ឌូបៃ៖ ប្រទេសអេមីរ៉ាត អារ៉ាប់រួម បានប្រកាសចាប់ផ្តើមមូលនិធិវិនិយោគអាកាសធាតុថ្មី ដែលមានទំហំទឹកប្រាក់ចំនួន ៣០ពាន់លានដុល្លារអាមេរិក ដើម្បីចូលរួមដោះស្រាយបញ្ហាប្រែប្រួលអាកាសធាតុ អំឡុងកិច្ចប្រជុំកំពូល COP28។

ប្រធានាធិបតីនៃប្រទេស អេមីរ៉ាតអារ៉ាប់រួម លោក Mohammed ben Zayed បានប្រកាសពីការបង្កើតមូលនិធិឯកជនថ្មីមួយ ដើម្បីចូលរួមចំណែកដោះស្រាយបញ្ហាបម្រែបម្រួលអាកាសធាតុពិភពលោក ដែលមានទំហំទឹកប្រាក់ ៣០ពាន់លានដុល្លារមេរិក។

លោកប្រធានាធិបតីបានប្រកាសពីការចាប់ផ្តើមមូលនិធិនេះ ក្នុងពេលដែលលោកប្រកាសបើកកិច្ចប្រជុំកំពូល នៃសន្និសីទអង្គការសហប្រជាជាតិស្តីពីការប្រែប្រួលអាកាសធាតុ ហៅកាត់ថា COP28 កាលពីថ្ងៃទី១ ខែធ្នូ។

លោក Mohammed ben Zayed បានរៀបរាប់ថា «ខ្ញុំមានសេចក្តីសោមនស្សរីករាយ ក្នុងការប្រកាសអំពីការបង្កើតមូលនិធិ ចំនួន ៣០ ពាន់លានដុល្លារសម្រាប់ដំណោះស្រាយបញ្ហាអាកាសធាតុពិភពលោក»។

ប្រធាន COP28 លោក Sultan Al Jaber ដែលជាប្រធានក្រុមហ៊ុនប្រេងជាតិរបស់ ប្រទេសអេមីរ៉ាត អារ៉ាប់រួម ADNOC នឹងត្រូវធ្វើជាប្រធានក្រុមប្រឹក្សាភិបាលនៃមូលនិធិថ្មីនេះ នេះបើយោងតាមសេចក្តីថ្លែងការណ៍។

ប្រភពបានឲ្យដឹងដែរថា មូលនិធិថ្មីនេះនឹងជំរុញកិច្ចខិតខំប្រឹងប្រែងអន្តរជាតិឆ្ពោះទៅមុខ ដើម្បីបង្កើតប្រព័ន្ធហិរញ្ញវត្ថុអាកាសធាតុ ដែលមានភាពយុត្តិធម៌ ដោយសង្កត់ធ្ងន់លើការធ្វើឱ្យប្រសើរឡើងនូវលទ្ធភាពទទួលបានមូលនិធិ សម្រាប់ពិភពលោកខាងត្បូង។

គួរបញ្ជាក់ថា មេដឹកនាំពិភពលោក និងមន្ត្រីជាន់ខ្ពស់បានទៅជួបប្រជុំគ្នា នៅក្នុងទីក្រុងឌូបៃ ប្រទេសអេមីរ៉ាត អារ៉ាប់រួម ដើម្បីចូលរួមសន្និសីទ COP28 ក្រោមសម្ពាធឲ្យបង្កើនកិច្ចខិតខំប្រឹងប្រែង ដើម្បីកំណត់កម្រិតនៃការឡើងកំដៅផែនដី៕ ប្រភពពី AFP ប្រែសម្រួល៖ សារ៉ាត