ស្ត្រីវ័យ ៩០ឆ្នាំម្នាក់ ក្លាយជាសិស្សចំណាស់បំផុតបានបញ្ចប់ការសិក្សា នៅសាកលវិទ្យាល័យ North Texas
អាមេរិក៖ ស្ត្រីវ័យ៩០ឆ្នាំម្នាក់ទើបនឹងបានទទួលសញ្ញាបត្រអនុបណ្ឌិតរបស់ខ្លួនកាលពីពេលថ្មីៗនេះ ហើយការទទួលសញ្ញាបត្រនេះបានកត់ត្រាជាព្រឹត្តិការណ៍ប្រវត្តិសាស្ត្រមួយ ដោយលោកស្រីគឺជាមនុស្សមានវ័យចំណាស់បំផុតក្នុងការបញ្ចប់វគ្គសិក្សានៅសាកលវិទ្យាល័យ North Texas។ នេះបើយោងតាមការឱ្យដឹងពីមន្រ្តីសាកលវិទ្យាល័យ។
បើតាមការឱ្យដឹងពីសាកលវិទ្យាល័យ លោកស្រី Minnie Payne អាយុ ៩០ឆ្នាំមានដើមកំណើតមកពីរដ្ឋ South Carolina ហើយបានបញ្ចប់កម្មវិធីសិក្សារបស់ខ្លួនលើជំនាញអន្តរកម្ម តាមអ៊ីនធឺណិតក្នុងខែកក្កដាឆ្នាំ២០២៣នេះ។
លោក Billy Roessler ជាទីប្រឹក្សានិស្សិតគ្រោងបញ្ចប់ការសិក្សានៅសាលា UNT’s Toulouse និងជាទីប្រឹក្សារបស់លោកស្រី Payne បាននិយាយនៅក្នុងសេចក្តីប្រកាសព័ត៌មានថា ៖ «យើងតែងតែប្រើពាក្យថា ការសិក្សាពេញមួយជីវិត ហើយពេលនេះ Payne បានបង្ហាញឱ្យយើងឃើញថាវាជាការពិតមែន»។
លោក Billy Roessler បន្តឱ្យដឹងថា៖ «ការតស៊ូដើម្បីបញ្ចប់ការសិក្សារបស់លោកស្រីនៅអាយុ ៩០ គឺគួរឱ្យចាប់អារម្មណ៍ ហើយជាអ្វីដែលស្របតាមគោលបំណងលោកស្រីខ្លួនឯងផ្ទាល់ថែមទៀត»។
លោកស្រី Payne ដែលបានសិក្សាផ្តោតលើការសរសេរបានធ្វើការជាអ្នកនិពន្ធឯករាជ្យ និងបុគ្គលិកជាច្រើនឆ្នាំសម្រាប់រោងពុម្ពផ្សាយនៅទីក្រុង Dallas និងទីក្រុង Houston ព្រមជាមួយការងារមួយចំនួនផ្សេងទៀតនៅក្នុងរដ្ឋតិចសាស់។
លោកស្រី Payne បានរៀបរាប់ឱ្យដឹងថា ៖ «អ្នកនិពន្ធភាគច្រើនសរសេរដោយសារតែពួកគេចូលចិត្តវា ខ្ញុំធ្វើក៏ព្រោះស្រលាញ់វា ខ្ញុំធ្វើវាព្រោះវាដូចជាការព្យាបាលមួយ និងផ្តល់ឱ្យខ្ញុំនូវអ្វីថាមពលវិជ្ជមាន»។
មុនទទួលបានសញ្ញាបត្រអនុបណ្ឌិត លោកស្រី Payne បានបញ្ចប់ការសិក្សាបរិញ្ញាបត្រផ្នែកសិក្សាទូទៅ នៅក្នុងឆ្នាំ ២០០៦ ពីសាកលវិទ្យាល័យ Texas Woman’s University។ មកទល់ពេលនេះ ទោះបីជាមានសញ្ញាបត្រកម្រិតខ្ពស់ពីរនៅអាយុ ៩០ឆ្នាំក៏ដោយក្តី តែលោកស្រីបញ្ជាក់ថាការអប់រំរបស់ខ្លួនមិនទាន់មកដល់ទីបញ្ចប់នោះទេ។
បើយោងតាមកំណត់ត្រាពីសាកលវិទ្យាល័យបានឱ្យដឹងថា Payne ធំធាត់ឡើងនៅក្នុង សហគមន៍រោងចក្រវាយនភណ្ឌក្រីក្រមួយនៅក្នុងរដ្ឋ South Carolina។ យុវតី Payne បានបញ្ចប់ការសិក្សាថ្នាក់វិទ្យាល័យនៅឆ្នាំ ១៩៥០ ហើយបានចូលសិក្សាត្រឹមរយៈពេលខ្លីនៅមហាវិទ្យាល័យតូចមួយ មុនពេលចាប់ផ្តើមប្រលោកក្នុងការងារជាស្មៀនរបស់ក្រុមហ៊ុនអចលនទ្រព្យមួយ។
ក្នុងឆ្នាំ ១៩៦១ លោកស្រីបានរៀបការជាមួយស្វាមីឈ្មោះ Dale និងបានចូលធ្វើការ ជាអ្នករាយការណ៍របស់តុលាការ South Carolina Industrial Commission រហូតដល់កូនរបស់ខ្លួនកើតមកទើបឈប់ធ្វើការងារនោះ។ បន្ទាប់ពីធ្វើជាមេផ្ទះប៉ុន្មានឆ្នាំ លោកស្រីបានងាកមកបន្តការងារជាគ្រូបង្រៀនជំនួសវិញ។
ក្រោយមក គ្រួសាររបស់លោកស្រីបានផ្លាស់ទីទៅរស់នៅរដ្ឋផ្សេងៗគ្នា មុនពេលដែលទីបំផុតបានតាំងទីលំនៅអចិន្ត្រៃយ៍នៅទីក្រុង Carrollton រដ្ឋ Texas ។ ក្រោយមកទៀត លោកស្រីបានបន្តការងារជាអ្នកបកប្រែ និងសរសេរអត្ថបទអស់រយៈ ៣០ឆ្នាំ រហូតបានចុះឈ្មោះចូលរៀននៅសាកលវិទ្យាល័យ Texas Woman’s University។ លោកស្រីបានចូលរៀនផ្នែកសារព័ត៌មាន និងអាជីវកម្ម ដោយជោគជ័យហើយបន្តសិក្សាថ្នាក់អនុបណ្ឌិតផ្នែកសារព័ត៌មានដដែល ប៉ុន្តែក្រោយមកបានផ្លាស់ទៅជំនាញសិក្សាអន្តរកម្មវិញ។
យ៉ាងណាក្រោយបញ្ចប់ការសិក្សាថ្នាក់អនុបណ្ឌិត លោកស្រី Payne និយាយថាខ្លួនមានអារម្មណ៍ថាការបន្តការសិក្សាថ្នាក់អនុបណ្ឌិតនេះបានឱ្យខ្លួន និងគ្រួសារកាន់តែប្រសើរឡើង៕
ប្រែសម្រួល៖ស្រ៊ុន សិរីវឌ្ឍនៈ
ប្រភព៖ 90-year-old woman becomes oldest student to complete coursework at the University of North Texas
