ប៉ារីស៖ កម្មករជាង ៧០០នាក់មកពីក្រុមហ៊ុន Airbus Atlantic ក្នុងប្រទេសបារាំង មានអាការៈក្អួតចង្អោរ ឬរាគ ចាប់តាំងពីព្រឹត្តិការណ៍ញុំាអាហារពេលល្ងាច នៅជិតទីក្រុងណង់ស៍ (Nantes) ភាគពាយ័ព្យកាលពីសប្តាហ៍មុន។

ទីភ្នាក់ងារសុខភាព ARS របស់ប្រទេសបារាំង បានបើកការស៊ើបអង្កេតមួយ បន្ទាប់ពីបុគ្គលិកជាង ៧០០នាក់ ដែលធ្វើការឱ្យក្រុមហ៊ុន Airbus Atlantic បានធ្លាក់ខ្លួនឈឺ ដោយសារការពុលអាហារជាលក្ខណៈទ្រង់ទ្រាយធំ ក្រោយទទួលទានអាហារថ្ងៃបុណ្យគ្រឹស្មាស់។

ទីភ្នាក់ងារសុខភាព ARS បាននិយាយថា កម្មករទាំងនេះបានធ្លាក់ខ្លួនឈឺ ពីរថ្ងៃបន្ទាប់ចូលរួមព្រឹត្តិការណ៍នេះ ប៉ុន្តែគ្មាននរណាម្នាក់បញ្ជូនទៅសង្គ្រោះនៅមន្ទីរពេទ្យនោះទេ។ គិតមកទល់ពេលនេះ គេនៅពុំទាន់ដឹងច្បាស់ ថាតើមូលហេតុអ្វីនៅពីក្រោយហេតុការណ៍នេះទេ។

គួរបញ្ជាក់ថា Airbus Atlantic គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនអាកាសចរណ៍អឺរ៉ុប Airbus ហើយមានបុគ្គលិកចំនួន ១៥,០០០នាក់ក្នុងប្រទេសចំនួន ៥។ ក្រុមហ៊ុនផលិតយន្តហោះ Airbus របស់ប្រទេសបារាំង មានបុគ្គលិកសរុបចំនួន ១៣៤,០០០នាក់នៅទូទាំងពិភពលោក៕ ប្រភព៖ AFP ប្រែសម្រួលដោយ៖ ឈឹម ទីណា