខ្លះក៏ដោយ ក៏លោក ស៊ី ហាក់ដូចជាមិនចាប់អារ​ម្មណ៍​លើការបង្កើតទំនាក់ទំនងល្អជាមួយសហរដ្ឋអាមេរិកនោះទេ។ជាឧទាហរណ៍ កាលពីពេលថ្មីៗនេះ ប្រទេសចិនបានធ្វើជាម្ចាស់ផ្ទះទទួលប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) ដែលជាទង្វើបង្ហាញឱ្យឃើញពីការចង់ប​ន្តទំនាក់ទំនងជិតស្និទ្ធជាមួយរុស្ស៊ី។វត្តមានរបស់លោក ស៊ី នៅក្នុងកិច្ចប្រជុំកំពូល APEC នៅទីក្រុងសាន់ហ្វ្រានស៊ីស្កូ (San Francisco) ក៏ស្ថិតក្នុងភាពស្រពិចស្រពិលផងដែរ។​

គិតរហូតមកទល់ពេលនេះ ប្រធានាធិបតីចិនមិនបានទៅបំពេញទស្សនកិច្ចនៅសហរដ្ឋអាមេរិកម្ដងណានៅឡើយទេ រាប់ចាប់តាំងពីឆ្នាំ២០១៧មក ហើយលោកប្រធានាធិបតី បៃដិន ក៏មិនបានធ្វើទស្សនកិច្ចទៅកាន់ប្រទេសចិននោះដែរ រាប់ចាប់តាំងពីលោកបានក្លាយជាប្រធានាធិបតីអាមេរិក។ មេដឹកនាំទាំងពីរបានជួបគ្នានៅប្រទេសឥណ្ឌូនេស៊ីកាលពីខែវិច្ឆិកាឆ្នាំមុន ។ប៉ុន្តែទំនាក់ទំនងរវាងប្រទេសទាំងពីរនៅតែបន្តធ្លាក់ចុះ។

សហរដ្ឋអាមេរិក និងចិនមានជម្លោះជាច្រើន ក្នុងនោះរួមមានជម្លោះពាណិជ្ជកម្ម យោធា និងសិទ្ធិមនុស្សជាដើម។ លោ​ក បៃដិន ធ្លាប់បានហៅលោក ស៊ី ថាជាជនផ្តាច់ការ និងបានចោទប្រកាន់ប្រទេសចិនថាបានព្យាយាមផ្លាស់ប្តូរសណ្តាប់ធ្នាប់អន្តរជាតិ ខណៈដែលលោក ស៊ី បានចោទប្រកាន់សហរដ្ឋអាមេរិកថាបានព្យាយាមរាំងខ្ទប់ប្រទេសចិន។​

អ្នកជំនាញបាននិយាយថា ការកើនឡើងនៃការផ្លាស់ប្តូរការសិក្សារវាងសហរដ្ឋអាមេរិក និងចិននាពេលថ្មីៗនេះ គឺជាសញ្ញាមួយបង្ហាញថា ប្រទេសទាំងពីរមានបំណងកែលម្អទំនាក់ទំនងឡើងវិញ បើទោះបីជាមិនមានការធានាថា ជំនួបកំ​ពូលរវាងមេដឹកនាំទាំងពីរនឹងកើតមានឡើងក៏ដោយ។​

រីឯជំនួយការគោលនយោបាយសេដ្ឋកិច្ចកំពូលរបស់ប្រទេសចិន លោក ហឺ លីហ្វឹង (He Lifeng) ក៏គ្រោងនឹងទៅបំពេញទស្សនកិច្ចនៅសហរដ្ឋអាមេរិក ដើម្បីជួបជាមួយបណ្ដាមន្ត្រីជាន់ខ្ពស់អាមេរិក រួមទាំងរដ្ឋមន្ត្រីក្រសួងរតនាគារ និងរដ្ឋមន្ត្រីពាណិជ្ជកម្មផងដែរ។

កាលបរិច្ឆេទសម្រាប់ដំណើរទស្សនកិច្ចនេះ នៅមិនទាន់ត្រូវបានបញ្ជាក់នៅឡើយទេ ប៉ុន្តែអាចនឹងធ្វើឡើងនៅក្រៅកិច្ចប្រជុំកំពូល APEC នៅទីក្រុងសាន់ហ្វ្រាន់ស៊ីស្កូ។ អ្នកជំនាញយល់ឃើញថា ការកើនឡើងនៃសកម្មភាពមុនកិច្ចប្រជុំកំពូ​លរបស់លោក ស៊ី និងលោក បៃដិន គឺជាសញ្ញាវិជ្ជមានមួយ ប៉ុន្តែគេហាក់គ្មានសង្ឃឹមនោះទេថា ជំនួបរវាងមេដឹកនាំទាំ​ងពីរនឹងអាចឈានដល់កិច្ចព្រមព្រៀងណាមួយកើតមានឡើង។​

លោក ម៉ាធូ ផូធីងហ្គឺ (Matthew Pottinger) អតីតមន្ត្រីក្រោមរដ្ឋបាលរបស់លោក ដូណាល់ ត្រាំ (Donald Trump) បាននិយាយថា វាជាសញ្ញាវិជ្ជមានមួយ នៅពេលដែលមេដឹកនាំសហរដ្ឋអាមេរិក និងចិនអាចជួបនិយាយគ្នាទៅវិញទៅមក។ យ៉ាងណាក៏ដោយ លោកមិនសូវគាំទ្រចំពោះជំនួបប្រជុំរវាងមន្ត្រីជំនាញថ្នាក់ក្រោមនោះទេ ដូចជាក្រុមការងារសេ​ដ្ឋ​កិច្ចជាដើម ពីព្រោះលោកជឿថា ប្រទេសចិនប្រើប្រាស់កិច្ចសន្ទនាទាំងនេះ ដើម្បីដាក់សម្ពាធលើសហរដ្ឋអាមេរិក មិនឱ្យកែប្រែគោលនយោបាយណាដែលអាចធ្វើឲ្យប៉ះពាល់ដល់ផលប្រយោជន៍ចិន។​

ក្រៅពីនេះ ចិនក៏​កំពុង​បញ្ជូន​មនុស្ស​ល្បី​ៗ​ទៅ​សហរដ្ឋអាមេរិក ដើម្បី​លើក​កម្ពស់​មុខមាត់​សាធារណៈ។ ឧទាហរណ៍ តារាបាល់បោះ លោក យ៉ៅ មិង (Yao Ming) ដែលលេងឱ្យក្រុម Houston Rockets នឹងក្លាយជាមនុស្សម្នាក់ក្នុងចំណោមគណៈប្រតិភូធុរកិច្ច និងឥស្សរជនវប្បធម៌ចិន ដែលនឹងទៅទស្សនកិច្ចនៅទីក្រុងញូវយ៉កក្នុងសប្តាហ៍នេះ។ លោក យ៉ៅ នឹង​ថ្លែង​សុន្ទរកថា​គោរព​វិញ្ញាណក្ខន្ធ​រដ្ឋ​មន្ត្រី​អាមេរិកលោក ហេនរី គីស៊ីងហ្គឺ (Henry Kissinger) និងថ្លែងអបអរសាទរដល់​ឯកអគ្គរដ្ឋទូត​ថ្មី​របស់​ចិន​ប្រចាំ​នៅ​សហរដ្ឋ​អាមេរិក លោក សៀ ហ្វឹង (Xie Feng)៕​

ប្រែសម្រួល៖ធា សុណា

ប្រភពព័ត៌មាន៖​ The Wall Street Journal Beijing Stages Charm Offensive to Pave Way for Xi Trip