លីម៉ា៖ ការព្យាករណ៍មួយបានព្រមានថា បាតុភូតអាកាសធាតុ El Niño ដែលបានចាប់ផ្តើមជាផ្លូវការនៅពាក់កណ្តាលឆ្នាំនេះ អាចនឹងបន្តរហូតដល់ខែឧសភា ឆ្នាំ ២០២៤។ ការណ៍នេះ នឹងប៉ះពាល់ដល់ឧស្សាហកម្មនេសាទរបស់ប្រទេសប៉េរូ។

El Nino ដែលជាបាតុភូតអាកាសធាតុ ជាប់ទាក់ទងនឹងសីតុណ្ហភាពមហាសមុទ្រកើនឡើងខ្ពស់ ដែលបង្កឲ្យមានគ្រោះរាំងស្ងួត និងទឹកជំនន់នោះ កំពុងបង្កការបំផ្លិចបំផ្លាញដល់ប៉េរូ ដែលជាប្រទេសផលិតប្រេងត្រី និងសាច់ត្រីធំជាងគេបំផុតរបស់ពិភពលោក។

ប្រធានទូកនេសាទត្រីឆ្លាម លោក Luis Celis និយាយថា បាតុភូតអាកាសធាតុ El Nino បានប៉ះពាល់ដល់ជីវភាពរស់នៅរបស់ពួកយើង ពីព្រោះការនេសាទក្នុងរដូវដំបូងនៃឆ្នាំនេះ ត្រូវបានលុបចោលដោយសារការកើនឡើងសីតុណ្ហភាពខ្ពស់ខ្លាំង។

លោកបន្តថា វិស័យនេសាទរបស់យើងមិនទាន់ត្រៀមខ្លួនរួចរាល់ ក្នុងការប្រឈមមុខនឹងបាតុភូតអាកាសធាតុ El Nino ក្នុងរយៈពេល ១ ឬ ២ឆ្នាំនោះទេ ដូច្នេះវានឹងក្លាយជាគ្រោះមហន្តរាយ។ លោកបន្ថែមថា ការនេសាទ គឺជាវិស័យដ៏សំខាន់បំផុតមួយ នៅក្នុងចរន្តសេដ្ឋកិច្ចរបស់ប្រទេសប៉េរូរយៈពេលជិត ៣២ឆ្នាំមកនេះ។

ការនេសាទបានប្រឈមមុខនឹងវិបត្តិដ៏អាក្រក់បំផុតក្នុងរយៈពេល ២៥ឆ្នាំចុងក្រោយនេះ ដោយសារមិនមានរដូវនេសាទដំបូង ដូច្នេះយើងបានខាតបង់ថវិកាប្រមាណ ១ពាន់លានដុល្លារក្នុងការនាំចេញ នេះបើតាមការបញ្ជាក់ពីប្រធានសង្គមជាតិទទួលបន្ទុកកិច្ចការជនផល លោក Eduardo Ferreyros។

យោងតាមវិទ្យាស្ថានជាតិស្ថិតិ និងព័ត៌មានវិទ្យាប៉េរូ (INEI) បានឱ្យដឹងថា នៅចន្លោះខែមករា និងខែកញ្ញាឆ្នាំនេះ វិស័យជលផលបានធ្លាក់ចុះ ២៦.៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២២៕ ប្រភព៖ AFP ប្រែសម្រួលដោយ៖ ឈឹម ទីណា