រយៈពេល ១៧ឆ្នាំ កម្ពុជាបានបញ្ជូនកម្លាំងនៃកងយោធពលខេមរភូមិន្ទជិតមួយម៉ឺននាក់ បំពេញបេសកកម្មនៅប្រទេសចំនួន១០
ភ្នំពេញ៖ រយៈពេល ១៧ឆ្នាំនេះ កម្ពុជាបានបញ្ជូនកម្លាំងនៃកងយោធពលខេមរភូមិន្ទសរុបជិតមួយម៉ឺននាក់ ក្នុងនោះមានកម្លាំងជានារីជាង៧០០ នាក់ ទៅកាន់បេសកកម្មចំនួន១២ ក្នុងបណ្តាប្រទេសចំនួន១០ លើជំនាញសំខាន់ៗ រួមមាន ការបោសសំអាតមីន និងកម្ទេចគ្រាប់មិនទាន់ផ្ទុះផងដែរ។
នាឱកាសនៃការអបអរសាទរទិវាបុណ្យឯករាជ្យជាតិខួបលើកទី៧០មជ្ឈមណ្ឌលជាតិរក្សាសន្តិភាពបានបង្ហាញនូវវីដេអូឯកសារដ៏មានខ្លឹមសារមួយផងដែរកាលពីថ្ងៃទី៩ ខែវិច្ឆិកា ឆ្នាំ២០២៣ ដោយបានលើកឡើងពីសកម្មភាពនៃការចូលរួមប្រតិបត្តិការរក្សាសន្តិភាព ក្រោមឆត្រអង្គការសហប្រជាជាតិ ចាប់តាំងពីឆ្នាំ២០០៦មក។
មជ្ឈមណ្ឌលជាតិរក្សាសន្តិភាពបានលើកឡើងតាមរយៈហ្វេសប៊ុកថាចាប់ពីឆ្នាំ២០០៦ មកដល់ឆ្នាំ២០២៣ មានរយៈពេល១៧ឆ្នាំមកហើយ ដែលកម្ពុជា បានបញ្ជូនកងទ័ពមួកខៀវ ចូលរួមប្រតិបត្តិការរក្សាសន្តិភាព ក្រោមឆត្រអង្គការសហប្រជាជាតិ។
កម្ពុជា ជាប្រទេសដែលជាប្រទេសធ្លាប់ទទួលអាជ្ញាធរបណ្តោះអាសន្នអង្គការសហប្រជាជាតិ ហៅថា អ៊ុនតាក់(UNTAC)នាឆ្នាំ១៩៩២-១៩៩៣ ក្រោយកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
នៅថ្ងៃទី១២ ខែមេសា ឆ្នាំ២០០៦ ជាការបញ្ជូនកម្លាំងលើកដំបូងរបស់កម្ពុជា ចូលរួមចំណែកស្វែងរកសុខស ន្តិភាព។
ប្រភពដដែលបានបញ្ជាក់ថា ៖ «១៧ឆ្នាំនេះ កម្ពុជាបានបញ្ជូនកម្លាំងនៃកងយោធពលខេមរភូមិន្ទសរុបចំនួន ៩ ២០៧នាក់ ក្នុងនោះនារីចំនួន ៧២៩នាក់ ទៅកាន់បេសកកម្មចំនួន១២ ក្នុងបណ្តាប្រទេសចំនួន១០ មានជាអាទិ៍៖ ស៊ូដង់ ឆាត លីបង់ ស៊ូដង់ខាងត្បូង សាយប្រឺស ស៊ីរី អាហ្វ្រិកកណ្តាល ម៉ាលី យេម៉ែន និងកុងហ្គោ»។
ជំនាញសំខាន់ៗដែលកងកម្លាំងកម្ពុជាបានចូលរួមបេសកកម្ម មានដូចជា៖ វិស្វកម្មពហុជំនាញ វិស្វកម្មព្រលានយន្តហោះ បោសសំអាតមីន កម្ទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា។
សូមបញ្ជាក់ថា បច្ចុប្បន្ន កម្លាំងសរុប ៨៤៨នាក់ នាក់ (នារី ១៤៤ នាក់) កំពុងបំពេញបេសកកម្ម នៅប្រទេសចំនួន ៥ រួមមាន សាធារណរដ្ឋស៊ូដង់ខាងត្បូង លីបង់ អាហ្រ្វិកកណ្តាល ម៉ាលី និងកុងហ្គោ។
ទាក់ទងនឹងការបញ្ជូលកងកម្លាំងរក្សាសន្តិភាពនេះដែរ អតីតនាយករដ្ឋមន្រ្តី ហ៊ុន សែន ធ្លាប់ថ្លែងបញ្ជាក់យ៉ាងច្បាស់ថា នាយទាហាន នាយទាហានរង និងពលទាហានដែលចេញទៅប្រតិបត្តិការនេះ មិនមែនជាទាហានឈ្លានពាន ហើយក៏មិនមែនជាទាហានត្រួតត្រា ហើយក៏មិនមែនជាទាហាស៊ីឈ្នួលផងដែរ។
លោកបានសង្កត់ធ្ងន់ថា ៖ «ជាការរក្សាសន្តិភាពដែលត្រូវគោរពនូវឯករាជ្យ អធិបតេយ្យភាពនៃប្រទេសនោះឱ្យបានជាដាច់ខាត ហើយវាមានតម្លៃស្មើនឹងការគោរពឯករាជ្យ អធិបតេយ្យភាពរបស់ជាតិកម្ពុជាខ្លួនឯងផងដែរ»។
ឧបនាយករដ្ឋមន្រ្ត រដ្ឋមន្រ្តីក្រសួងការពារជាតិនាយឧត្តមសេនីយ៍ ទៀ សីហា បានលើកឡើងតាមរយៈសារអបអរខួបអនុស្សាវរីយ៍លើកទី ៧០ ទិវាកំណើតកងយោធពលខេមរភូមិន្ទ នាថ្ងៃទី៩ ខែវិច្ឆិកា ឆ្នាំ២០២៣ថា កងយោធពលខេមរភូមិន្ទបានរួមចំណែកយ៉ាងសំខាន់ក្នុងការថែរក្សាសន្តិសុខជាតិ ការបោសសំអាតមីន និងយុទ្ធភ័ណ្ឌមិនទាន់ផ្ទុះ និងការជួយសង្គ្រោះប្រជាជនពេលកើតមានគ្រោះមហន្តរាយផ្សេងៗផងដែរ។
នាយឧត្តមសេនីយ៍បន្តថា កងយោធពលខេមរភូមិន្ទ បានចូលរួមក្នុងបុព្វហេតុសន្តិភាព ស្ថិរភាព វិបុលភាពតំបន់ និងពិភពលោក និងបានចូលរួមក្នុងបេសកកម្មថែរក្សាសន្តិភាព ក្រោមឆត្រអង្គការសហប្រជាជាតិនៅបណ្តាប្រទេសដែលកំពុងមានវិបត្តិនៅទ្វីបអាហ្វ្រិក និងតំបន់មជ្ឈិមបូព៌ា, ការទប់ស្កាត់ការរីករាលដាលនៃជំងឺកូវីដ១៩ និងបេសកកម្មជាច្រើនទៀត។
នាសម័យប្រជុំលើកទី៧៨ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក កាលពីថ្ងៃទី២៣ ខែកញ្ញា ឆ្នាំ២០២៣កន្លងទៅនេះសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងក្នុងនាមជាប្រទេសបញ្ជូនកងទ័ពមួកខៀវ កម្ពុជាគាំទ្រយ៉ាងពេញទំហឹងការបង្កើនជំនួយអភិវឌ្ឍន៍ផ្លូវការ (ODA) សម្រាប់ទ្រទ្រង់សកម្មភាពកសាងសន្ដិភាព។
សម្ដេចធិបតីមានប្រសាសន៍ថា ៖ «កម្ពុជាមានការប្ដេជ្ញាចិត្តខ្ពស់ ចំពោះប្រតិបត្តិការរក្សាសន្ដិភាពដើម្បីរួមចំណែកដល់ សន្ដិភាព សន្ដិសុខ និងស្ថិរភាពអន្ដរជាតិ ដែលជាកត្តាចាំបាច់សម្រាប់ការអភិវឌ្ឍប្រកបដោយចីរភាព»។
សម្ដេចធិបតី ហ៊ុន ម៉ាណែត បានបន្តថា ៖ «ដើម្បីរួមចំណែកបន្ថែមទៀត ដល់ដំណើរការនេះ កម្ពុជាបានសម្រេចចិត្តឈរឈ្មោះជាសមាជិក នៃគណៈកម្មាធិការរៀបចំ នៃគណៈកម្មការកសាងសន្ដិភាព (OCPBC) សម្រាប់អាណត្តិ២០២៥-២០២៦ ហើយយើងខ្ញុំសង្ឃឹមថានឹងទទួលបានការគាំទ្រដ៏មានតម្លៃរបស់ ឯកឧត្តម លោកជំទាវ សម្រាប់បេក្ខភាពរបស់យើងខ្ញុំ នៅក្នុងស្ថាប័ននេះ»។
សូមបញ្ជាក់ផងដែរថា ក្នុងរយៈពេល ១៧ឆ្នាំកន្លងមកនេះ កងកម្លាំងរក្សាសន្តិភាពកម្ពុជាក៏បានបំពេញការងារក្នុងប្រទេសរបស់ខ្លួនជាច្រើនផងដែរ ក្នុងនោះរួមមានការដោះមីនជូនប្រជាពលរដ្ឋ សាងសង់ស្ពានសាលារៀន ការចាក់ថ្នាំវ៉ាក់សាំងកូវីដ១៩ជូនប្រជាពលរដ្ឋ រួមនឹងការងារជាច្រើនទៀតផងដែរ៕
ដោយ៖ នាង សុគន្ធា
